മൈക്രോസോഫ്റ്റ് വീണ്ടും ജീവനക്കാരെ പിരിച്ചുവിടാൻ ഒരുങ്ങുന്നു, ഇത്തവണ 9,000 പേർക്ക് ജോലി നഷ്ടമാവും

മൈക്രോസോഫ്റ്റ് വീണ്ടും കൂട്ട പിരിച്ചുവിടലിന് ഒരുങ്ങുന്നതായി റിപ്പോർട്ടുകൾ. ഇത്തവണ, ഏകദേശം 9,000 ജീവനക്കാരെ പിരിച്ചുവിടാൻ സാധ്യതയുണ്ടെന്ന് അടുത്ത വൃത്തങ്ങൾ സൂചിപ്പിക്കുന്നു. 2025 മെയ് മുതൽ ജൂൺ വരെയുള്ള മാസങ്ങളിൽ വിവിധ ടീമുകളിൽ നിന്നായി 6,300 ജീവനക്കാരെ പിരിച്ചുവിട്ടതിന് പിന്നാലെയാണ് ഈ നീക്കം. ഈ വർഷം മൈക്രോസോഫ്റ്റ് നടത്തുന്ന നാലാമത്തെ പിരിച്ചുവിടൽ നടപടിയാണിത്.

മൈക്രോസോഫ്റ്റ് പിരിച്ചുവിടൽ

ഏകദേശം 9,000 ജീവനക്കാരെ മൈക്രോസോഫ്റ്റ് പിരിച്ചുവിടുമെന്ന് സിഎൻബിസിക്ക് നൽകിയ അഭിമുഖത്തിൽ ഒരു ജീവനക്കാരൻ സൂചിപ്പിച്ചു. ഇത് വിവിധ ടീമുകളിലെയും ഭൂമിശാസ്ത്രപരമായ മേഖലകളിലെയും വൈവിധ്യമാർന്ന തൊഴിൽ പരിചയമുള്ള ജീവനക്കാരെ ബാധിക്കും. റെഡ്‌മണ്ട്, വാഷിംഗ്ടൺ ആസ്ഥാനമായുള്ള കമ്പനിയിലെ എക്സിക്യൂട്ടീവുകൾ സാധാരണയായി പുതിയ സാമ്പത്തിക വർഷത്തിന്റെ തുടക്കത്തിൽ പുനഃസംഘടന പ്രഖ്യാപിക്കാറുണ്ട്. മൈക്രോസോഫ്റ്റിന്റെ 2026 സാമ്പത്തിക വർഷത്തിന്റെ രണ്ടാം ദിവസമാണ് ഈ പ്രഖ്യാപനം വരുന്നത്.

ഈ വർഷം ജൂണിൽ മൈക്രോസോഫ്റ്റ് 300 ജീവനക്കാരെ പിരിച്ചുവിട്ടിരുന്നു. ഇതിനു മുൻപ് 2025 മെയ് മാസത്തിൽ ആദ്യഘട്ട പിരിച്ചുവിടലിൽ 6,000 ആളുകളെയാണ് കമ്പനി ഒഴിവാക്കിയത്. ഇത് മൊത്തം ജീവനക്കാരുടെ 3% ആയിരുന്നു. ഇതിനുപുറമെ, ജനുവരി മാസത്തിലും ചെറിയ തോതിലുള്ള പിരിച്ചുവിടൽ നടന്നിരുന്നു. 2023-ൽ 10,000 ജീവനക്കാരെ പിരിച്ചുവിട്ടതിന് ശേഷമുള്ള ഏറ്റവും വലിയ പിരിച്ചുവിടൽ നടപടിയാണിത്.

കൂടാതെ, മൈക്രോസോഫ്റ്റ് പിന്തുണയുള്ള എക്സ്ബോക്സ് സിഇഒ ഫിൽ സ്പെൻസറുടെ ജീവനക്കാർക്കുള്ള ഇമെയിൽ വൈറലായി. ഇത് ഗെയിമിംഗ് ആരാധകരിൽ നിന്നും മറ്റും കടുത്ത വിമർശനത്തിന് ഇടയാക്കിയിട്ടുണ്ട്. എല്ലാ മൈക്രോസോഫ്റ്റ് ഗെയിമിംഗ് ജീവനക്കാർക്കും ഈ-മെയിൽ അയച്ചിരുന്നു. ഒരു അജ്ഞാത ഉറവിടം ഇത് വിൻഡോസ് സെൻട്രലിന് കൈമാറി.

