പുതിയ പ്രീമിയം കളക്ഷനിൽ എക്കാലത്തേയും ഉയർന്ന വരുമാനവുമായി എൽഐസി

ദില്ലി: പ്രീമിയം കളക്ഷനില്‍ ചരിത്ര നേട്ടവുമായി ലൈഫ് ഇന്‍ഷുറന്‍സ് കോര്‍പ്പറേഷന്‍ ഓഫ് ഇന്ത്യ. മാര്‍ച്ചില്‍ അവസാനിച്ച 2020-21 സാമ്പത്തിക വര്‍ഷത്തില്‍ 1.84 ലക്ഷം കോടി രൂപയുടെ പ്രീമിയമാണ് എല്‍ഐസിയില്‍ എത്തിയത്. എല്‍ഐസി പ്രീമിയം കളക്ഷനില്‍ എക്കാലത്തെയും ഉയര്‍ന്ന തുകയാണിത്.

2019-20 സാമ്പത്തിക വര്‍ഷത്തില്‍ നേടിയ 1.77 ലക്ഷം കോടിയില്‍ നിന്നുമാണ് 2020-21 വര്‍ഷത്തില്‍ 1.84 ലക്ഷം കോടി രൂപയുടെ പുതിയ ബിസിനസ്സ് അഥവാ ഒന്നാം വർഷ പ്രീമിയം വളര്‍ച്ച നേടിയതെന്ന് എല്‍ഐസി പുറത്തുവിട്ട കണക്കുകള്‍ പറയുന്നു. 1.34 ലക്ഷം കോടി രൂപ നഷ്ടപരിഹാരമായും പോളിസി ഉടമകള്‍ക്ക് എല്‍ഐസി കഴിഞ്ഞ വര്‍ഷം നല്കി.

കഴിഞ്ഞ സാമ്പത്തിക വർഷം 564 ബില്യൺ രൂപയുടെ പുതിയ പ്രീമിയമാണ് ഐല്‍ഐസി നേടിയത്. ഇന്‍ഷുറന്‍സ് വിപണിയുടെ 66.18 ശതമാനം നേടിയതായി അവകാശപ്പെട്ട എല്‍ഐസി 2.10 കോടി പോളിസികൾ ആണ് വിറ്റത്. കഴിഞ്ഞ വർഷം പെൻഷൻ, ഗ്രൂപ്പ് ഇൻഷുറൻസ് പദ്ധതികൾ പ്രകാരം എല്‍ഐസിക്ക് 1.27 ലക്ഷം കോടിയാണ് ലഭിച്ചത്. എന്നാല്‍ കഴിഞ്ഞ വര്‍ഷത്തെ ആകെ പ്രീമിയമോ തുകയോ പുതുക്കിയ പ്രീമിയമോ സംബന്ധിച്ച വിവരങ്ങള്‍ കമ്പനി പുറത്തുവിട്ടിട്ടില്ല.

കഴിഞ്ഞ സാമ്പത്തിക വര്‍ഷത്തില്‍ മാത്രം 345,469 പേരെയാണ് ഇന്‍ഷുറന്‍സ് ഏജന്‍റുമാരായി എല്‍ഐസി ചേര്‍ത്തത്, ഇതോടെ ഇവരുടെ ആകെ ഏജന്‍റുമാരുടെ എണ്ണം 13.53 ലക്ഷം ആയി.

181 ബില്യൺ രൂപയുടെ 9.59 ലക്ഷം മരണ ക്ലെയിമുകളും എൽഐസി തീർപ്പാക്കി. 2021 മാർച്ചിൽ വരാനിരിക്കുന്ന ആന്വിറ്റി പേയ്‌മെന്റുകളും നിശ്ചിത തീയതികളിൽ തീർപ്പാക്കിയതായും ഐല്‍ഐസി പുറത്തുവിട്ട കണക്കുകളില്‍ പറയുന്നു.