ബെംഗളൂരു മെട്രോ: ഡ്രൈവറില്ലാ ട്രെയിൻ ട്രാക്കിലെത്തുമോ? ട്രെയിൻസെറ്റിന്റെ പ്രോട്ടോടൈപ്പ് ബിഇഎംഎൽ പുറത്തിറക്കി

ബെംഗളൂരു മലയാളികൾക്ക് വീണ്ടും ആശ്വാസ വാർത്ത. നമ്മ മെട്രോയുടെ ചരിത്രത്തിലെ ഏറ്റവും വലിയ നാഴികക്കല്ലായി മാറാനിരിക്കുന്ന 5RS-DM എന്നറിയപ്പെടുന്ന ഡ്രൈവറില്ലാത്ത മെട്രോ ട്രെയിൻസെറ്റിന്റെ ഒരു പ്രോട്ടോടൈപ്പ് അടുത്തിടെ ബിഇഎംഎൽ ലിമിറ്റഡ് പുറത്തിറക്കി. വരാനിരിക്കുന്ന നമ്മ മെട്രോ ഫേസ് 2, 2A, 2B ഇടനാഴികൾക്കായി വികസിപ്പിച്ചെടുത്ത ഈ പ്രോട്ടോടൈപ്പ്, ബിഎംആർസിഎൽ എംഡി ഡോ. ജെ. രവിശങ്കർ ഐഎഎസ്, ബിഇഎംഎൽ ലിമിറ്റഡ് സിഎംഡി ശാന്തനു റോയ് എന്നിവർ കഴിഞ്ഞ ദിവസം ഉദ്ഘാടനം ചെയ്തു. ബിഇഎംഎലിന്റെ യാത്രയിലെ മറ്റൊരു നാഴികക്കല്ലാണ് ഈ ഡ്രൈവർലെസ് മെട്രോ മാതൃകയുടെ അനാച്ഛാദനമെന്ന് ശാന്തനു റോയ് പറഞ്ഞു.

പൂർണ്ണമായും ഡ്രൈവറില്ലാതെയാണ് ഈ ട്രെയിൻ പ്രവർത്തിക്കുന്നത്. ഇത് സത്യത്തിൽ ബെം​ഗളൂരു ന​ഗരത്തിൻ്റെ മുഖച്ഛായ മാറാൻ സാധ്യതയുള്ള വളർച്ചയായിരിക്കും. കമ്മ്യൂണിക്കേഷൻ ബേസ്ഡ് ട്രെയിൻ കൺട്രോൾ (CBTC) സാങ്കേതികവിദ്യയിലാണ് ഇതിൻ്റെ പ്രവർത്തനം. ഈ സംവിധാനമുള്ളതിനാൽ മെട്രോ നെറ്റ്‌വർക്കിന് ട്രെയിനിൻ്റെ ചലനങ്ങൾ കൃത്യമായി മനസിലാക്കാനും, ഡ്രൈവറുടെ ആവശ്യമില്ലാതെ തന്നെ ഒപ്റ്റിമൽ ഷെഡ്യൂളിംഗും സുരക്ഷയും ഉറപ്പാക്കാനും സാധിക്കുന്നു.

പ്രധാന സവിശേഷതകൾ

ഡ്രൈവറില്ലാത്ത ഈ ട്രെയിനുകൾ അത്യാധുനിക സൗകര്യങ്ങളോടെയാണ് നിർമ്മിക്കുന്നത്. ഇവയുടെ മികച്ച ഇന്റീരിയർ ഡിസൈൻ യാത്രക്കാർക്ക് പ്രത്യേക യാത്രാനുഭവം പ്രധാനം ചെയ്യുന്നു.

നവീകരിച്ച പാസഞ്ചർ ഇൻഫർമേഷൻ ഡിസ്പ്ലേകൾ, മെച്ചപ്പെട്ട ആക്‌സസിബിലിറ്റി, യുഎസ്ബി ചാർജിംഗ് പോർട്ടുകൾ, എർഗണോമിക് സീറ്റിംഗ്, അഡ്വാൻസ്ഡ് ഫയർ-സേഫ്റ്റി കംപ്ലയൻസ് എന്നിങ്ങനെ നിരവധി സവിശേഷതകളും ഈ ‍ഡ്രൈവറില്ലാത്ത ട്രെയിനുകളുടെ പ്രത്യേകതയാണ്. കോച്ചുകൾ വിശാലമായ ഗാംഗ്‌വേകളാൽ ബന്ധിപ്പിച്ചിരിക്കുന്നു. ഇത് വണ്ടികൾക്കിടയിൽ സുഗമമായ ചലനം അനുവദിക്കുന്നു.

കരാർ

ബിഇഎംഎൽ 318 സ്റ്റാൻഡേർഡ് ഗേജ് മെട്രോ കാറുകൾ ബ്ലൂ ലൈൻ (വിമാനത്താവളം ലൈൻ), പിങ്ക് ലൈൻ എന്നിവയ്ക്കായി ബെംഗളൂരുവിൽ നിർമ്മിക്കും. 3,177 കോടി രൂപയുടെ കരാറിലാണ് ഈ പദ്ധതി നടപ്പിലാക്കുന്നത്. ഈ ട്രെയിൻ സെറ്റിന്റെ ഡിസൈനും എഞ്ചിനീയറിംഗ് പ്രവർത്തനങ്ങളും ബിഇഎംഎലിൻ്റെ സ്വന്തം ടീമുകളാണ് നിർവ്വഹിച്ചത്.

വളർച്ച

ഏറെ പ്രതീക്ഷയോടെ കാത്തിരിക്കുന്ന വിമാനത്താവള പാതയാണ് ഇത്. നഗരത്തെ കെമ്പെഗൗഡ അന്താരാഷ്ട്ര വിമാനത്താവളവുമായി ബന്ധിപ്പിക്കാനാണ് പ്ലാൻ. കലേന അഗ്രഹാര മുതൽ നാഗവാര വരെ പിങ്ക് ലൈൻ നീളും. അതിവേ​ഗം വളർന്നു കൊണ്ടിരിക്കുന്ന ന​ഗരം എന്ന നിലയിൽ ​ബെം​ഗളൂരുവിൽ ഈ ഡ്രൈവറില്ലാത്ത മെട്രോ ട്രെയിനുകൾ എത്തുന്നത് ഇന്ത്യയിലുടനീളം ചർച്ചയാവും.

സെൻസറുകളും ആർട്ടിഫിഷ്യൽ ഇന്റലിജൻസും സംയോജിപ്പിച്ച് ഒരു സെൽഫ് ഡ്രൈവിംഗ് കാർ ന​ഗരത്തിലൂടെ സഞ്ചരിക്കുന്നതു പോലെ, ഡ്രൈവറില്ലാത്ത മെട്രോ ട്രെയിൻ സഞ്ചരിക്കും. ട്രെയിനിൻ്റെ വേഗത, ദൂരം, സുരക്ഷ എന്നിവ കൈകാര്യം ചെയ്യുന്നതിന് അത്യാധുനിക CBTC സാങ്കേതികവിദ്യയാണ് ഇതിൽ പ്രവർത്തിക്കുന്നത്. ഇത് വേഗതയേറിയതും കാര്യക്ഷമവുമായ നഗര യാത്ര വാഗ്ദാനം ചെയ്യുന്നു.