അറിഞ്ഞില്ലെങ്കിൽ പണി കിട്ടും! ഒക്ടോബർ 1 മുതൽ വൻ മാറ്റങ്ങൾ: ഈ 5 നിയമങ്ങൾ അറിയാതെ പോവരുത്

സെപ്റ്റംബർ മാസം അവസാനിക്കാറായി. ഉത്സവകാലങ്ങളോടു കൂടി ഒക്ടോബർ മാസം ആരംഭിക്കുന്നു. ഓരോ മാസവും ആരംഭിക്കുമ്പോൾ പുതിയ നിയമങ്ങളും മാറ്റങ്ങളും വരാറുണ്ട്. അത്തരത്തിൽ ഒക്ടോബർ 1 മുതൽ വിവിധ നിയമങ്ങളിൽ മാറ്റം വരുന്നു. എൽപിജി സിലിണ്ടർ വിലകൾ, പെൻഷൻ നിയമങ്ങൾ, യുപിഐ നിയമങ്ങൾ, റെയിൽവേ ടിക്കറ്റ് ബുക്കിംഗ് തുടങ്ങി നിരവധി മാറ്റങ്ങൾ. ഒക്ടോബർ 1 മുതൽ പ്രാബല്യത്തിൽ വരുന്ന ഈ പ്രധാന മാറ്റങ്ങളെക്കുറിച്ച് കൂടുതൽ അറിയാം.

1. എൽപിജി സിലിണ്ടറുകളുടെ വിലയിൽ മാറ്റം

എൽപിജി സിലിണ്ടറുകളുടെ വില ഇന്ത്യയിലെ സാധാരണക്കാരായ കുടുംബങ്ങളെ നേരിട്ട് ബാധിക്കുന്ന വിഷയമാണ്. ഒക്ടോബറിൽ വില ഉയർന്നാൽ അത് വലിയ പ്രതിസന്ധി ഉയർത്തും. സമീപകാലങ്ങളിൽ 19 കിലോഗ്രാം ഗ്യാസ് സിലിണ്ടറുകളുടെ വിലയിൽ മാറ്റം വരുത്തിയിട്ടുണ്ടെങ്കിലും 14 കിലോഗ്രാം എൽപിജി സിലിണ്ടറുകളുടെ വില വളരെക്കാലമായി മാറിയിട്ടില്ല. 14 കിലോഗ്രാം സിലിണ്ടറുകളാണ് ​ഗാർഹിക ഉപയോ​ഗത്തിനുള്ളത്. ഇത്തവണ വിലയിൽ മാറ്റം വരുമോ?

2. ട്രെയിൻ ടിക്കറ്റ് ബുക്കിംഗ്

ഒക്ടോബർ 1 മുതൽ ട്രെയിൻ ടിക്കറ്റ് ബുക്കിംഗുകൾക്ക് നിർബന്ധിത പേയ്‌മെന്റ് ഓപ്ഷനായി ഇന്ത്യൻ റെയിൽ‌വേ യുപിഐ അവതരിപ്പിക്കും . പേയ്‌മെന്റുകൾ കാര്യക്ഷമമാക്കുന്നതിനും ഓൺലൈൻ ഇടപാടുകളിൽ സുരക്ഷ വർദ്ധിപ്പിക്കുന്നതിനും വേണ്ടിയാണ് ഇത്തരത്തിലുള്ള മുന്നേറ്റം.

മാത്രമല്ല ഐആർസിടിസി അക്കൗണ്ടുകൾ ആധാറുമായി ബന്ധിപ്പിച്ചിട്ടുള്ള യാത്രക്കാർക്ക് മാത്രമേ ഓൺലൈൻ റിസർവേഷൻ ആദ്യ 15 മിനിറ്റിൽ ലഭ്യമാകൂ. ഇത് ഒക്ടോബർ 1 മുതൽ പ്രാബല്യത്തിൽ വരും.

3. യുപിഐ മാറ്റങ്ങൾ

ഫോൺപേ, ​ഗൂ​ഗിൾ പേ അല്ലെങ്കിൽ മറ്റ് പേയ്‌മെന്റ് ആപ്പുകൾ ഉപയോഗിക്കുന്ന സുഹൃത്തുക്കൾ, ബന്ധുക്കൾ തുടങ്ങി ആരിൽ നിന്നും നേരിട്ട് പണം അയക്കാൻ റിക്വസ്റ്റ് ചെയ്യാൻ സാധിക്കില്ല. അതായത് "കളക്ട് റിക്വസ്റ്റ്" അല്ലെങ്കിൽ "പുൾ ട്രാൻസാക്ഷൻ" ഫീച്ചർ യുപിഐ പൂർണ്ണമായും നിർത്തലാക്കുന്നു. ഓൺലൈൻ തട്ടിപ്പും ഫിഷിംഗും തടയുന്നതിനും യുപിഐ ഇടപാടുകൾ സുരക്ഷിതമാക്കുന്നതിനുമാണ് എൻപിസിഐ പുതിയ നയം സ്വീകരിച്ചത്. ഈ മാറ്റം ഒക്ടോബർ മുതൽ നടപ്പിലാക്കും.

