മൂന്ന് ഓഹരികളില്‍ ബംപര്‍ നേട്ടം പ്രതീക്ഷിച്ച് മോതിലാല്‍ ഓസ്വാള്‍

വിപണിയില്‍ അനിശ്ചിതാവസ്ഥ പടരുമ്പോള്‍ നിക്ഷേപകര്‍ അസ്ഥിരതയെ ചെറുക്കുന്ന, മികച്ച വരുമാനവും ലാഭക്ഷമതയും പ്രകടിപ്പിക്കുന്ന ഓഹരികളെ തേടുന്നു. ഇവര്‍ക്കായി 3 ഓഹരികള്‍ റെക്കമന്റ് ചെയ്യുകയാണ് ആഭ്യന്തര ബ്രോക്കറേജ് സ്ഥാപനം മോതിലാല്‍ ഓസ്വാള്‍. 42 ശതമാനം വരെ നേട്ടമാണ് ഈ ഓഹരികളില്‍ നിന്നും പ്രതീക്ഷിക്കപ്പെടുന്നത്.

സെന്‍സാര്‍ ടെക്‌നോളജീസ്
1000 രൂപ ലക്ഷ്യവിലയില്‍ ഓഹരി വാങ്ങാന്‍ മോതിലാല്‍ ഓസ്വാള്‍ നിര്‍ദ്ദേശിച്ചു. നിലവിലെ വിലയെ അപേക്ഷിച്ച് 42 ശതമാനം വര്‍ദ്ധനവാണിത്. മൂന്നാംപാദത്തില്‍ പ്രതീക്ഷകള്‍ക്കനുസൃതമായി വരുമാനം രേഖപ്പെടുത്താന്‍ കമ്പനിയ്ക്കായി. ഇബിറ്റ മാര്‍ജിന്‍ (പ്രവര്‍ത്തന ലാഭക്ഷമതയുടെ അളവ് കോല്‍) 4.3 ശതമാനം പ്രതീക്ഷിച്ച സ്ഥാനത്ത് 16 ശതമാനമായി.വിദേശത്തെ സാന്നിധ്യം, കറന്‍സി ആനുകൂല്യം, കാര്യക്ഷമത എന്നീ ഘടകങ്ങളാണ് പ്രധാന ആകര്‍ഷണങ്ങള്‍. ലാഭം 179.8 കോടി രൂപ പ്രതീക്ഷിച്ച സ്ഥാനത്ത് 219.1 കോടി രൂപയാണ്.

അതുല്‍ ഓഹരി
ഈ കെമിക്കല്‍ ഓഹരി 7500 രൂപ ലക്ഷ്യവിലയില്‍ വാങ്ങാന്‍ ബ്രോക്കറേജ് നിര്‍ദ്ദേശിച്ചു. നിലവിലെ വിലയെ അപേക്ഷിച്ച് 29 ശതമാനം വര്‍ദ്ധനവ്. ഡിസംബര്‍ പാദത്തില്‍ 11 ശതമാനം വാര്‍ഷിക വരുമാന വളര്‍ച്ച റിപ്പോര്‍ട്ട് ചെയ്ത കമ്പനി ഇബിറ്റ വാര്‍ഷികാടിസ്ഥാനത്തില്‍ 29 ശതമാനവും നികുതിയ്ക്ക് ശേഷമുള്ള ലാഭം74 ശതമാനവുമുയര്‍ത്തി. 2026,2027,2028 സാമ്പത്തികവര്‍ഷങ്ങളില്‍ യഥാക്രമം 9 ശതമാനം, 5 ശതമാനം, 11 ശതമാനം എന്നിങ്ങനെ വരുമാന വളര്‍ച്ചപ്രതീക്ഷിക്കപ്പെടുന്നു.  2028 ല്‍ ഓഹരിയുടെ വില ഇപിഎസിന്റെ (ഏര്‍ണിംഗ് പര്‍ ഷെയര്‍) 25x ആകും.

ഗ്രാവിറ്റ ഇന്ത്യ
2030 രൂപ ലക്ഷ്യവിലയില്‍ ഗ്രാവിറ്റ ഇന്ത്യ ഓഹരി വാങ്ങാനാണ് നിര്‍ദ്ദേശം. നിലവിലെ വിലയില്‍ നിന്നും 31 ശതമാനം വളര്‍ച്ചയാണിത്. മൂന്നാംപാദത്തില്‍ കമ്പനി 2 ശതമാനം വരുമാന വളര്‍ച്ചയാണ് രേഖപ്പെടുത്തിയത്. ഇബിറ്റ 13.5 ശതമാനം ഉയര്‍ന്ന് 120 കോടി രൂപയായി. 2028 ല്‍ കമ്പനിയുടെ ഓഹരി വില ഇപിഎസിന്റെ (ഏര്‍ണിംഗ് പര്‍ ഷെയര്‍) 25 മടങ്ങാകുമെന്ന് ബ്രോക്കറേജ് പ്രതീക്ഷിക്കുന്നു.