വീണ്ടും പുതിയ ഉയരങ്ങൾ കീഴടക്കി മുകേഷ് അംബാനി; ആസ്തിയിൽ 17,00കോടി ഡോളറിൻറെ വർധന

ഇന്ത്യയിലെ ഏറ്റവും വലിയ സമ്പന്നനും റിലയൻസ് ഇൻഡസ്ട്രീസ് മേധാവിയുമായ മുകേഷ് അംബാനിയുടെ സമ്പത്തിൽ ഈ വർഷം 17,00 കോടി ഡോളറിന്റെ വർധനവുണ്ടായി. 2019-ൽ മികേഷ് അംബാനിയുടെ റിലയൻസ് ഇൻഡസ്ട്രീസ് ലിമിറ്റഡിന്റെ ഓഹരി വിലയിൽ 40 ശതമാനമാണ് വർദ്ധനവുണ്ടായത്. റിലയന്‍സ് ഇന്‍ഡസ്ട്രീസിന്റെ ടെലികോം, റീട്ടെയ്ല്‍, പെട്രോ കെമിക്കല്‍ ബിസിനസ് എന്നിവയിൽ കൂടുതല്‍ നേട്ടങ്ങൾ കൈവരിച്ചതോടെ 2019-ല്‍ മുകേഷ് അംബാനി 17 ബില്യണ്‍ ഡോളറിലധികം സമ്പാദ്യമാണ് നേടിയത്.

ഇന്ത്യൻ സാമ്പത്തിക വ്യവസ്ഥ മോശം അവസ്ഥയിൽ തുടരുന്ന സാഹചര്യത്തിലും ഏഷ്യയിലെ ഏറ്റവും വലിയ കോടീശ്വരനായി മാറിയിരിക്കുകയാണ് ഇതോടെ മുകേഷ് അംബാനി. ബ്ലൂംബര്‍ഗ് ബില്ലേനിയേഴ്സ് ഇൻ‍ഡക്സ് റിപ്പോ‍ര്‍ട്ട് ചെയ്യുന്നത് പ്രകാരം അംബാനിയുടെ ആസ്തി നിലവിൽ 60.8 ബില്യണ്‍ ഡോളറായി ഉയര്‍ന്നു. ഏതാനും മാസങ്ങൾക്കുള്ളിൽ തന്നെ റിലയന്‍സ് ഒരു ബാധ്യതാ രഹിത കമ്പനിയായി മാറിയേക്കുമെന്നാണ് റിപ്പോര്‍ട്ടുകൾ പറയുന്നത്.

ടെലികോം, ഓയിൽ ആൻഡ് ഗ്യാസ്, റീട്ടെയ്ൽ തുടങ്ങിയ മേഖലകൾക്ക് പുറമേ ഇ-കൊമേഴ്സ് രംഗത്തേക്കും ചുവടു വയ്ക്കാനൊരുങ്ങുകയാണ് റിലയൻസ് ഇൻഡസ്ട്രീസ്. പുതിയ മേഖലകൾ കണ്ടെത്തി നിക്ഷേപം നടത്തുന്നത് റിലയൻസ് ഇൻഡസ്ട്രീസിന്റെ ആസ്‌തി ഭാവിയിൽ വീണ്ടും ഉയർത്താൻ സാധ്യതയുണ്ട്. അടുത്ത നാല് വർഷത്തിനുള്ളിൽ ഇത് ഓഹരി ഉടമകളുടെ മൂല്യം ഇരട്ടിയാക്കുമെന്നാണ് കരുതുന്നത്. നിലവിൽ റിലയന്‍സ് ഇന്‍ഡസ്ട്രീസിന്റെ വിപണി മൂല്യം ഏകദേശം 10 ലക്ഷം കോടി രൂപയാണ്.