പാസ്പോർട്ടിന് ഇനി പുതിയ രൂപം; അടുത്ത വർഷം മുതൽ പാസ്പോർട്ട് ലഭിക്കുന്നത് ഇങ്ങനെ

ഇ-പാസ്പോർട്ടുകൾ

ഇലക്ട്രോണിക് ചിപ്പ് ഘടിപ്പിച്ച ഇ-പാസ്പോർട്ടുകൾ പുറത്തിറക്കുന്നതിലൂടെ തട്ടിപ്പുകളും വ്യാജ പാസ്പോർട്ട് നിർമ്മിക്കുന്നതും തടയാനാകും. അന്താരാഷ്ട്ര യാത്രക്കാർക്ക് വേഗത്തിൽ ഇമിഗ്രേഷൻ നടപടികൾ പൂർത്തിയാക്കാനും ഇ-പാസ്പോർട്ടുകൾ സഹായകമാണ്. നിലവിൽ ഇതുവരെ, പൗരന്മാർക്ക് ലഭിച്ചു കൊണ്ടിരുന്നു ബുക്ക്ലെറ്റ് പാസ്‌പോർട്ടുകളായിരുന്നു.

പ്രത്യേക ഏജൻസി

മണിക്കൂറിൽ 10,000 മുതൽ 20,000 വരെ പാസ്പോർട്ടുകൾ ഇഷ്യു ചെയ്യാവുന്ന വ്യക്തിഗത ഇ-പാസ്‌പോർട്ടുകൾ തയ്യാറാക്കുന്നതിനുള്ള ഒരു പ്രത്യേക യൂണിറ്റും ഏജൻസിയും സജ്ജമാക്കാനാണ് അധികൃതരുടെ ലക്ഷ്യം. ഇതിനായി ഡൽഹിയിലും ചെന്നൈയിലും ഐടി സംവിധാനങ്ങൾ ആരംഭിക്കാനാണ് പദ്ധതി. വിദേശകാര്യ മന്ത്രാലയവുമായി ചേർന്ന് പ്രവർത്തിക്കുന്ന ദേശീയ ഇൻഫോർമാറ്റിക്‌സ് സെന്റർ ബുധനാഴ്ച ഐടി ഇൻഫ്രാസ്ട്രക്ചർ സ്ഥാപിക്കുന്നതിനും ഒരു ഏജൻസിയെ തിരഞ്ഞെടുക്കുന്നതിനും പ്രൊപ്പോസൽ പുറത്തിറക്കിയിരുന്നു.

അടുത്ത വർഷം മുതൽ

എംഇഎ ആസ്ഥാനത്തെ സിപിവി ഡിവിഷനിൽ നിന്ന് മാത്രമാണ് ഇതുവരെ നയതന്ത്ര‍, ഔദ്യോഗിക ഇ-പാസ്‌പോർട്ടുകൾ വിതരണം ചെയ്തിരുന്നത്. പുതിയ പദ്ധതി നടപ്പിലാകുന്നതോടെ ഇന്ത്യയിലെ 36 പാസ്പോർട്ട് ഓഫീസുകളിൽനിന്ന് ഇ-പാസ്പോർട്ട് ലഭിക്കും. രാജ്യങ്ങൾ തമ്മിലുള്ള പരസ്പര പ്രവർത്തനം ഉറപ്പാക്കുന്നതിന് ഇന്റർനാഷണൽ സിവിൽ ഏവിയേഷൻ ഓർഗനൈസേഷൻ (ഐസി‌എ‌ഒ) മാനദണ്ഡത്തെ അടിസ്ഥാനമാക്കിയായിരിക്കും ഇ-പാസ്‌പോർട്ടുകൾ തയ്യാറാക്കുക.

കൂടുതൽ സമയമെടുക്കുമോ?

നിലവിലുള്ള പ്രക്രിയകളിൽ കാര്യമായ മാറ്റമില്ലാതെയായിരിക്കും ഇ-പാസ്‌പോർട്ട് സംവിധാനം സംയോജിപ്പിക്കുക. കൂടാതെ പാസ്‌പോർട്ട് നൽകുന്നതിന് ആവശ്യമായ സമയത്തിൽ കാര്യമായ വർദ്ധനവുണ്ടാകില്ല.