കാനഡ പ്രധാനമന്ത്രി ഇന്ത്യയിലേക്ക്, വ്യാപാരം, എഐ മേഖലകളിൽ സഹകരണം, പ്രതീക്ഷയോടെ നിക്ഷേപകർ

കനേഡിയൻ പ്രധാനമന്ത്രി മാർക്ക് കാർണി ഫെബ്രുവരി 26-ന് ഇന്ത്യയിലെത്തും. പ്രതിരോധം, ഊർജ്ജം, കൃത്രിമബുദ്ധി എന്നിവയുൾപ്പെടെയുള്ള പ്രധാന മേഖലകളിൽ ഉഭയകക്ഷി ബന്ധങ്ങൾ ശക്തമാക്കുക എന്നതാണ് ഔദ്യോഗിക സന്ദർശനത്തിന്‍റെ ലക്ഷ്യം. കനേഡിയൻ പ്രധാനമന്ത്രി ആദ്യം മുംബൈ സന്ദർശിക്കുകയും തുടർന്ന് ന്യൂഡൽഹിയിലേക്ക് പോകുകയും അവിടെ പ്രധാനമന്ത്രി നരേന്ദ്ര മോദിയുമായി ഉന്നതതല യോഗം നടത്തുകയും ചെയ്യും. വ്യാപാരം, ഊർജ്ജം, സാങ്കേതികവിദ്യ, എഐ, പ്രതിരോധം തുടങ്ങിയ മേഖലകളിൽ പുതിയ പങ്കാളിത്തങ്ങളിലൂടെ കാനഡ-ഇന്ത്യ ബന്ധം ഉയർത്തുന്നതിലും വികസിപ്പിക്കുന്നതിലും നേതാക്കൾ ശ്രദ്ധ കേന്ദ്രീകരിക്കുമെന്ന് മാർക്ക് കാർണിയുടെ ഓഫീസ് പുറത്തിറക്കിയ കുറിപ്പിൽ പറയുന്നു.

വ്യാപാര ലക്ഷ്യങ്ങൾ

സുപ്രധാന സാമ്പത്തിക സഹകരണത്തിന്റെ പശ്ചാത്തലത്തിലാണ് കനേഡിയൻ പ്രധാനമന്ത്രി ഇന്ത്യയിലേക്കെത്തുന്നത്. ഇന്ത്യ കാനഡയുടെ ഏഴാമത്തെ വലിയ വ്യാപാര പങ്കാളിയാണ്. 30.8 ബില്യൺ യുഎസ് ഡോളറാണ് ഇരു രാജ്യങ്ങളുടേയും വ്യാപാരം. 2030 ആകുമ്പോഴേക്കും ഉഭയകക്ഷി വ്യാപാരം ഇരട്ടിയിലധികം വർദ്ധിപ്പിച്ച് 70 ബില്യൺ ഡോളറായി ഉയർത്തുക എന്നതാണ് ലക്ഷ്യം.

ഖാലിസ്ഥാൻ വിഘടനവാദി ഹർദീപ് സിംഗ് നിജ്ജാറിന്റെ കൊലപാതകത്തിൽ ഇന്ത്യയ്ക്ക് പങ്കുണ്ടെന്ന് അന്നത്തെ പ്രധാനമന്ത്രി ജസ്റ്റിൻ ട്രൂഡോ ആരോപിച്ചതിനെത്തുടർന്ന് ഇരു രാജ്യങ്ങളും തമ്മിലുള്ള നയതന്ത്ര ബന്ധത്തിൽ വിള്ളലുണ്ടായിരുന്നു. 2024 ഒക്ടോബറിൽ നയതന്ത്ര തർക്കം രൂക്ഷമായതിന് പിന്നാലെ ഇരു രാജ്യങ്ങളും ഹൈക്കമ്മീഷണർമാരെയും നയതന്ത്രജ്ഞരെയും തിരിച്ചുവിളിച്ചിരുന്നു. എന്നാൽ 2025 ഏപ്രിലിൽ നടന്ന പാർലമെന്റ് തിരഞ്ഞെടുപ്പിൽ ലിബറൽ പാർട്ടി നേതാവ് കാർണി വിജയിച്ചതിനുശേഷം രാഷ്ട്രീയ ഭൂപ്രകൃതി മാറി. അതിന് പിന്നാലെ രണ്ട് രാജ്യങ്ങളും അവരവരുടെ ഹൈക്കമ്മീഷണർമാരെ പുനഃസ്ഥാപിച്ചു.

