കേന്ദ്ര ബജറ്റ് 2025: ലക്ഷ്യം ദാരിദ്ര നിർമാർജനം, കാർഷിക മേഖലയെ ശക്തിപ്പെടുത്തും: പ്രഖ്യാപനങ്ങളുമായി ധനമന്ത്രി

ദാരിദ്ര്യ നിർമ്മാർജ്ജനമാണ് കേന്ദ്ര ബജറ്റ് 2025 ന്റെ ലക്ഷ്യമെന്ന് ധനമന്ത്രി നിർമല സീതാരാമൻ. കാർഷിക മേഖലയെ ശക്തിപ്പെടുത്തുമെന്ന് പറഞ്ഞ മന്ത്രി ബജറ്റിൽ രാജ്യത്തെ യുവ ജനങ്ങൾക്ക് ജോലി നൽകാൻ വേണ്ട പ്രഖ്യാപനങ്ങൾ ഉണ്ടെന്നും, കളിപ്പാട്ട നിർമാണത്തിൽ ഇന്ത്യയെ ഒരു ഹബ്ബാക്കി മാറ്റുമെന്നും വ്യക്തമാക്കി.

പട്ടികജാതി പട്ടികവർഗ മേഖലയിൽ ഊന്നൽ നൽകുമെന്ന് പറഞ്ഞ മന്ത്രി ചെറുകിട വ്യവസായങ്ങൾക്ക് പ്രാധാന്യം നൽകുമെന്നും, 5 ലക്ഷം പുതിയ സ്ത്രീ സംരംഭകർക്ക് സഹായം നൽകുമെന്നും ധനമത്രി പറഞ്ഞു. അതോടൊപ്പം തന്നെ തുകൽ വ്യവസായത്തിന് ഊന്നൽ നൽകുമെന്നും, മത്സ്യത്തൊഴിലാളികൾക്ക് പ്രത്യേക പരിഗണന നൽകുമെന്നും വ്യക്തമാക്കി.

2019ൽ ധനമന്ത്രിയായതിന് ശേഷം നിർമ്മല സീതാരാമൻ അവതരിപ്പിക്കുന്ന എട്ടാമത്തെ ബജറ്റാണിത്. ഇന്ത്യയുടെ സമ്പദ് വ്യവസ്ഥയെ ഉയർത്തിപ്പിടിക്കാൻ ബജറ്റിലെ പ്രഖ്യാപനങ്ങൾ വഴിയൊരുക്കുമെന്നാണ് നിലവിലെ പ്രഖ്യാപനങ്ങൾ നൽകുന്ന സൂചന.

കേന്ദ്ര ബജറ്റിൽ കേരളത്തിനും നിരവധി പ്രതീക്ഷകളുണ്ട്. വയനാട് പുനരധിവാസം അടക്കമുള്ളവ സംസ്ഥാനം പ്രതീക്ഷ വെക്കുന്ന പ്രധാന ആവശ്യങ്ങളിലൊന്നാണ്. ഇത് ബജറ്റിൽ പരി​ഗണിക്കുമോ എന്നത് ഇപ്പോൾ വ്യക്തമല്ല. മാത്രമല്ല റെയിൽവേ മേഖലയിലും കേരളത്തിന് വലിയ പ്രതീക്ഷകലാണുള്ളത്.