ഡിസംബർ 1 മുതൽ പുതിയ നിയമങ്ങൾ: പെൻഷൻ മുതൽ വീട്ടുചെലവിനെ വരെ ബാധിക്കുന്ന 5 കാര്യങ്ങൾ

നവംബർ അവസാനിക്കുന്നതോടെ നിരവധി സർക്കാർ, സാമ്പത്തിക സമയപരിധികളും അവസാനിക്കുകയാണ്. ഡിസംബർ 1 മുതൽ വലിയ മാറ്റങ്ങൾ വരും പെൻഷൻ പേപ്പർവർക്കുകൾ മുതൽ നികുതി സമർപ്പിക്കുക, ഇന്ധന വില പരിഷ്കരണം തുടങ്ങി ദൈനംദിന ജീവിതത്തേയും സാമ്പത്തിക കാര്യങ്ങളേയും സ്വാധീനിക്കുന്ന മാറ്റങ്ങളാണ് വരുന്നത്. പ്രതിമാസ ബജറ്റുകൾ, സമ്പാദ്യം, അവശ്യ സേവനങ്ങൾ എന്നിവയിൽ നേരിട്ട് സ്വാധീനം ചെലുത്തുന്ന പുതിയ മാറ്റങ്ങൾ ഡിസംബർ 1 മുതൽ പ്രാബല്യത്തിൽ വരും.

യുപിഎസ് സമയപരിധി നവംബർ 30 ന് അവസാനിക്കും

കേന്ദ്ര സർക്കാർ ജീവനക്കാർക്കായി അവതരിപ്പിച്ച ഏകീകൃത പെൻഷൻ പദ്ധതി (യുപിഎസ്)യിൽ ചേരാൻ ഇനി ഏതാനും ദിവസങ്ങൾ മാത്രമേ ശേഷിക്കുന്നുള്ളൂ. ദേശീയ പെൻഷൻ സംവിധാനത്തിൽ നിന്ന് മാറാൻ ആഗ്രഹിക്കുന്ന ജീവനക്കാർ നവംബർ 30-നകം ഓപ്ഷനുകൾ സമർപ്പിക്കണം. സർക്കാർ ഇതിനകം തന്നെ സമയപരിധി ഒരുതവണ നീട്ടിയിരുന്നു.ഡിസംബർ ഒന്നിനോ അതിനുശേഷമോ പദ്ധതിയിൽ ചേരാൻ കഴിയില്ലെന്ന് ഉദ്യോഗസ്ഥർ അറിയിച്ചിട്ടുണ്ട്.

പെൻഷൻകാർ നവംബർ 30-നകം ലൈഫ് സർട്ടിഫിക്കറ്റ് സമർപ്പിക്കണം

പെൻഷൻകാർക്ക് വാർഷിക ലൈഫ് സർട്ടിഫിക്കറ്റ് സമർപ്പിക്കാനുള്ള അവസാന തീയതി നവംബർ 30 ആണ്. പെൻഷൻകാർക്ക് നവംബർ 1 മുതൽ നവംബർ 30 വരെ ലൈഫ് സർട്ടിഫിക്കറ്റ് പ്രക്രിയ പൂർത്തിയാക്കാൻ അവസരമുണ്ട്. പെൻഷൻ വാങ്ങുന്ന വ്യക്തി ജീവിച്ചിരിപ്പുണ്ടെന്ന് തെളിയിക്കുന്നതിനുവേണ്ടി പെൻഷൻ വിതരണം ചെയ്യുന്ന ഏജൻസിക്ക് ഓരോ വർഷവും നൽകേണ്ട സർട്ടിഫിക്കറ്റ് ആണ് ലൈഫ് സർട്ടിഫിക്കറ്റ്. കേന്ദ്ര-സംസ്ഥാന സർക്കാരുകൾ പ്രതിരോധസേനകൾ പൊതുമേഖല സ്ഥാപനങ്ങൾ എന്നിവിടങ്ങളിൽ നിന്നും പെൻഷൻ വാങ്ങുന്നവർക്ക് ഈ സർട്ടിഫിക്കറ്റ് അത്യാവശ്യമാണ്. സർട്ടിഫിക്കറ്റ് നൽകാൻ താമസിക്കുന്നവർക്ക് അവരുടെ വിശദാംശങ്ങൾ വീണ്ടും പരിശോധിക്കുന്നതുവരെ പെൻഷൻ കിട്ടാൻ കാലതാമസം നേരിടേണ്ടിവരും.

