നിങ്ങളുടെ പാൻ നമ്പർ മാറുമോ? പാൻ കാർഡിൽ പുത്തൻ മാറ്റങ്ങൾ വരുന്നു, പാൻ 2.0 ഉടൻ

രാജ്യത്തെ പ്രധാന തിരിച്ചറിയൽ രേഖകളിൽ ഒന്നാണ് പാൻ കാർഡ്. സാമ്പത്തിക ഇടപാടുകൾക്ക് ഉപയോ​ഗിക്കുന്നതിനൊപ്പം നികുതി അടക്കാനും ഇത് ആവശ്യമാണ്. പാൻ എന്നാൽ പെർമനന്റ് അക്കൗണ്ട് നമ്പർ എന്നതിന്റെ ചുരുക്ക രൂപമാണ്. ഇപ്പോൾ പാൻ കാർഡുമായി ബന്ധപ്പെട്ട് പുതിയ പദ്ധതികൾ കേന്ദ്ര സർക്കാർ കൊണ്ടു വരുന്നു. പാൻ കാർഡുമായി ബന്ധപ്പെട്ട എല്ലാ കാര്യങ്ങളും എളുപ്പത്തിൽ പൂർത്തിയാക്കാനാണ് പുതിയ പദ്ധതിയിലൂടെ ഉദ്ദേശിക്കുന്നത്.

പുതിയ പദ്ധതി...

പാൻ 2.0 എന്നാണ് പുതിയ പദ്ധതിയുടെ പേര്. തിങ്കളാഴ്ച കേന്ദ്ര മന്ത്രി സഭാ യോ​ഗത്തിലാണ് ഇതിന് അം​ഗീകാരം ലഭിച്ചത്. ക്യുആർ കോഡുള്ള പാൻ കാർഡായിരിക്കും ഇത്. നിലവിലുള്ള പാൻ കാർഡിനെ അപ്​ഗ്രേഡ് ചെയ്തിട്ടാണ് ഈ ഡിജിറ്റൽ സിസ്റ്റത്തിലേക്ക് മാറ്റുന്നത്. അതിനാൽ ഇത് എല്ലാവർക്കും ഒരുപോലെ ലഭ്യമാകും. മാത്രമല്ല ഇതിന് ഒരു ഏകീകൃത പോർട്ടൽ ഉണ്ടാകും, അത് പൂർണ്ണമായും ഓൺലൈനായിരിക്കുമെന്നും കേന്ദ്ര മന്ത്രി അശ്വിനി വൈഷ്ണവ് പറഞ്ഞു.

വാണിജ്യ മേഖലയിൽ നിന്നുള്ള ദീർഘ കാലത്തെ ആവശ്യമായിരുന്നു എല്ലാ പാൻ, ടാൻ സേവനങ്ങളും ഒരുമിച്ച് പ്രവർത്തിക്കുന്ന ഒരു സിസ്റ്റം വേണമെന്നത്. അതിനാൽ പൊതു ബിസിനസ് ഐഡന്റിഫയർ നിർമ്മിക്കും. മാത്രമല്ല പാൻ ഡാറ്റ ഉപയോഗിക്കുന്ന എല്ലാ സ്ഥാപനങ്ങൾക്കും പാൻ ഡാറ്റ വോൾട്ട് എന്ന സംവിധാനം നിർബന്ധമാക്കുമെന്നും മന്ത്രി കൂട്ടിച്ചേർത്തു. ഇതിലൂടെ ഉപഭോക്താക്കളുടെ ഡാറ്റ സുരക്ഷിതമായി സൂക്ഷിക്കാൻ സാധിക്കുന്നു.

1,435 കോടി രൂപ ചെലവിലാണ് ഈ പദ്ധതി നിർമിക്കുന്നത്. എന്നാൽ ഇത് പൊതുജനങ്ങൾക്ക് യാതൊരു സാമ്പത്തിക നഷ്ടവും സൃഷ്ടിക്കുന്നില്ല. അതായത് പാൻ കാർഡ് അപ്​ഗ്രേഡ് ചെയ്യുന്നത് പൂർണമായും സൗജന്യമായിരിക്കും.

നികുതിദായകരുടെ മെച്ചപ്പെട്ട ഡിജിറ്റൽ അനുഭവത്തിനായി പിനക്രമീകരിച്ച ഒരു ഇ-ഗവേണൻസ് പ്രോജക്റ്റാണിത്. എല്ലാ പാൻ/ടാൻ സേവനങ്ങളും ഡിജിറ്റലിലേക്ക് മാറുന്നു. ഈ പദ്ധതി നിലവിലുള്ള പാൻ കാർഡിന്റെ അപ്​ഗ്രേഡ് ചെയ്തിട്ടുള്ള ഫോർമാറ്റ് ആയിരിക്കും. അതിനാൽ തന്നെ നിങ്ങളുടെ നിലവിലെ പാൻ നമ്പറും നഷ്ടമാവില്ല. പഴയ നമ്പർ തന്നെയാവും പുതുക്കിയ കാർഡിലും ലഭ്യമാവുന്നത്. ഈ പദ്ധതിയിലൂടെ നികുതിദായകർക്കുള്ള സേവനങ്ങൾ കൂടുതൽ എളുപ്പമാക്കാനും പെട്ടെന്ന് പൂർത്തിയാക്കാനും സഹായിക്കും. എന്തെല്ലാം പ്രത്യേകതകളാണ് ഈ പദ്ധതിയ്ക്കുള്ളത്?

• മെച്ചപ്പെട്ട ഗുണനിലവാരം

• എളുപ്പത്തിൽ ആക്സസ് ചെയ്യാനും വേഗത്തിൽ വിതരണം ചെയ്യാനും സാധിക്കും

• എല്ലാ വിവരങ്ങളും ഒറ്റ കുടക്കീഴിൽ

• കുറഞ്ഞ ചിലവുള്ളതും എന്നാൽ പരിസ്ഥിതി സൗഹാർദ്ദവുമായ പദ്ധതി

• കൂടുതൽ സുരക്ഷയും ഒപ്റ്റിമൈസേഷനും

വീട്ടിലിരുന്ന് സമ്പാദിക്കാം; ഉയർന്ന ശമ്പളം വാഗ്‌ദാനം ചെയ്യുന്ന 10 ഫ്രീലാൻസ് ജോലികൾ

കണക്കുകകൾ പ്രകാരം നിലവിൽ 78 കോടി ആളുകൾക്കാണ് പാൻ കാർഡ് നൽകിയത്. ഇത്രയും ജനങ്ങൾ രാജ്യത്ത് പാൻ ഉപയോ​ഗിക്കുന്നു. പുതിയ മാറ്റം എല്ലാവർക്കും കൂടുതൽ സൗകര്യപ്രദമാവും. കാർഡ് കൈവശം കൊണ്ട് നടക്കാതെ ക്യൂആർ കോഡിലൂടെ എല്ലാ ഇടപാടുകളും നടത്താം. നിലവിലെ പാൻ കാർഡിന്റെ അപ്​ഗ്രേഡ് ഫോർമാറ്റ് മാത്രമായിരിക്കും ഇത്. മാത്രമല്ല ബിസിനസുമായി ബന്ധപ്പെട്ട എല്ലാ കാര്യങ്ങൾക്കും ഒരു പൊതു ബിസിനസ് ഐഡൻ്റിഫയറും, ഒരു ഏകീകൃത പോർട്ടലും ഈ പ്രോജക്റ്റിൽ ഉൾപ്പെടുന്നുണ്ട്.