എല്‍പിജി ക്ഷാമം: ബെംഗളൂരുവില്‍ സിലിണ്ടര്‍ മോഷണം പെരുകുന്നു, മലയാളികള്‍ ജാഗ്രതൈ!

എല്‍പിജി പ്രതിസന്ധിയുടെ ആഴം വ്യക്തമാക്കുന്ന റിപ്പോര്‍ട്ടാണ് ഇപ്പോള്‍ പുറത്തുവരുന്നത്. ബെംഗളൂരുവിലെ ചന്നപ്പട്ടണയില്‍ ഗ്യാസ് സിലിണ്ടര്‍ മോഷണം പോയി.

കൃഷ്ണപ്പയെന്നയാളുടെ വീട്ടുമുറ്റത്ത് വെച്ചിരുന്ന പാചക ഗ്യാസ് സിലിണ്ടറാണ് രാത്രി വൈകിയ വേളയില്‍ മോഷ്ടിക്കപ്പെട്ടത്.

പഴയ സിലിണ്ടര്‍ മാറ്റി പുതിയത് ഘടിപ്പിക്കാന്‍ നോക്കുമ്പോഴാണ് വീട്ടുകാര്‍ സംഭവമറിയുന്നത്.
സിസിടിവി പരിശോധിച്ചപ്പോള്‍ രണ്ട് യുവാക്കള്‍ സ്‌കൂട്ടറില്‍ എത്തി സിലിണ്ടര്‍ കടത്തുന്നു.

ഇവരിക്കാര്യം ഉടന്‍ പോലീസിനെ അറിയിച്ചു.ഗ്യാസ് സൂക്ഷിച്ചുപയോഗിക്കുന്നതിനോടൊപ്പം ഗ്യാസ് സിലിണ്ടര്‍ കൂടി സൂക്ഷിക്കേണ്ട ഗതികേടിലാണ് ഇപ്പോള്‍ വീട്ടുകാര്‍.

എല്‍പിജി പ്രതിസന്ധി

പാചകവാതക ലഭ്യതയെക്കുറിച്ചുള്ള ആശങ്കകള്‍ മുറുകുന്നതിനിടെയാണ് സംഭവം.പശ്ചിമേഷ്യയില്‍ യുദ്ധം രൂക്ഷമാകുന്നതും ഹോര്‍മുസ് കടലിടുക്ക് വഴി കപ്പല്‍ ഗതാഗതം തടസ്സപ്പെട്ടതുമാണ് ആശങ്കയ്ക്ക് അടിസ്ഥാനം. ഇന്ത്യയുടെ പ്രധാന ഊര്‍ജ്ജ സ്രോതസ്സാണ് പശ്ചിമേഷ്യ.

ഇവിടെ നിന്നും എണ്ണ, പാചകവാതകം വരുന്ന ഹോര്‍മുസ് കടലിടുക്കാണ് ഇപ്പോള്‍ തടസ്സപ്പെട്ടിരിക്കുന്നത്. പ്രധാന എല്‍പിജി ദാതാക്കളായ ഖത്തര്‍ വിതരണം നിര്‍ത്തുകയും ചെയ്തു. ഇതോടെ വിതരണക്കാരും ഉപഭോക്താക്കളും ആശങ്കയിലായി.

ബെംഗളൂരു പോലെ പല നഗരങ്ങളിലും ഹോട്ടലുകള്‍ പ്രവര്‍ത്തനം നിര്‍ത്തിയതായി
റിപ്പോര്‍ട്ടുണ്ട്. ഇന്‍ഡക്ഷന്‍ കുക്കറുള്‍പ്പടെയുള്ള ഇതര മാര്‍ഗ്ഗങ്ങളേയാണ് വീട്ടമ്മമാര്‍ ഇപ്പോള്‍ ആശ്രയിക്കുന്നത്.

പാചകവാതകം ഉറപ്പുവരുത്തുമെന്നും പാനിക്ക് ബുക്കിംഗ് വേണ്ടെന്നും അധികൃതര്‍ പറഞ്ഞു.