കള്ളപ്പണം വെളുപ്പിക്കൽ: മുൻ ഐസിഐസിഐ ബാങ്ക് എംഡിയും സിഇഒയുമായ ചന്ദ കൊച്ചാറിന്റെ ഭർത്താവ് അറസ്റ്റിൽ

ഐസിഐസിഐ ബാങ്ക്-വീഡിയോകോൺ കേസുമായി ബന്ധപ്പെട്ട് മുൻ ഐസിഐസിഐ ബാങ്ക് എംഡിയും സിഇഒയുമായ ചന്ദാ കൊച്ചാറിന്റെ ഭർത്താവ് ദീപക് കൊച്ചാറിനെ തിങ്കളാഴ്ച എൻഫോഴ്സ്മെന്റ് ഡയറക്ടറേറ്റ് അറസ്റ്റ് ചെയ്തു. ഈ വർഷം ജനുവരിയിൽ എൻഫോഴ്സ്മെന്റ് ഡയറക്ടറേറ്റ് ചന്ദ കൊച്ചാറിന്റെയും കുടുംബത്തിന്റെയും സ്വത്തുക്കൾ കണ്ടുകെട്ടിയിരുന്നു.

സ്വത്തുക്കൾ കണ്ടുകെട്ടി

78 കോടി രൂപയുടെ മൊത്തം ആസ്തി ഇഡി കണ്ടുകെട്ടിയിരുന്നു. മുംബൈയിലെ ചന്ദാ കൊച്ചാറിന്റെ ഫ്ലാറ്റും ഭർത്താവ് ദീപക് കൊച്ചാറിന്റെ കമ്പനിയിലുള്ള മറ്റ് ചില സ്വത്തുക്കളും ഇതിൽ ഉൾപ്പെടുന്നു. കഴിഞ്ഞ വർഷം ഫെബ്രുവരിയിൽ വീഡിയോകോൺ ചെയർമാൻ വേണുഗോപാൽ ധൂത്, ചന്ദ കൊച്ചാർ, ഭർത്താവ് ദീപക് കൊച്ചാർ എന്നിവർക്കെതിരേ ഇഡി ക്രിമിനൽ കേസ് രജിസ്റ്റർ ചെയ്തിരുന്നു. വായ്പാ ഇടപാടിൽ ആരോപണവിധേയരായ ഇവർ അനധികൃതമായി സ്വത്ത് സമ്പാദിക്കാൻ കള്ളപ്പണം വെളുപ്പിച്ചിട്ടുണ്ടോയെന്നും കണ്ടെത്താൻ കേസിൽ അന്വേഷണം ആരംഭിച്ചു.

മറ്റ് അന്വേഷണങ്ങൾ

ഇഡിയ്ക്ക് പുറമെ, ആദായനികുതി വകുപ്പ്, സെൻട്രൽ ബ്യൂറോ ഓഫ് ഇൻവെസ്റ്റിഗേഷൻ എന്നിവ ഉൾപ്പെടെ ഒന്നിലധികം റവന്യൂ, നിയമ നിർവഹണ ഏജൻസികൾ ഇവർക്കെതിരെ അന്വേഷണം ആരംഭിച്ചിരുന്നു. ദമ്പതികൾക്കും മറ്റ് ആറ് പേർക്കുമെതിരെ സിബിഐ രജിസ്റ്റർ ചെയ്ത എഫ്ഐആറിനെ അടിസ്ഥാനമാക്കിയാണ് ഇഡിയുടെ കള്ളപ്പണം വെളുപ്പിക്കൽ കേസ്.

ഐസിഐസിഐ ബാങ്ക് - വീഡിയോകോൺ കേസ്

2009 ജൂൺ മുതൽ 2011 ഒക്ടോബർ വരെ വീഡിയോകോൺ ഗ്രൂപ്പ് കമ്പനികൾക്ക് അനുവദിച്ച 1,875 കോടി രൂപയുടെ ആറ് വായ്പകളിലാണ് സിബിഐയുടെ കേസ് അന്വേഷണം നടക്കുന്നത്. ഈ സമയം ചന്ദ കൊച്ചാർ ഐസിഐസിഐ ബാങ്കിന്റെ തലപ്പത്തും അംഗീകാര സമിതിയിലെ പ്രധാന അംഗവുമായിരുന്നു. ബാങ്കിന്റെ മാനേജിംഗ് ഡയറക്ടറും സിഇഒ സ്ഥാനവും ഒഴിയുന്നതിനെ ചോദ്യം ചെയ്ത് ചന്ദ കൊച്ചാറിന്റെ അപേക്ഷ ഈ വർഷം മാർച്ചിൽ ബോംബെ ഹൈക്കോടതി തള്ളി.