4. എൻപിഎസ്

ദേശീയ പെൻഷൻ സംവിധാനത്തിൽ (NPS) പെൻഷൻ ഫണ്ട് റെഗുലേറ്ററി ആൻഡ് ഡെവലപ്‌മെന്റ് അതോറിറ്റി (PFRDA) ഒരു പ്രധാന മാറ്റം പ്രഖ്യാപിച്ചു. മൾട്ടിപ്പിൾ സ്‌കീം ഫ്രെയിംവർക്ക് എന്നറിയപ്പെടുന്ന ഈ പരിഷ്‌കാരം, സർക്കാരിതര മേഖലയിലെ ജീവനക്കാർ, കോർപ്പറേറ്റ് പ്രൊഫഷണലുകൾ, ഗിഗ് തൊഴിലാളികൾ എന്നിവർക്ക് ഒരൊറ്റ പാൻ നമ്പർ ഉപയോഗിച്ച് ഒന്നിലധികം പദ്ധതികളിൽ നിക്ഷേപിക്കാൻ സാധിക്കും എന്നതാണ്. ഇത് ഒക്ടോബർ 1 മുതൽ നടപ്പിലാക്കും. ഈ സൗകര്യം നിക്ഷേപകർക്ക് കൂടുതൽ നേട്ടം ഉറപ്പാക്കുന്നു.

5. ഓൺലൈൻ ​ഗെയിമിം​ഗ്

ഒക്ടോബർ 1 മുതൽ ഓൺലൈൻ ഗെയിമിം​ഗ് മേഖലയിലും വലിയ മാറ്റങ്ങൾ വരുന്നു. ഓൺലൈൻ ഗെയിമിംഗ് കൂടുതൽ സുരക്ഷിതവും സുതാര്യവുമാക്കുക, കളിക്കാരെ വഞ്ചനയിൽ നിന്ന് സംരക്ഷിക്കുക, കമ്പനികളെ കർശനമായി നിരീക്ഷിക്കുക എന്നിവയാണ് പുതിയ നിയമങ്ങളിലൂടെ ലക്ഷ്യമിടുന്നത്. ഇത് സാധാരണക്കാർക്ക് പോലും സാമ്പത്തിക നഷ്ടം ഉണ്ടാവുന്നതിൽ നിന്ന് രക്ഷിക്കുന്നു.

അറിയിപ്പ്: ഇവിടെ പ്രകടിപ്പിച്ചിട്ടുള്ള അഭിപ്രായങ്ങളും നിർദ്ദേശങ്ങളും വ്യക്തിഗത വിശകലന വിദഗ്ദ്ധരുടെയോ സ്ഥാപനങ്ങളുടെയോ മാത്രം കാഴ്ചപ്പാടുകളാണ്. ഇത് Goodreturns.in-ന്റെയോ Greenium Information Technologies Private Limited-ന്റെയോ നിലപാടുകളെ പ്രതിഫലിക്കുന്നില്ല. ഈ ഉള്ളടക്കത്തിന്റെ കൃത്യത, പൂർണ്ണത, അല്ലെങ്കിൽ വിശ്വാസ്യത എന്നിവയ്ക്ക് ഞങ്ങൾ യാതൊരു ഉറപ്പും നൽകുന്നില്ല, മാത്രമല്ല അതിന് ഉത്തരവാദിത്തം ഏറ്റെടുക്കുന്നുമില്ല.

ഞങ്ങൾ ഏതെങ്കിലും തരത്തിലുള്ള നിക്ഷേപ ഉപദേശങ്ങൾ നൽകുകയോ, ഓഹരികൾ വാങ്ങാനോ വിൽക്കാനോ ശുപാർശ ചെയ്യുകയോ ചെയ്യുന്നില്ല. ഈ വിവരങ്ങൾ വിജ്ഞാനപ്രദമായ ആവശ്യങ്ങൾക്ക് മാത്രമുള്ളതാണ്. അതിനാൽ, ഏതെങ്കിലും നിക്ഷേപ തീരുമാനങ്ങൾ എടുക്കുന്നതിന് മുൻപ്, ലൈസൻസുള്ള ഒരു സാമ്പത്തിക ഉപദേഷ്ടകനുമായി കൂടിയാലോചിക്കുന്നത് നിർബന്ധമാണ്.