ബെംഗളൂരു മലയാളികൾക്ക് സന്തോഷ വാർത്ത, യെല്ലോ ലൈനിലെ പുതിയ ട്രെയിൻ എത്തി, സമയം കുറയും

കൊൽക്കത്തയിൽ നിന്ന് രണ്ടാഴ്ചത്തെ റോഡ് യാത്ര പൂർത്തിയാക്കി നമ്മ മെട്രോയുടെ യെല്ലോ ലൈനിനായുള്ള ആറാമത്തെ ട്രെയിൻസെറ്റിലെ ആറ് കോച്ചുകളും ബെംഗളൂരുവിൽ എത്തി. തുടക്കത്തിൽ 3 ട്രെയിനുകൾ ഉണ്ടായിരുന്ന യെല്ലോ ലൈനിൽ നിലവിൽ 5 ട്രെയിനുകൾ സർവീസ് നടത്തുന്നു. പുതിയതും യാത്ര ആരംഭിക്കുന്നതോടെ ട്രെയിനുകളുടെ എണ്ണം 6 ആയി ഉയരും.

യാത്രാ സമയം കുറയും

നിലവിൽ അഞ്ച് മഞ്ഞ മെട്രോകൾ യെല്ലോ ലൈനിൽ സർവീസ് നടത്തുന്നുണ്ട്. ഇതുമൂലം, നിലവിൽ ഓരോ 15 മിനിറ്റിലും ട്രെയിനുകൾ സർവീസ് നടത്തുന്നുണ്ട്. എന്നിരുന്നാലും, ആറാമത്തെ ട്രെയിൻ വരുന്നതോടെ ഈ സമയം കൂടുതൽ കുറയും. അതായത് യാത്രക്കാരുടെ കാത്തിരിപ്പ് സമയം 15 മിനിറ്റിൽ നിന്ന് 12 മിനിറ്റായി കുറയും. കൂടാതെ, പർപ്പിൾ, ഗ്രീൻ ലൈനുകൾ പോലെ രാവിലെ 5 മണിക്ക് മഞ്ഞ ലൈനിൽ പ്രവർത്തനം ആരംഭിക്കുന്നതിനുള്ള ചർച്ചകൾ നടന്നുവരികയാണ്.

ഡിസംബർ അവസാനത്തോടെയും ജനുവരി മാസത്തോടെയും ടിറ്റാഗഡിൽ നിന്ന് ബെംഗളൂരുവിലേക്ക് യെല്ലോ ലൈനിൽ രണ്ട് ട്രെയിനുകൾ കൂടി എത്തുമെന്നാണ് സൂചന. അങ്ങനെ വന്നാൽ, പർപ്പിൾ, ഗ്രീൻ മെട്രോ ലൈനുകൾ പോലെ, യെല്ലോ ലൈനിൽ ഓരോ 5 മിനിറ്റിലും മെട്രോ ട്രെയിൻ സർവീസ് നടത്തും.

പുതിയ ട്രെയിൻ എപ്പോൾ മുതൽ..?

അര്‍ദ്ധരാത്രി സമയങ്ങളില്‍ പരീക്ഷണ ഓട്ടം നടത്തും. പരീക്ഷണ ഘട്ടങ്ങള്‍ വിജയകരമായി പൂര്‍ത്തിയാക്കിയാല്‍ ഡിസംബര്‍ മൂന്നാം ആഴ്ച മുതൽ സര്‍വീസ് ആരംഭിക്കാനാണ് നീക്കം. ആര്‍വി റോഡ് മുതല്‍ ബൊമ്മസാന്ദ്ര വരെയുള്ള 19.15 കിലോമീറ്ററിലാണ് നമ്മ മെട്രോ യെല്ലോ ലൈന്‍ ദൂരം. ഓഗസ്റ്റ് 11-നാണ് യെല്ലാ ലൈൻ സർവ്വീസിനായി തുറന്നു തന്നത്. ശരാശരി 1 ലക്ഷം പേരെങ്കിലും യെല്ലോ ലൈനിൽ യാത്ര ചെയ്യുന്നുണ്ടെന്നാണ് കണക്ക്.

നമ്മ മെട്രോ

നിലവിൽ ദശലക്ഷക്കണക്കിന് യാത്രക്കാർ ഉപയോഗിക്കുന്ന ഒരു പൊതുഗതാഗത സംവിധാനമാണ് നമ്മ മെട്രോ. ഗതാഗത പ്രശ്നങ്ങൾ ഒഴിവാക്കാനും വേഗത്തിൽ സ്ഥലങ്ങളിൽ എത്തിച്ചേരാനുമുള്ള ഒരു മികച്ച മാർഗമാണ് മെട്രോ. ബെംഗളൂരുവിന് പുറത്തേക്ക് നമ്മ മെട്രോ ലൈന്‍ നീട്ടാനുള്ള ശ്രമവും സർക്കാർ ആരംഭിച്ചിട്ടുണ്ട്. നമ്മ മെട്രോ ശൃംഖല നിലവിലെ 96 കിലോമീറ്ററില്‍ നിന്ന് 2027 ഓടെ 175 കിലോമീറ്ററായും 2030 അവസാനത്തോടെ 225 കിലോമീറ്ററായും ദീര്‍ഘിപ്പിക്കുമെന്ന് BMRCL മാനേജിങ് ഡയറക്ടര്‍ ജെ രവിശങ്കര്‍ കഴിഞ്ഞ ദിവസം വ്യക്തമാക്കിയിരുന്നു. 2027 അവസാനത്തോടെ, നഗരത്തെ ബെംഗളൂരു വിമാനത്താവളവുമായി ബന്ധിപ്പിക്കുന്ന ബ്ലൂ ലൈനും തയ്യാറാകും' - രവിശങ്കര്‍ പറഞ്ഞു. '2027 ആകുമ്പോഴേക്കും മെട്രോ 175 കിലോമീറ്ററാകും.

ബെംഗളൂരുവില്‍ ഇപ്പോള്‍ രൂക്ഷമായ ഗതാഗതക്കുരുക്ക് അനുഭവപ്പെടുന്നുണ്ട്. ആസൂത്രിതമായ സബര്‍ബന്‍ റെയില്‍വേ പദ്ധതികളിലൂടെ നമ്മ മെട്രോയ്ക്ക് ഇത് ഗണ്യമായി കുറയ്ക്കാന്‍ സാധിക്കും' - BMRCL എംഡി കൂട്ടിച്ചേര്‍ത്തു.