ട്രെയിൻ ടിക്കറ്റ് ഇപ്പോൾ തന്നെ ബുക്ക് ചെയ്യാം, കാശ് പിന്നെ നൽകിയാൽ മതി

ട്രെയിൻ ടിക്കറ്റ് ബുക്ക് ചെയ്യുന്നവർക്ക് ഇനി പേയ്മെന്റ് പിന്നെ നടത്തിയാൽ മതി. ഇന്ത്യൻ റെയിൽ‌വേ കാറ്ററിംഗ് ആൻഡ് ടൂറിസം കോർപ്പറേഷൻ (ഐആർ‌സി‌ടി‌സി) 'Book Now, Pay Later' എന്ന സേവനവുമായാണ് രംഗത്തെത്തിയിരിക്കുന്നത്. ഐ‌ആർ‌സി‌ടി‌സി ഔദ്യോഗിക വെബ്‌സൈറ്റ് വഴി ടിക്കറ്റ് ബുക്ക് ചെയ്യുന്നവർക്ക് ഈ ഓപ്ഷൻ ഉപയോഗിച്ച് കൂടുതൽ എളുപ്പത്തിലും തടസ്സരഹിതവുമായി ടിക്കറ്റ് ബുക്ക് ചെയ്യാം.

ഇ-പേ ലേറ്റർ

റിസർവ് ചെയ്ത ടിക്കറ്റിനും തത്കൽ ടിക്കറ്റിനും "ഇ-പേ ലേറ്റർ" സേവനം ലഭ്യമാകുമെന്ന് ഐആർസിടിസി അറിയിച്ചു. തത്കാൽ ടിക്കറ്റുകൾ ബുക്ക് ചെയ്യുമ്പോൾ ഉപയോക്താക്കൾക്ക് കാലതാമസമോ പേയ്‌മെന്റ് പരാജയങ്ങളോ നേരിടേണ്ടി വരില്ല എന്നതിനാൽ ഈ ഓപ്ഷൻ തികച്ചും പ്രയോജനകരമാണ്.

14 ദിവസത്തിന് മുമ്പ്

അർത്ഥശാസ്ത്ര ഫിൻ‌ടെക് പ്രൈവറ്റ് ലിമിറ്റഡാണ് ഈ സേവനം വാഗ്ദാനം ചെയ്യുന്നത്. യാത്രക്കാർ ടിക്കറ്റ് ബുക്ക് ചെയ്ത് 14 ദിവസത്തിനുള്ളിൽ ടിക്കറ്റ് ചാർജ് നൽകിയാൽ മതി. 14 ദിവസത്തിനകം തുക അടയ്ക്കാൻ കഴിയുന്നില്ലെങ്കിൽ, 3.50% പലിശ നിരക്കും ബാധകമായ നികുതികളും ചേർത്ത് നൽകണം.

ഇ-പേ ലേറ്റർ ഓപ്ഷൻ ഉപയോഗിച്ച് ടിക്കറ്റ് ബുക്ക് ചെയ്യുന്നത് എങ്ങനെ?

• ഐആർസിടിസി അക്കൌണ്ട് തുറക്കുക.
• നിങ്ങളുടെ ടിക്കറ്റ് ബുക്ക് ചെയ്യുന്നതിനുള്ള വിശദാംശങ്ങൾ നൽകുക.
• പേയ്‌മെന്റ് പേജിൽ 'Pay Later' ഓപ്ഷൻ തിരഞ്ഞെടുക്കുക.
• തുടർന്ന് ഇ-പേ ലേറ്റർ പേജിലേയ്ക്ക് റീഡയറക്ട് ചെയ്യപ്പെടും.
• നിങ്ങളുടെ രജിസ്റ്റർ ചെയ്ത മൊബൈൽ നമ്പർ ഉപയോഗിച്ച് e-Pay Later' വെബ്‌സൈറ്റിൽ ലോഗിൻ ചെയ്യുക
• നിങ്ങളുടെ രജിസ്റ്റർ ചെയ്ത മൊബൈൽ നമ്പറിലേക്ക് ഒരു ഒടിപി ലഭിക്കും. ഒടിപി നൽകി കഴിഞ്ഞാൽ നിങ്ങളുടെ ലോഗിൻ വിജയകരമായി പൂർത്തിയാക്കാം.
• തുടർന്ന് നിങ്ങളുടെ ബുക്കിംഗ് തുക സ്ഥിരീകരിക്കുകയും ടിക്കറ്റ് ബുക്ക് ചെയ്യുകയും ചെയ്യാം.