1 ലക്ഷം 40 ലക്ഷമാക്കിയ ഓഹരി, ഇതാണ് ഇ.വി മേഖലയിലെ സൂപ്പർ സ്റ്റാർ, വിപണിയിലെ ഇടിവിലും കരുത്തൻ

ഓഹരി വിപണി ഹൃസ്വകാലത്തേക്ക് നഷ്ടം നൽകിയാലും ദീർഘകാലത്തേക്ക് നിക്ഷേപകർക്ക് മികച്ച ലാഭം നൽകാറുണ്ട്. അതിന്‍റെ ഏറ്റവും വലിയ ഉദാഹരണമാണ് മെർക്കുറി ഇവി-ടെക്ക് ഓഹരികൾ. കഴിഞ്ഞ അഞ്ച് വർഷത്തിനിടെ 8600 ശതമാനം വളർച്ചയാണ് ഓഹരി നേടിയത്. വ്യാഴാഴ്ച 2.8 ശതമാനം നേട്ടത്തോടെ വ്യാപാരം അവസാനിപ്പിക്കാനും മെർക്കുറി ഇവി-ടെക്ക് ഓഹരിക്ക് സാധിച്ചു. ട്രംപിന്‍റെ അധിക തീരുവയിൽ തട്ടി ഓഹരി സൂചികകൾ താഴേക്ക് വീഴുമ്പോഴാണ് മെർക്കുറി ഇവി-ടെക്ക് നേട്ടമുണ്ടാക്കുന്നത്. ഓഹരിയുടെ കൂടുതൽ വിശദാംശങ്ങൾ നമുക്ക് നോക്കിയാലോ..

മികച്ച വളർച്ച

2025 ഓഗസ്റ്റ് 28 ലെ കണക്കനുസരിച്ച് മെർക്കുറി ഇവി-ടെക്കിന്‍റെ വിപണി മൂലധനം 980.07 കോടിയാണ്. 2025 ഓഗസ്റ്റ് 14 ലെ കണക്കനുസരിച്ച്, 25-26 സാമ്പത്തിക വർഷത്തിലെ ആദ്യ പാദത്തിൽ കമ്പനി 23.07 കോടി വരുമാനവും 1.63 കോടി അറ്റാദായവും 2.62 കോടി EBITDയും റിപ്പോർട്ട് ചെയ്തു. സമീപകാല റിപ്പോർട്ടുകൾ സൂചിപ്പിക്കുന്നത് കമ്പനി ഗണ്യമായ വളർച്ചാ സൂചകങ്ങൾ പ്രകടമാക്കിയിട്ടുണ്ടെന്നാണ്. വാർഷിക അറ്റ ​​വിൽപ്പനയിൽ 123.69% വർധനവും പ്രവർത്തന ലാഭത്തിൽ 84.22% വർധനവും നേട്ടമുണ്ടാക്കാൻ കമ്പനിക്ക് സാധിച്ചു.

ഏറ്റവും പുതിയ ആറ് മാസത്തെ ഡാറ്റ പ്രകാരം 53.25 കോടിയുടെ അറ്റ ​​വിൽപ്പന കമ്പനി നേടി. ഇത് 464.09% ശ്രദ്ധേയമായ വളർച്ചയാണ് കാണിക്കുന്നത്. അതേസമയം നികുതിക്ക് ശേഷമുള്ള ലാഭം 390.28% വർദ്ധിച്ച് 3.53 കോടിയിലെത്തി. എന്നിരുന്നാലും, ഉയർന്ന കടം- ഇബിഐടിഡിഎ അനുപാതം 9.32 മടങ്ങും ഇക്വിറ്റിയിൽ കുറഞ്ഞ വരുമാനം 2.73% ഉം കാരണം കമ്പനി വെല്ലുവിളികൾ നേരിടുന്നു. ഇത് ഭാവിയിൽ അതിന്റെ സാമ്പത്തിക സ്ഥിരതയെ ബാധിച്ചേക്കാം.

