കോവിഡ്-19; പ്രീമിയം പേയ്‌മെന്റ് അടയ്‌ക്കാനുള്ള സമയം ഏപ്രിൽ 15 വരെ നീട്ടിയെന്ന് എൽ‌ഐസി

ലൈഫ് ഇൻഷുറൻസ് കോർപ്പറേഷൻ ഓഫ് ഇന്ത്യ (എൽഐസി), ഉപഭോക്താക്കളുടെ എല്ലാ പ്രീമിയം കുടിശ്ശികകളും അടയ്‌ക്കാനുള്ള സമയം ഏപ്രിൽ 15 വരെ നീട്ടി. കോവിഡ്-19 വ്യാപനം തടയുന്നതിനായി നിരവധി സംസ്ഥാനങ്ങൾ ലോക്ക്‌ഡൗൺ പ്രഖ്യാപിച്ചതിനാൽ പോളിസി ഉടമകൾക്കുണ്ടാകുന്ന സാമ്പത്തിക പ്രതിസന്ധിയും പോളിസി അടയ്‌ക്കുന്നതിലുള്ള ബുദ്ധിമുട്ടും കണക്കിലെടുത്താണ് എൽഐസിയുടെ ഈ തീരുമാനം. ലൈഫ് ഇൻഷുറൻസ് മാർക്കറ്റിന്റെ മൂന്നിൽ നാല് ഭാഗവും സർക്കാർ ഉടമസ്ഥതയിലുള്ള ഇൻഷുറൻസ് കമ്പനിയായ എൽഐസിയാണ് നിയന്ത്രിക്കുന്നത്. അതിനാൽ തന്നെ ഇത് പോളിസി ഉടമകൾക്ക് വളരെ ആശ്വാസകരമായ തീരുമാനമായിരിക്കും.

'ഓൺലൈനായോ അല്ലെങ്കിൽ മറ്റ് മാർഗങ്ങൾ വഴിയോ പ്രീമിയങ്ങൾ അടയ്‌ക്കാൻ കഴിയാത്ത ഇടങ്ങളിൽ 2020 ഏപ്രിൽ 15 വരെ പ്രീമിയം അടയ്ക്കുന്നതിന് ഇളവ് നൽകിയ തീരുമാനം ഉപയോക്താക്കൾക്ക് ആശ്വാസം പകരുമെന്ന്' എൽഐസി ഒരു പ്രസ്താവനയിൽ പറഞ്ഞു.

കൊറോണ വൈറസ് കേസുകൾ കണ്ടെത്തിയ ഒന്നിലധികം സംസ്ഥാനങ്ങളിലെ 75 ഓളം ജില്ലകളിൽ അവശ്യ സേവനങ്ങൾ ഒഴികെയുള്ള ഓഫീസുകൾ, പൊതുഗതാഗത സേവനങ്ങൾ, കടകൾ, വിപണികൾ എന്നിവ അടച്ചുപൂട്ടൽ സർക്കാർ നിർദ്ദേശിച്ചിരുന്നു. അവശ്യ സേവനങ്ങൾ ഒഴികെയുള്ളവ പരിപൂർണമായും അടച്ചിടണമെന്ന് ഇന്ത്യൻ മെഡിക്കൽ അസോസിയേഷനും ആവശ്യപ്പെട്ടിരുന്നു. പൊതുഗതാഗതങ്ങളുടെ നിയന്ത്രിത ഉപയോഗം, പല സംസ്ഥാനങ്ങളിലും സെക്ഷൻ 144 ഏർപ്പെടുത്തുക, രാജ്യത്തെ പ്രൊഫഷണലുകൾക്ക് നിർബന്ധിത വർക്ക് ഫ്രം ഹോം ഏർപ്പെടുത്തുക തുടങ്ങി വൈറസിന്റെ കമ്മ്യൂണിറ്റി വ്യാപനം തടയുന്നതിന് സർക്കാർ നിരവധി നടപടികൾ അവതരിപ്പിക്കുന്നുണ്ട്.

ഇന്ത്യയിലാകെ കൊറോണ വൈറസ് ബാധിതരുടെ എണ്ണം 400 കവിഞ്ഞു. കോവിഡ്-19 ബാധിച്ച് സംസ്ഥാനത്ത് മരിച്ചവരുടെ എണ്ണം ഏഴായി. മഹാരാഷ്ട്രയിലാണ് ഏറ്റവും കൂടുതൽ പേരെ കോവിഡ് 19 ബാധിച്ചിരിക്കുന്നത്. 67 പേർക്കാണ് മഹാരാഷ്ട്രയിൽ കോവിഡ് 19 സ്ഥിരീകരിച്ചിട്ടുള്ളത്. ഇതിൽ 64 പേർ ഇന്ത്യക്കാരാണ്. കേരളത്തിലും 67 പേർക്ക് കോവിഡ്-19 പോസിറ്റീവാണെന്ന് സ്ഥിരീകരിച്ചിട്ടുണ്ട്. മഹാരാഷ്ട്രയും കേരളവും കഴിഞ്ഞാൽ ഏറ്റവും കൂടുതൽ കോവിഡ്-19 കേസുകൾ റിപ്പോർട്ട് ചെയ്തിരിക്കുന്നത് ഡൽഹിയിലാണ്. 29 കേസുകളാണ് ഡൽഹിയിൽ നിന്ന് റിപ്പോർട്ട് ചെയ്തിരിക്കുന്നത്. ഉത്തർപ്രദേശ്, രാജസ്ഥാൻ എന്നീ സംസ്ഥാനങ്ങളിൽ യഥാക്രമം 28, 27 കേസുകളാണ് റിപ്പോർട്ട് ചെയ്തത്. തെലങ്കാനയിലും കർണാടകയിലും 26 കോവിഡ് 19 പോസിറ്റീവ് കേസുകളും പഞ്ചാബിൽ 21 പോസിറ്റീവ് കേസുകളും റിപ്പോർട്ട് ചെയ്തു.