മുകേഷ് അംബാനിയുടെ ആസ്തിയിൽ 2 മാസത്തിനിടെ വൻ ഇടിവ്, ഇന്ത്യൻ കോടീശ്വരന്മാർ പട്ടികയിൽ നിന്ന് പുറത്ത്

ഇന്ത്യയിലെ ഏറ്റവും ധനികനായ മുകേഷ് അംബാനിയുടെ ആസ്തി രണ്ട് മാസത്തിനിടെ 28 ശതമാനം അഥവാ ഒരു ദിവസം 300 മില്യൺ യുഎസ് ഡോളർ വീതം കുറഞ്ഞു. മാർച്ച് 31 വരെ 48 ബില്യൺ യുഎസ് ഡോളറാണ് അദ്ദേഹത്തിന്റെ ആസ്തി. ഓഹരി വിപണിയിലുണ്ടായ വൻ ഇടിവാണ് ആസ്തിയിൽ കനത്ത നഷ്ടത്തിന് കാരണം. റിലയൻസ് ഇൻഡസ്ട്രീസിന്റെ ചെയർമാനും മാനേജിംഗ് ഡയറക്ടറുമായ മുകേഷ് അംബാനിയുടെ ആസ്തി ഫെബ്രുവരി-മാർച്ച് കാലയളവിൽ 19 ബില്യൺ യുഎസ് ഡോളർ കുറഞ്ഞു.

പിന്നിലേയ്ക്ക്

ആഗോള റാങ്കിംഗിൽ എട്ടാം സ്ഥാനത്ത് നിന്ന് ഇദ്ദേഹം 17-ാം സ്ഥാനത്തേക്ക് പിന്തള്ളപ്പെട്ടതായി ഹ്യൂറൻ ഗ്ലോബൽ റിച്ച് ലിസ്റ്റ് അറിയിച്ചു. 6 ബില്യൺ യുഎസ് ഡോളർ അല്ലെങ്കിൽ 37 ശതമാനം സമ്പത്ത് നഷ്ടപ്പെട്ട് ഗൌതം അദാനിയും 5 ബില്യൺ യുഎസ് ഡോളർ അല്ലെങ്കിൽ 26 ശതമാനം നഷ്ടം രേഖപ്പെടുത്തി എച്ച്സിഎൽ ടെക്നോളജീസിന്റെ ശിവ് നടാർ, 4 ബില്യൺ ഡോളർ അല്ലെങ്കിൽ 28 ശതമാനം നഷ്ടം രേഖപ്പെടുത്തി ഉദയ് കൊട്ടക് എന്നിവരും പട്ടികയിലുണ്ട്.

ഓഹരി വിപണിയിലെ നഷ്ടം

മുകളിൽ പറഞ്ഞ മൂന്ന് പേരും ആദ്യ 100 കോടീശ്വരന്മാരുടെ പട്ടികയിൽ നിന്ന് പുറത്തായി. അംബാനി മാത്രമാണ് ഈ പട്ടികയിലുള്ള ഏക ഇന്ത്യക്കാരൻ. കൊവിഡ് -19 മഹാമാരിയെ തുടർന്നുള്ള സാമ്പത്തിക പ്രതിസന്ധികൾക്കിടെ കഴിഞ്ഞ രണ്ട് മാസത്തിനുള്ളിൽ ഇന്ത്യൻ ഓഹരി വിപണി 25 ശതമാനം നഷ്ടത്തിലായി. ഡോളറിന് എതിരെ രൂപയുടെ മൂല്യത്തിൽ 5.2 ശതമാനം ഇടിവും രേഖപ്പെടുത്തി.