ഓഹരി വില

ബിഎസ്ഇയിൽ 50.96 രൂപ എന്നതാണ് നിലവിൽ മെർക്കുറി ഇവി-ടെക്ക് ഓഹരിയുടെ വില. കഴിഞ്ഞ ആറ് മാസത്തിനിടെ 14 ശതമാനം നഷ്ടം ഓഹരി നേരിട്ടിട്ടുണ്ട്. 1 വർഷത്തിനിടെ 30 ശതമാനം ഇടിവും ഇവി ഓഹരി നേരിട്ടു. എന്നാൽ അഞ്ച് വർഷത്തിനിടെ ഓഹരി 8600 ശതമാനം ഉയർന്നു. അതായത് അഞ്ച് വര്‍ഷം മുമ്പ് 2020 ജൂലായ് 31ന് ഒരു ലക്ഷം രൂപ നിക്ഷേപിച്ചിരുന്നുവെങ്കില്‍ നിലവിലെ മൊത്തം മൂല്യം 39.75 ലക്ഷമാകുമായിരുന്നു. 2019-ൽ ഓഹരി വിപണിയിലെത്തിയ മെർക്കുറി ഇവി-ടെക്കിന്‍റെ ഇതുവരെയുള്ള വളർച്ചച 14888 ശതമാനമാണ്.

കമ്പനി വിശദാംശങ്ങൾ

മുമ്പ് മെർക്കുറി മെറ്റൽസ് ലിമിറ്റഡ് എന്നറിയപ്പെട്ടിരുന്ന മെർക്കുറി ഇവി-ടെക് ലിമിറ്റഡ്, ഇന്ത്യയിൽ ഇലക്ട്രിക് സ്കൂട്ടറുകൾ, ഇലക്ട്രിക് കാറുകൾ, ഇലക്ട്രിക് ബസുകൾ, ഇലക്ട്രിക് വിന്റേജ് കാറുകൾ, ഇലക്ട്രിക് ഗോൾഫ് കാറുകൾ, ഇലക്ട്രിക് വാഹനങ്ങൾ എന്നിവയുടെ നിർമ്മാണത്തിൽ ഏർപ്പെട്ടിരിക്കുന്നു.
ഇലക്ട്രിക് ഓട്ടോമൊബൈൽ മേഖലയിൽ, ബാറ്ററികൾ, ഷാസികൾ, മോട്ടോർ കൺട്രോളറുകൾ എന്നിവയുൾപ്പെടെ ഇലക്ട്രിക് വാഹനങ്ങൾക്കായി പ്രധാന ഘടകങ്ങളും കമ്പനി നിർമ്മിക്കുന്നുണ്ട്.

പുതിയ ഫാക്ടറി

ഇവി, ബിഇഎസ്എസ് ആപ്ലിക്കേഷനുകൾക്കായി വഡോദരയിൽ (3.2 ജിഗാവാട്ട് ശേഷി) ഇന്ത്യയിലെ ഏറ്റവും വലിയ ലിഥിയം-അയൺ ബാറ്ററി നിർമ്മാണ സൗകര്യങ്ങളിലൊന്ന് കമ്പനി വികസിപ്പിച്ചുകൊണ്ടിരിക്കുകയാണ്. ഗവേഷണ വികസന കേന്ദ്രങ്ങളും ഇൻ-ഹൗസ് നിർമ്മാണവും ഉള്ളതിനാൽ, ഇന്ത്യയുടെ വളർന്നുവരുന്ന ഇവി, ബിഇഎസ്എസ് വിപണികളിൽ നിന്ന് മുതലെടുക്കാൻ മെർക്കുറി ഇവി ടെകിന് സാധിക്കുമെന്നാണ് വിലയിരുത്തൽ.

അറിയിപ്പ്: മുകളില്‍ കൊടുത്തിരിക്കുന്ന ലേഖനം പഠനാവശ്യത്തിന് നൽകുന്നതാണ്. ഇതുമായി ബന്ധപ്പെട്ട് നിക്ഷേപ തീരുമാനങ്ങള്‍ എടുക്കും മുന്‍പ് സാമ്പത്തിക വിദഗ്ധന്റെ നിര്‍ദേശം തേടാം. ഓഹരി വിപണിയിലെ നിക്ഷേപം നഷ്ട സാധ്യതകള്‍ക്ക് വിധേയമാണ്. സ്വന്തം റിസ്‌കില്‍ മാത്രം നിക്ഷേപ തീരുമാനം കൈക്കൊള്ളുക. ലേഖനം വായിച്ചിട്ട് എടുക്കുന്ന തീരുമാനത്തിന്റെ അടിസ്ഥാനത്തില്‍ സംഭവിക്കുന്ന ലാഭനഷ്ടങ്ങള്‍ക്ക് ഗ്രേനിയം ഇന്‍ഫര്‍മേഷന്‍ ടെക്നോളജീസും ലേഖകനും ഉത്തരവാദികളല്ല.