ഫിൽ സ്പെൻസറുടെ വാക്കുകൾ ഇങ്ങനെ: "ഞങ്ങളുടെ സ്ഥാപനത്തിലെ സഹപ്രവർത്തകരെ ബാധിക്കുന്ന ചില തീരുമാനങ്ങൾ ഇന്ന് ഞങ്ങൾ പങ്കുവെക്കുകയാണ്. ഗെയിമിംഗിനെ സുസ്ഥിരമായ വിജയത്തിലേക്ക് നയിക്കാനും തന്ത്രപരമായ വളർച്ചാ മേഖലകളിൽ ശ്രദ്ധ കേന്ദ്രീകരിക്കാനും, ചില ബിസിനസ്സ് മേഖലകളിൽ ഞങ്ങൾ അവസാനിപ്പിക്കുകയോ, പ്രവർത്തനങ്ങൾ കുറയ്ക്കുകയോ ചെയ്യും. മൈക്രോസോഫ്റ്റിൻ്റെ രീതി പിന്തുടർന്ന് കാര്യക്ഷമത വർദ്ധിപ്പിക്കുന്നതിന് മാനേജ്മെൻ്റ് തലത്തിലുള്ള ആളുകളെ ഞങ്ങൾ ഒഴിവാക്കും."

സ്ഥാപനത്തിന്റെ ദീർഘകാല വിജയത്തിന് ഇത്തരം മാറ്റങ്ങൾ അനിവാര്യമാണെന്ന് മൈക്രോസോഫ്റ്റ് നേരത്തെ പ്രസ്താവിച്ചിട്ടുണ്ട്. ചില പ്രോജക്ടുകളിലെ കോഡിംഗിന്റെ 20-30% വരെ ഇതിനോടകം AI സോഫ്റ്റ്‌വെയർ ചെയ്യുന്നതായും സിഇഒ സത്യ നാദെല്ല അഭിപ്രായപ്പെട്ടു.

ഏപ്രിൽ 30-ന് നാദെല്ല പറഞ്ഞതിങ്ങനെ: "എല്ലാ ബിസിനസ്സുകൾക്കും ഉൽപ്പാദനം വർദ്ധിപ്പിക്കാനും, ചിലവ് കുറയ്ക്കാനും, വളർച്ച ത്വരിതപ്പെടുത്താനും ക്ലൗഡും എഐയും അത്യാവശ്യമാണ്."

വരുമാന വളർച്ച

ഈ വർഷം മൂന്നാം പാദത്തിൽ മൈക്രോസോഫ്റ്റ് 15% വരുമാന വളർച്ച നേടിയിരുന്നു. ഏകദേശം 70.1 ബില്യൺ ഡോളറാണ് വരുമാനം. അതുപോലെ, പ്രവർത്തന വരുമാനം 19% ഉയർന്ന് 32.0 ബില്യൺ ഡോളറായി. കൂടാതെ, അറ്റാദായം 25.8 ബില്യൺ ഡോളറായി ഉയർന്നു.

ഈ പാദത്തിൽ മൈക്ലോസോഫ്റ്റ് 365 കൊമേർഷ്യൽ ഉൽപ്പന്നങ്ങളുടെയും ക്ലൗഡ് സേവനങ്ങളുടെയും വരുമാനം 11% വർദ്ധിച്ചു. ഡയനാമിക്സ് ഉൽപന്നങ്ങളുടെയും ക്ലൗഡ് സേവനങ്ങളുടെയും വരുമാനം 11% വർധിച്ചു. സെർച്ച്, വാർത്തകളുടെ പരസ്യം എന്നിവയിൽ നിന്നുള്ള വരുമാനം 21% ഉയർന്നു.

2024 ജൂൺ അവസാനത്തോടെ മൈക്രോസോഫ്റ്റിന് 228,000 ജീവനക്കാരുണ്ടായിരുന്നു. ഈ വാർത്ത ആദ്യമായി റിപ്പോർട്ട് ചെയ്തത് 2025 ജൂലൈ 3-ന് ആയിരുന്നു.

ഈ പിരിച്ചുവിടൽ നടപടി കമ്പനിയുടെ വളർച്ച ലക്ഷ്യമിട്ടുള്ള പുനഃസംഘടനയുടെ ഭാഗമാണെന്നും, പുതിയ സാങ്കേതികവിദ്യകൾക്ക് പ്രാധാന്യം നൽകുന്നതിൻ്റെ ഭാഗമായി ചിലവ് ചുരുക്കാൻ ലക്ഷ്യമിട്ടുള്ളതാണെന്നും മൈക്രോസോഫ്റ്റ് വൃത്തങ്ങൾ സൂചിപ്പിക്കുന്നു.