കേരളത്തിൽ സ്വർണ വിലയിൽ ഇന്ന് മാറ്റമില്ല, ഉയർന്ന വില തന്നെ

സംസ്ഥാനത്ത് ഇന്ന് സ്വർണ വിലയിൽ മാറ്റമില്ല. ഒരു പവന്റെ ഇന്നത്തെ വില 28520 രൂപയാണ്. ഗ്രാമിന് 3565 രൂപയാണ് നിരക്ക്. ഇന്നലെയും ഇതേ വിലയ്ക്ക് തന്നെയാണ് വ്യാപാരം പുരോഗമിച്ചത്. നവംബറിലെ ഏറ്റവും ഉയർന്ന വില 28800 രൂപയാണ്. നവംബർ ഒന്ന് മുതൽ മൂന്ന് വരെയാണ് ഈ വിലയ്ക്ക് വ്യാപാരം നടന്നത്.

സ്വർണ ഫ്യൂച്ചേഴ്സ് വില

എംസിഎക്സിൽ സ്വർണ വില രണ്ടാം ദിവസവും ഇടിഞ്ഞു. ഇന്ന് സ്വർണ വില 0.09 ശതമാനം ഇടിഞ്ഞ് 38,172 രൂപയിലാണ് എത്തിയിരിക്കുന്നത്. സെപ്റ്റംബറിലെ ഏറ്റവും ഉയർന്ന നിരക്കായ 10 ഗ്രാമിന് 40,000രൂപ എന്ന നിരക്കിൽ നിന്ന് 1,800 രൂപയാണ് ഇപ്പോൾ കുറഞ്ഞിരിക്കുന്നത്. എംസിഎക്സിൽ സിൽവർ ഫ്യൂച്ചേഴ്സ് വിലയും 0.08 ശതമാനം ഇടിഞ്ഞ് 44,825 രൂപയിലെത്തി.

ആഗോള വിപണി

ആഗോള വിപണിയിൽ സ്വർണ വില 0.1 ശതമാനം ഉയർന്ന് 1,473.75 ഡോളറിലെത്തി. യുഎസ്-ചൈന വ്യാപാര ചർച്ചകളെ സങ്കീർണ്ണമാക്കാൻ സാധ്യതയുള്ള ഹോങ്കോംഗ് പ്രക്ഷോഭകരെ പിന്തുണയ്ക്കുന്ന നിയമനിർമ്മാണം യുഎസ് സെനറ്റ് പാസാക്കിയതിനെത്തുടർന്ന് ഏഷ്യൻ ഓഹരി വിപണികൾ ഇന്ന് ഇടിവ് രേഖപ്പെടുത്തി.

സ്വർണ വിലയെ ബാധിക്കുന്ന ഘടകങ്ങൾ

യുഎസ്-ചൈന വ്യാപാര ചർച്ചകളിലെ അനിശ്ചിതത്വം, യുഎസ് ഡോളറിന്റെ ബലഹീനത, പ്രധാന കേന്ദ്ര ബാങ്കുകളുടെ പലിശ നിരക്ക് ലഘൂകരിക്കൽ ഇവയൊക്കെയാണ് സ്വർണ്ണ വിലയെ പിന്തുണച്ചിരിക്കുന്നത്. ഇന്ന്‌ നടക്കാനിരിക്കുന്ന ഫെഡറൽ‌ റിസർ‌വിന്റെ അവസാന പോളിസി മീറ്റിംഗിലേയ്ക്ക് ആകും ഇനി സ്വർണ്ണ വ്യാപാരികളുടെ ശ്രദ്ധ.. യുഎസ്-ചൈന വ്യാപാര യുദ്ധത്തിനെതിരായി വളർച്ചയെ പിന്തുണയ്ക്കുന്നതിന് ഫെഡറൽ റിസർവ് ഈ വർഷം മൂന്നുതവണ പലിശനിരക്ക് കുറച്ചിരുന്നു.

ട്രംപിന്റെ ഭീഷണി

തനിക്ക് താത്പര്യമുള്ള കരാറിനെ ചൈന അംഗീകരിക്കുന്നില്ലെങ്കിൽ താരിഫ് ഇനിയും ഉയർത്തുമെന്ന് യുഎസ് പ്രസിഡന്റ് ഡൊണാൾഡ് ട്രംപ് ചൊവ്വാഴ്ച ഭീഷണിപ്പെടുത്തിയിരുന്നു. യുഎസ്-ചൈന വ്യാപാര ചർച്ചകളിലാണ് ഇപ്പോൾ സ്വർണ്ണ വ്യാപാരികൾ ശ്രദ്ധ കേന്ദ്രീകരിച്ചിരിക്കുന്നത്.