ദില്ലി: ലോക്ഡൗണ് കാലത്ത് പിടിച്ച് നിന്നെങ്കിലും ഇന്ത്യയിലെ ഏറ്റവും വലിയ കാര് നിര്മാതാക്കളായ മാരുതി സുസുക്കി കാറുകളുടെ വില കൂട്ടുന്നു. 34000 രൂപ വരെയാണ് കാറുകളുടെ വില വര്ധിപ്പിച്ചത്. ഇത് ദില്ലിയിലെ എക്സ്ഷോറൂം നിരക്കുകളാണ്. വിവിധ സംസ്ഥാനങ്ങളില് തുക ഇനിയും കൂടാം. ഇന്ന് മുതല് എല്ലായിടത്തും വിലവര്ധന നിലവില് വരും. നിര്മാണ ഉല്പ്പന്നങ്ങളുടെ വിലയില് വന്ന വര്ധനവ് കാരണം വില കൂട്ടാന് നിര്ബന്ധിതരായെന്നാണ് മാരുതി നല്കുന്ന വിശദീകരണം.
കൊവിഡ് കാലത്ത് ഏറ്റവും നേട്ടമുണ്ടാക്കിയ കാര് കമ്പനികളിലൊന്നാണ് മാരുതി. എന്നാല് സ്റ്റീലിനും റോ മെറ്റീരിയലിനും വില കുത്തനെ വര്ധിച്ചത് മാരുതിയെയും ബാധിക്കുകയായിരുന്നു. ഇതോടെ കാര് വില കൂട്ടാനുള്ള തീരുമാനത്തിലേക്ക് മാരുതി നീങ്ങുകയായിരുന്നു. ആള്ട്ടോക്ക് ഒമ്പതിനായിരം രൂപ വരെയാണ് വര്ധിപ്പിച്ചത്. എസ്പ്രസ്സോയ്ക്ക് ഏഴായിരം രൂപ വര്ധിച്ചു. അതേസമയം ബലേനോയാണ് കൂട്ടത്തിലെ ഏറ്റവും ഉയര്ന്ന വര്ധന. 19400 രൂപയാണ് വര്ധിച്ചത്.
വാഗണ് ആറിന് 2500 രൂപ മുതല് 18200 വരെയാണ് കൂടിയത്. ബ്രെസയ്ക്ക് പതിനായിരം രൂപയാണ് കൂടിയത്. സെലെറിയോയ്ക്ക് 14400 രൂപ വരെ വര്ധിച്ചു. ഉത്സവ സീസണില് നേട്ടമുണ്ടാക്കിയ മാരുതിക്ക് വില കൂട്ടിയ സാഹചര്യത്തില് അത് ആവര്ത്തിക്കാനാവുമെന്ന് കരുതുന്നില്ല. സാധാരണക്കാരുടെ വാഹനമായി അറിയപ്പെടുന്ന മാരുതിക്ക് വില കൂട്ടിയത് തിരിച്ചടിയാവാനും സാധ്യതയുണ്ട്. അതേസമയം 1553 കോടിയുടെ ലാഭമാണ് ഈ സാത്തിക വര്ഷം മാരുതി പ്രതീക്ഷിക്കുന്നത്. പക്ഷേ ഇത് കഴിഞ്ഞ വര്ഷത്തെ അപേക്ഷിച്ച് കുറവാണ്.
ഓരോ സാമ്പത്തിക പാദവും വെച്ച് താരതമ്യം ചെയ്യുമ്പോള് വളര്ച്ചാ നിരക്ക് കൂടുതലാണ്. അതേസമയം വില്പ്പനയിലും വര്ധനവുണ്ട്. 2020 ഡിസംബറില് വില്പ്പന 1,60226 ആയി ഉയര്ന്നിരുന്നു. 20.2 ശതമാനത്തിന്റെ വര്ധനവാണ് ഉണ്ടായത്. ആഭ്യന്തര വില്പ്പനയില് 17.8 ശതമാനത്തിന്റെ വര്ധനവും രേഖപ്പെടുത്തി. ആള്ട്ടോയും എസ്പ്രസോയുമാണ് ഏറ്റവുമധികം വിറ്റുപോയത്.