നികുതി സംബന്ധമായ പ്രധാന ഫയലിങ്ങുകൾ ഈ ആഴ്ച അവസാനിക്കും

നവംബർ 30 ന് നിരവധി ഡയറക്ട് ടാക്സ് കംപ്ലയൻസുകളും അവസാനിക്കും. 194-IA, 194-IB, 194M, 194S എന്നീ വകുപ്പുകൾ പ്രകാരം ഒക്ടോബറിൽ കുറച്ച ടിഡിഎസിനുള്ള സ്റ്റേറ്റ്മെന്റുകൾ ഇതിൽ ഉൾപ്പെടുന്നു. ട്രാൻസ്ഫർ-പ്രൈസിംഗ് റിപ്പോർട്ടുകൾ ഫയൽ ചെയ്യേണ്ടവ ഉൾപ്പെടെ, സെക്ഷൻ 92E പ്രകാരം ഉൾപ്പെടുത്തിയിട്ടുള്ള നികുതിദായകർക്കും ഈ ആഴ്ച റിട്ടേൺ ഫയലിംഗ് സമയപരിധിയുണ്ട്. ഇന്ത്യൻ ഘടക സ്ഥാപനങ്ങളുള്ള മൾട്ടിനാഷണൽ ഗ്രൂപ്പുകൾ നവംബർ 30-നകം ഫോം 3CEAA സമർപ്പിക്കണം. ഡിസംബർ തുടങ്ങിയശേഷം ഫയൽ ചെയ്യുന്നത് പിഴകൾ ഈടാക്കാനും നോട്ടീസുകൾ ലഭിക്കാനും കാരണമാകും.

ഡിസംബർ ഒന്നിന് എൽപിജി വില പരിഷ്കരിക്കും

ഡിസംബർ ഒന്നിന് പാചക വാതക വിലയിൽ മാറ്റം വന്നേക്കും. ആഗോള വിലകളെയും കറൻസി നിരക്കുകളെയും അടിസ്ഥാനമാക്കി എണ്ണ വിപണന കമ്പനികൾ എല്ലാ മാസവും ആദ്യ ദിവസം എൽപിജി നിരക്കുകൾ പരിഷ്കരിക്കും. കഴിഞ്ഞ മാസം, വാണിജ്യ സിലിണ്ടറുകളിൽ നേരിയ കുറവ് രേഖപ്പെടുത്തിയിരുന്നു.

എടിഎഫ് അപ്‌ഡേറ്റ് ഡിസംബർ ഒന്നിന് പുറത്തിറങ്ങും

എൽപിജിയുടെ അതേ സൈക്കിളിൽ പരിഷ്കരിച്ച ഏവിയേഷൻ ടർബൈൻ ഇന്ധന വിലകളും ഡിസംബർ 1 ന് അപ്‌ഡേറ്റ് ചെയ്യപ്പെടും. ഏത് മാറ്റവും എയർലൈനുകളുടെ പ്രവർത്തന ചെലവുകളെ ബാധിക്കുകയും യാത്രാ തിരക്കുള്ള കാലയളവിൽ ടിക്കറ്റ് നിരക്കുകളെ സ്വാധീനിക്കുകയും ചെയ്യും. എടിഎഫിലെ ഒരു ചെറിയ ക്രമീകരണം പോലും ഡിസംബറിലെ വിമാന യാത്രാ ടിക്കറ്റ് നിരക്കുകളിൽ പ്രതിഫലിക്കും.