ബെംഗളൂരു മലയാളികള്‍ക്ക് സന്തോഷ വാര്‍ത്ത; 810 കോടി രൂപയുടെ കോറിഡോര്‍ വരുന്നു, ഇനി എളുപ്പത്തില്‍ നാട് പിടിക്കാം

മലയാളികള്‍ തിങ്ങിപ്പാര്‍ക്കുന്ന ബെംഗളൂരുവിനെ, കേരളവുമായി ബന്ധിപ്പിക്കുന്ന, പ്രധാന പാതയാണ് മൈസൂര്‍ റോഡ്.

ബെംഗളൂരുവില്‍ ജോലി ചെയ്യുകയും പഠിക്കുകയും ചെയ്യുന്ന മലയാളികളും വിനോദ സഞ്ചാരികളും പിഇഎസ് യൂണിവേഴ്‌സിറ്റി, ആര്‍വി കോളേജ്, അപ്പോളോ ആശുപത്രി എന്നിവിടങ്ങളിലേക്ക് പോകുന്നവരും ഈ റോഡിനെ ആശ്രയിക്കുന്നു.

ബെംഗളൂരുവിനേയും കേരളത്തേയും ബന്ധിപ്പിക്കുന്ന ഈ മൈസൂര്‍ റോഡില്‍ പ്രധാന വികസന പ്രവര്‍ത്തനങ്ങള്‍ ആസൂത്രണം ചെയ്യുകയാണ് സര്‍ക്കാര്‍.

810 കോടി രൂപ ചെലഴിച്ച് നിര്‍മ്മിക്കുന്ന കോറിഡോര്‍ പ്രൊജക്ടാണ് ഇതില്‍ മുഖ്യം. ഇതിനായി സാധ്യത റിപ്പോര്‍ട്ട് തയ്യാറാക്കി. പദ്ധതി സര്‍ക്കാര്‍ പരിഗണനയിലാണ്.

ഇതിന്റെ ഭാഗമായി സിര്‍സി സര്‍ക്കിളില്‍ അവസാനിക്കുന്ന ഫ്‌ലൈ ഓവര്‍ ഭെല്‍-കിംകോ ജംഗ്ഷന്‍ വരെ നീട്ടും. മധ്യ ബെംഗളൂരുവിനെ തെക്കുപടിഞ്ഞാറന്‍ പ്രാന്തപ്രദേശങ്ങളുമായി
ബന്ധിപ്പിക്കുകയാണ് ലക്ഷ്യം.മൈസൂര്‍ വഴി റോഡ് മാര്‍ഗ്ഗമാണ് ബെംഗളൂരില്‍ താമസിക്കുന്ന മലയാളികളില്‍ പലരും നാട് പിടിക്കുന്നത്.

മറ്റ് പ്രവര്‍ത്തനങ്ങള്‍

നയണ്ടഹണ്ടി ഫ്‌ലൈഓവറിന്റെ നിര്‍മ്മാണം 2019 ല്‍ പൂര്‍ത്തിയായി. അതിന് ശേഷം ആരംഭിച്ച പ്രധാന നിര്‍മ്മാണ പദ്ധതിയാണ് രാജരാജേശ്വരി നഗറിന് സമീപമുള്ള ആര്‍ച്ച് ഫ്‌ലൈ ഓവര്‍.

രാജരാജേശ്വരി നഗര്‍ മെയിന്‍ റോഡ്-കെങ്കേരി റോഡ് മെച്ചപ്പെടുത്തലിന് 75 കോടി രൂപ ചെലഴിച്ചു.

തുരങ്ക റോഡുകളോ മഴവെള്ളം ഒഴുകിപ്പോകുന്ന റോഡുകളോ മൈസൂര്‍ റോഡില്‍ പ്രാവര്‍ത്തികമാകില്ലെന്നും തൂണുകളിലോ വയഡക്ടറുകളിലോ സ്ഥിതിചെയ്യുന്ന തറനിരപ്പിന് മുകളിലുള്ള കോറിഡോറാണ് ഗതാഗതക്കുരുക്കിന് ശാശ്വത പരിഹാരമെന്നും സര്‍ക്കാര്‍ വൃത്തങ്ങള്‍ പറഞ്ഞു.