കനത്ത നഷ്ടം

ഇന്ത്യയിലെ മുൻനിര ബിസിനസുകാരനായ മുകേഷ് അംബാനിയ്ക്ക് പോലും ഓഹരി വിപണിയിൽ 26 ശതമാനം ഇടിവ് നേരിട്ടു. മുകേഷ് അംബാനിയെ സംബന്ധിച്ചിടത്തോളം ഇത് ഒരു കൊടുങ്കാറ്റാണ്. അദ്ദേഹത്തിന്റെ സമ്പത്തിന്റെ 28 ശതമാനമാണ് ഇതോടെ തുടച്ചു നീക്കപ്പെട്ടതെന്ന് ഹുറൻ റിപ്പോർട്ട് ഇന്ത്യ മാനേജിംഗ് ഡയറക്ടർ അനസ് റഹ്മാൻ പറഞ്ഞു. ഫ്രഞ്ച് ഫാഷൻ ഭീമനായ എൽ‌വി‌എം‌എച്ചിന്റെ ചീഫ് എക്സിക്യൂട്ടീവ് ബെർണാഡ് അർനോൾട്ടിന് ശേഷം ആഗോളതലത്തിൽ ഏറ്റവും കൂടുതൽ സമ്പത്ത് നഷ്ടപ്പെട്ട രണ്ടാമത്തെയാൾ അംബാനിയാണ്.

മറ്റ് ബിസിനസുകാർ

ബെർക്ക്‌ഷെയർ ഹാത്‌വേയുടെ ഉടമ വാറൻ ബഫെറ്റിനും കഴിഞ്ഞ രണ്ട് മാസത്തിനുള്ളിൽ 19 ബില്യൺ യുഎസ് ഡോളർ നഷ്ടമായി. ഇദ്ദേഹത്തിന്റെ ആസ്തി 19 ശതമാനം ഇടിഞ്ഞ് 83 ബില്യൺ ഡോളറായി. കൊറോണ മഹാമാരി കാരണം ഹോട്ടൽ വ്യവസായത്തിനേറ്റ കനത്ത പ്രഹരത്തെ തുടർന്ന് ഓയോ റൂംസ് സ്ഥാപകൻ റിതേഷ് അഗർവാൾ ശതകോടീശ്വര പട്ടികയിൽ നിന്ന് തന്നെ പുറത്തായി. സമ്പത്ത് നഷ്ടപ്പെടുന്നവരുടെ ആദ്യ 10 പട്ടികയിൽ കാർലോസ് സ്ലിം, കുടുംബം, ബിൽ ഗേറ്റ്സ്, മാർക്ക് സക്കർബർഗ്, ലാറി പേജ്, സെർജി ബ്രിൻ, മൈക്കൽ ബ്ലൂംബെർഗ് എന്നിവരും ഉൾപ്പെടുന്നു.

ഒന്നാം സ്ഥാനം

131 ബില്യൺ യുഎസ് ഡോളർ ആസ്തിയുള്ള ആമസോണിന്റെ ജെഫ് ബെസോസ് ലോകത്തിലെ ഏറ്റവും ധനികനായ വ്യക്തിയായി തുടരുന്നു, കഴിഞ്ഞ രണ്ട് മാസത്തിനിടെ ഇദ്ദേഹത്തിന്റെ ആസ്തിയിൽ 9 ശതമാനം മാത്രം കുറവാണ് ഉണ്ടായിരിക്കുന്നത്. 91 ബില്യൺ യുഎസ് ഡോളർ ആസ്തിയുമായി ബിൽ ഗേറ്റ്സ് ആണ് രണ്ടാം സ്ഥാനത്ത്. 14 ശതമാനമാണ് ഇദ്ദേഹത്തിന്റെ സമ്പത്തിൽ വന്ന കുറവ്. ചൈനീസ് ശതകോടീശ്വരന്മാർ കഴിഞ്ഞ രണ്ട് മാസത്തിനിടെ നേട്ടമുണ്ടാക്കിയ ചുരുക്കം ചിലരിൽ ഉൾപ്പെടുന്നു. ആദ്യ 100 പേരുടെ പട്ടികയിൽ നിന്ന് ഇന്ത്യക്ക് മൂന്ന് റാങ്കുകൾ നഷ്ടമായപ്പോൾ ചൈന ആറ് കോടീശ്വരന്മാരെ പുതുതായി പട്ടികയിൽ ചേർത്തു.