ഇടപാട് പരിധി ഉയർത്തി യുപിഐ, ഇനി കൂടുതൽ തുക അയക്കാം, അറിയാം പുതിയ മാറ്റങ്ങൾ

യുപിഐ പേയ്‌മെന്റുകൾ സുഗമമാക്കുന്നതിനായി ഇടപാടുകളുടെ പരിധി ഉയര്‍ത്തി നാഷണല്‍ പേയ്മെന്റ്സ് കോര്‍പ്പറേഷന്‍ ഓഫ് ഇന്ത്യ. ഉയര്‍ന്ന മൂല്യമുള്ള ഇടപാടുകള്‍ എളുപ്പത്തിലാക്കുന്നതിനായാണ് ഈ മാറ്റം. ഇന്നുമുതൽ, അതായത് 2025 സെപ്റ്റംബർ 15 മുതൽ പുതിയ മാറ്റം പ്രാബല്യത്തിൽ വന്നു. ഇൻഷുറൻസ്, നിക്ഷേപങ്ങൾ, യാത്ര, ക്രെഡിറ്റ് കാർഡ് ബില്ലുകൾ തുടങ്ങിയ ഉയർന്ന മൂല്യമുള്ള ഇടപാടുകൾക്ക് പുതിയ മാറ്റം ഗുണകരമാണ്. എന്തൊക്കെയാണ് മാറ്റങ്ങളെന്ന് നമുക്ക് വിശദമായി നോക്കാം.

1. ഇൻഷുറൻസ്, മൂലധന വിപണി നിക്ഷേപങ്ങൾക്ക് ഓരോ ഇടപാടിനും പരിധി 2 ലക്ഷത്തിൽ നിന്ന് 5 ലക്ഷമായി ഉയർത്തി. കൂടാതെ അനുവദനീയമായ പ്രതിദിന മൊത്തം തുക 10 ലക്ഷം രൂപയുമാണ്

2. സര്‍ക്കാര്‍ ഇ-മാര്‍ക്കറ്റ് പ്ലേസ് ഇടപാടുകള്‍, നികുതി അടയ്ക്കല്‍ തുടങ്ങിയവയുടെ പരിധി ഓരോ ഇടപാടിനും 1 ലക്ഷത്തില്‍ നിന്നും 5 ലക്ഷമാക്കി വര്‍ധിപ്പിച്ചു.

3. യാത്രാ ടിക്കറ്റുകള്‍ ഉള്‍പ്പെടെയുള്ള ഇടപാടുകളുടെ പരിധി 1 ലക്ഷത്തില്‍ നിന്ന് 5 ലക്ഷമായി ഉയര്‍ത്തി. ഒരു ദിവസം 10 ലക്ഷം രൂപ വരെ ഇടപാട് നടത്താം. ക്രെഡിറ്റ് കാർഡ് ബിൽ പേയ്‌മെന്റുകളും ലോൺ/ഇഎംഐ കളക്ഷനുകളും സമാനമായി ഇളവുകൾ നൽകിയിട്ടുണ്ട്.

4. സ്വര്‍ണാഭരണങ്ങള്‍ വാങ്ങുന്നതിനുള്ള ഇടപാട് പരിധി 1 ലക്ഷത്തില്‍ നിന്ന് 2 ലക്ഷമായും പ്രതിദിന പരിധി 6 ലക്ഷമായും വര്‍ധിച്ചു.

നേട്ടങ്ങൾ എന്തെല്ലാം.. ?

1. വലിയ തുകകൾ അടയ്ക്കേണ്ടിവരുമ്പോൾ (ഇൻഷുറൻസ് പ്രീമിയങ്ങൾ, നിക്ഷേപ സബ്‌സ്‌ക്രിപ്‌ഷനുകൾ അല്ലെങ്കിൽ യാത്രാ ബുക്കിംഗുകൾ എന്നിവ പോലുള്ളവ) ആളുകൾ പലപ്പോഴും ബുദ്ധിമുട്ടുകൾ നേരിടാറുണ്ട്. മുമ്പ്, പേയ്‌മെന്റ് ചെറിയ ഭാഗങ്ങളായി വിഭജിക്കാനോ ചെക്കുകൾ, ബാങ്ക് ട്രാൻസ്ഫറുകൾ ഉപയോഗിക്കാനോ അവർ നിർബന്ധിതരായിരുന്നിരിക്കാം. എന്നാൽ ഇനി മുതൽ ഉയർന്ന യുപിഐ പരിധികൾ ഉള്ളതിനാൽ അസൗകര്യങ്ങൾ കുറയുന്നു.

2. ഈ മാറ്റങ്ങൾ കൂടുതൽ ഉയർന്ന മൂല്യമുള്ള ഇടപാടുകൾ ഡിജിറ്റലായി പൂർത്തിയാക്കാൻ സാധിക്കും. ഇത് കൂടുതൽ ആളുകളെയും ബിസിനസുകളെയും യുപിഐ കൂടുതൽ വിശാലമായി ഉപയോഗിക്കാൻ പ്രോത്സാഹിപ്പിക്കും.

3. ഇൻഷുറൻസ്, യാത്ര തുടങ്ങിയവയുടെ പണമിടപാട് സമയം കുറയ്ക്കാൻ സാധിക്കും. അതുവഴി അനാവശ്യ സമയ നഷ്ടം ഒഴിവാക്കാം.

ശ്രദ്ധിക്കേണ്ട കാര്യങ്ങൾ

വ്യക്തികൾ തമ്മിലുള്ള ഇടപാടുകൾക്കുള്ള (P2P) പരിധി പ്രതിദിനം 1 ലക്ഷം രൂപയായിരുന്നു. അത് മാറ്റമില്ലാതെ തുടരും. അതോടൊപ്പം പുതിയ മാറ്റങ്ങൾ എല്ലാ ഇടത്തും നടത്താൻ സാധിക്കില്ല. അതുകൊണ്ടുതന്നെ ഇടപാട് നടത്തുന്നതിന് മുൻപ് കാര്യങ്ങൾ പരിശോധിക്കണം. അതോടൊപ്പം ഉയർന്ന തുക നൽകുമ്പോൾ സുരക്ഷ മുൻകരുതലുകൾ അതായത് മൾട്ടി-ഫാക്ടർ ഓതന്റിക്കേഷൻ തുടങ്ങിയ കാര്യങ്ങൾ ഉറപ്പാക്കണം.

ഉയർന്ന മൂല്യമുള്ള ഡിജിറ്റൽ ഇടപാടുകൾ ലളിതവും കൂടുതൽ ആക്‌സസ് ചെയ്യാവുന്നതുമാക്കുന്നതിനുള്ള ഒരു വലിയ നീക്കമാണ് പുതിയ മാറ്റം. ഇൻഷുറൻസ്, യാത്ര, നിക്ഷേപങ്ങൾ അല്ലെങ്കിൽ ക്രെഡിറ്റ് ബില്ലുകൾ എന്നിവയ്‌ക്കായി പലപ്പോഴും വലിയ തുകകൾ അടയ്ക്കുന്ന വ്യക്തികൾക്ക് പുതിയ പരിധികൾ ജീവിതം എളുപ്പമാക്കും.