പാചകവാതക വില വീണ്ടും കൂട്ടി; ഗാര്‍ഹിക സിലിണ്ടറിന് 25 രൂപ വര്‍ധിച്ചു

കൊച്ചി: പാചകവാതക സിലിണ്ടറിന് വീണ്ടും വില കൂടി. ഗാര്‍ഹിക ആവശ്യങ്ങള്‍ക്കായുള്ള സിലിണ്ടറിന് 25 രൂപയാണ് എണ്ണക്കമ്പനികള്‍ വര്‍ധിപ്പിച്ചത്. ഇതോടെ ഗാര്‍ഹിക സിലിണ്ടറിന് സംസ്ഥാനത്ത് 826 രൂപയായി. വാണിജ്യ ആവശ്യങ്ങള്‍ക്കായുള്ള സിലിണ്ടറിന്റെയും വില വര്‍ധിപ്പിച്ചിട്ടുണ്ട്. 100 രൂപയാണ് വാണിജ്യ സിലിണ്ടറുകള്‍ക്ക് കൂടിയത്. ഈ സാഹചര്യത്തില്‍ 1,618 രൂപയാണ് വാണിജ്യ സിലിണ്ടറിന് ഇപ്പോള്‍ വില. വിലവര്‍ധനവ് ഇന്ന് മുതല്‍ പ്രാബല്യത്തില്‍ വന്നു. നേരത്തെ, മൂന്നു ദിവസം മുന്‍പാണ് ഗാര്‍ഹിക സിലിണ്ടറുകള്‍ക്ക് 25 രൂപ കമ്പനികള്‍ കൂട്ടിയത്.

ഫെബ്രുവരിയില്‍ മാത്രം പാചകവാതക സിലിണ്ടറുകള്‍ക്ക് നാലു തവണകളിലായി 100 രൂപയോളം കൂടിയിരുന്നു. കഴിഞ്ഞവര്‍ഷം ഡിസംബര്‍ മുതലാണ് രാജ്യത്ത് പാചകവാതക സിലിണ്ടറുകള്‍ക്ക് വില കൂടാന്‍ തുടങ്ങിയത്. ഡിസംബറില്‍ രണ്ടു തവണ ഗാര്‍ഹിക സിലിണ്ടറുകള്‍ക്ക് വില വര്‍ധിച്ചു. ഡിസംബര്‍ ഒന്നിന് 594 രൂപയില്‍ നിന്നും 644 രൂപയായി സിലിണ്ടറുകള്‍ക്ക് വില കൂടി. ഡിസംബര്‍ 15 -ന് വീണ്ടും വിലവര്‍ധനവുമായി കമ്പനികള്‍ രംഗത്തെത്തി. ഇതോടെ ഗാര്‍ഹിക സിലിണ്ടറുകളുടെ വില 694 രൂപയായി. അതായത് ഡിസംബറില്‍ 100 രൂപയാണ് ഗാര്‍ഹിക സിലിണ്ടറുകള്‍ക്ക് വില കൂടിയത്.

ജനുവരിയില്‍ വില വര്‍ധനവുണ്ടായില്ല. ഫെബ്രുവരി നാലാം തീയതിയാണ് വീണ്ടും നിരക്ക് ഉയരുന്നത്. ആദ്യതവണ വില വര്‍ധിച്ചപ്പോള്‍ സിലിണ്ടറിന് വില 719 രൂപയിലെത്തി. ഫെബ്രുവരിയില്‍ വീണ്ടും മൂന്നു തവണ ഗാര്‍ഹിക സിലിണ്ടറുകള്‍ക്ക് വില കൂടി. ഏറ്റവുമൊടുവില്‍ ഫെബ്രുവരി 25 -ന് 25 രൂപ കൂടി വര്‍ധിച്ചതോടെ 801 രൂപയായി ഗാര്‍ഹിക സിലിണ്ടറുകളുടെ വിലനിലവാരം. ഇപ്പോള്‍ വീണ്ടും 25 രൂപയാണ് സിലിണ്ടറുകള്‍ക്ക് വില വര്‍ധിച്ചിരിക്കുന്നത്. ആഗോള വിപണിയില്‍ അസംസ്‌കൃത എണ്ണയ്ക്കും പ്രകൃതി വാതകത്തിനും വില ഉയരുന്നത് വിലക്കയറ്റത്തിന് കാരണമായി എണ്ണക്കമ്പനികള്‍ ചൂണ്ടിക്കാട്ടുന്നു.

ഒരറ്റത്ത് പെട്രോള്‍, ഡീസല്‍ വിലയും മറുഭാഗത്ത് പാചകവാതക വിലയും കുതിച്ചുയരുന്നത് രാജ്യത്തെ ജനങ്ങളെ ആശങ്കയിലാഴ്ത്തുന്നുണ്ട്. സംസ്ഥാനത്ത് ഇന്ന് ഇന്ധനവില കൂടിയില്ലെങ്കിലും നിലവില്‍ പെട്രോളിന് 93 രൂപ വരെ വില ഉയര്‍ന്നത് കാണാം. തിരുവനന്തപുരത്ത് പെട്രോള്‍ വില 93.08 രൂപ തൊട്ടു. ഡീസല്‍ വില 87.60 രൂപ. കൊച്ചിയില്‍ ലീറ്ററിന് 91.44 രൂപയാണ് പെട്രോള്‍ വില. ഡീസല്‍ വില 86.02 രൂപ.