ഇന്ധന വില വർധനവിൽ ആശ്വാസത്തിന് വകുപ്പില്ല, നികുതി കുറയ്ക്കില്ലെന്ന് കേന്ദ്ര പെട്രോളിയം മന്ത്രി

ദില്ലി: രാജ്യത്ത് ഇന്ധന വില ദിനംപ്രതി കുതിച്ചുയര്‍ന്ന് കൊണ്ടിരിക്കുകയാണ്. എന്നാല്‍ ഉപഭോക്താക്കളുടെ ബാധ്യത കുറയ്ക്കാന്‍ പെട്രോളിന്റെയും ഡീസലിന്റെയും എക്‌സൈസ് നികുതി കുറയ്ക്കുന്ന കാര്യം സര്‍ക്കാര്‍ ഇപ്പോള്‍ ആലോചിക്കുന്നില്ലെന്ന് പെട്രോളിയം വകുപ്പ് മന്ത്രി ധര്‍മേന്ദ്ര പ്രധാന്‍ വ്യക്തമാക്കി. ഇന്നത്തെ വില വര്‍ധനവോടെ പെട്രോള്‍, ഡീസല്‍ വില രാജ്യത്ത് എക്കാലത്തെയും ഉയര്‍ന്ന നിലയില്‍ എത്തിയിരിക്കുകയാണ്.

നികുതി കുറയ്ക്കുന്നത് സംബന്ധിച്ചുളള ആലോചന ഇപ്പോഴില്ലെന്ന് മന്ത്രി ധര്‍മേന്ദ്ര പ്രധാന്‍ രാജ്യസഭയില്‍ ചോദ്യത്തിന് മറുപടിയായാണ് അറിയിച്ചത്. വിലവര്‍ധനവിന്റെ ദുരിതം കുറയ്ക്കാന്‍ സര്‍ക്കാര്‍ നികുതി കുറയ്ക്കാന്‍ ആലോചിക്കുന്നുണ്ടോ എന്ന ചോദ്യത്തിന് മറുപടി നല്‍കുകയായിരുന്നു മന്ത്രി.

തുടര്‍ച്ചയായ മൂന്നാം ദിവസത്തിലാണ് രാജ്യത്ത് ഇന്ധന വില ഉയര്‍ന്നിരിക്കുന്നത്. പെട്രോള്‍ വില തൊണ്ണൂറും കടന്ന് മുകളിലേക്ക് കുതിക്കുകയാണ്. മുംബൈയില്‍ ഇന്ന് പെട്രോള്‍ വില ലിറ്ററിന് 94ല്‍ എത്തിയിരിക്കുകയാണ്. ഡീസലിന്റെ വില 84.63 ആയി ഉയര്‍ന്നു. പെട്രോള്‍ ലിറ്ററിന് 13 രൂപയും ഡീസല്‍ ലിറ്ററിന് 16 രൂപയും എക്‌സൈസ് ഡ്യൂട്ടി സര്‍ക്കാര്‍ ഉയര്‍ത്തിയിരുന്നു. 2020 മാര്‍ച്ച് പകുതി മുതല്‍ പെട്രോള്‍ വില ലിറ്ററിന് 18.01 രൂപയും ഡീസല്‍ ലിറ്ററിന് 15.44 രൂപയും ഉയര്‍ന്നിരുന്നു.

അന്താരാഷ്ട്ര വിലയുടെ അടിസ്ഥാനത്തിലാണ് രാജ്യത്ത് റീട്ടെയ്ല്‍ ഇന്ധന വിലയെന്ന് മന്ത്രി രാജ്യസഭയില്‍ ചോദ്യത്തിന് ഉത്തരമായി പറഞ്ഞു. ഇന്ത്യ 85 ശതമാനവും ഇറക്കുമതിയെ ആണ് ആശ്രയിക്കുന്നത് എന്നും മന്ത്രി പറഞ്ഞു. അന്താരാഷ്ട്ര വിപണിയില്‍ ക്രൂഡ് ഓയില്‍ വില ഉയരുമ്പോള്‍ നമുക്ക് ഇന്ധന വില വര്‍ധിപ്പിക്കേണ്ടതായി വരും. അന്താരാഷ്ട്ര മാര്‍ക്കറ്റില്‍ വില ഇടിയുമ്പോള്‍ രാജ്യത്തും ഇന്ധന വില കുറയ്ക്കുമെന്നും മന്ത്രി പറഞ്ഞു. ഇതാണ് എണ്ണ കമ്പനികള്‍ പിന്തുടരുന്ന വിപണി രീതി എന്നും തങ്ങള്‍ എണ്ണ കമ്പനികള്‍ക്ക് ആ സ്വാതന്ത്ര്യം അനുവദിച്ച് നല്‍കിയിട്ടുണ്ടെന്നും മന്ത്രി വ്യക്തമാക്കി.