കാർണിക്കൊപ്പം ആനന്ദ് എത്തും

പ്രധാനമന്ത്രി മാർക്ക് കാർണിയുടെ ഇന്ത്യാ സന്ദർശനത്തിൽ താനും അദ്ദേഹത്തോടൊപ്പം ഉണ്ടാകുമെന്ന് കനേഡിയൻ വിദേശകാര്യ മന്ത്രി അനിത ആനന്ദ് തിങ്കളാഴ്ച പറഞ്ഞു. ഇരു രാജ്യങ്ങളും വ്യാപാരം കൂടുതൽ വൈവിധ്യവൽക്കരിക്കുമെന്നും കൂടുതൽ അവസരങ്ങൾ തുറക്കുമെന്നും അവർ പറഞ്ഞു.

"കനേഡിയൻ സമ്പദ്‌വ്യവസ്ഥയുടെ എല്ലാ മേഖലകളെയും ഉയർത്തിക്കൊണ്ടും നമ്മുടെ ജനങ്ങൾ തമ്മിലുള്ള ബന്ധം മെച്ചപ്പെടുത്തുന്നതിലൂടെയും ഉൾപ്പെടെ, വ്യാപാരം കൂടുതൽ വൈവിധ്യവത്കരിക്കുന്നതിനും കനേഡിയൻമാർക്ക് കൂടുതൽ അവസരങ്ങൾ തുറക്കുന്നതിനുമായി ഞാൻ ഈ ആഴ്ച പ്രധാനമന്ത്രിയോടൊപ്പം ഇന്ത്യയിലേക്ക് പോകും ," അനിത ആനന്ദ് എക്‌സിലെ ഒരു പോസ്റ്റിൽ പറഞ്ഞു.

ന്യൂഡൽഹി-ഒട്ടാവ ബന്ധം ദൃഢമാക്കുക

കാനഡയും ഇന്ത്യയും തമ്മിലുള്ള ബന്ധത്തിൽ സമീപ മാസങ്ങളിൽ മാറ്റം വന്നിട്ടുണ്ടെന്ന് കാനഡയിലെ ഇന്ത്യൻ ഹൈക്കമ്മീഷണർ ദിനേശ് പട്‌നായിക് പറഞ്ഞു. ട്രൂഡോയുടെ നേതൃത്വത്തിൽ വഷളായിരുന്ന ന്യൂഡൽഹി-ഒട്ടാവ ബന്ധം ശക്തിപ്പെടുത്തുന്നതിന് സ്വീകരിച്ച എല്ലാ ഉഭയകക്ഷി നടപടികളിലും കാർണിയുടെ ഇന്ത്യാ സന്ദർശനം ഒരു മുദ്ര പതിപ്പിക്കുമെന്ന് അദ്ദേഹം കൂട്ടിച്ചേർത്തു. "കഴിഞ്ഞ കുറച്ച് മാസങ്ങളായി, പ്രത്യേകിച്ച് പ്രധാനമന്ത്രി മോദി ജി7 ഉച്ചകോടിയിൽ പങ്കെടുക്കാൻ കാനഡ സന്ദർശിച്ചതിനുശേഷം, കനേഡിയൻ ബന്ധങ്ങളിൽ മാറ്റം വന്നിട്ടുണ്ട് . കഴിഞ്ഞ നാലോ അഞ്ചോ മാസമായി, ബന്ധം മുമ്പത്തെപ്പോലെ പുനഃസ്ഥാപിക്കുന്നതിനായി ഞങ്ങൾ വളരെയധികം പരിശ്രമിച്ചുവരികയാണ്... ബന്ധം ദൃഢമാക്കുന്നതിനും അടുത്ത ഘട്ടത്തിലേക്ക് കൊണ്ടുപോകുന്നതിനുമായി നടന്ന എല്ലാ പ്രവർത്തനങ്ങളിലും ഈ സന്ദർശനം ഒരു മുദ്ര പതിപ്പിക്കും," പട്നായിക് വാർത്താ ഏജൻസിയായ എഎൻഐയോട് പറഞ്ഞു.