കോടികൾ സ്വന്തമാക്കാൻ ദിവസങ്ങൾ മാത്രം, ഓണം ബമ്പർ വിൽപ്പന 40 ലക്ഷം കടന്നു, നിങ്ങൾ ലോട്ടറി വാങ്ങിയോ..?

25 കോടിയുടെ ഭാഗ്യവാനെ അറിയാൻ ഇനി ദിവസങ്ങൾ മാത്രമാണ് ബാക്കി. 25 കോടി ഒന്നാം സമ്മാനമായെത്തിയ ഓണം ബമ്പറിന്‍റെ നറുക്കെടുപ്പ് സെപ്റ്റംബര്‍ 27നാണ്. ഇതുവരെ ഏകദേശം 40 ലക്ഷത്തിന് മുകളിൽ ടിക്കറ്റുകളാണ് വിറ്റ് പോയത്. വരും ദിവസവും ടിക്കറ്റ് വിൽപ്പന തുടർന്നാൽ ഇത്തവണ വിൽപ്പനയിൽ പുതിയ റെക്കോർഡ് സൃഷ്ടിക്കും എന്ന് ഉറപ്പാണ്. കഴിഞ്ഞവര്‍ഷം 71.43 ലക്ഷം ടിക്കറ്റുകള്‍ വിറ്റുപോയിരുന്നു. ഇത്തവണ 75 ലക്ഷത്തോളം ടിക്കറ്റുകൾ വിറ്റ് പോകുമെന്നാണ് കണക്കാക്കുന്നത്. എന്തായാലും നമുക്ക് ഓണം ബമ്പർ ടിക്കറ്റിന്‍റെ കൂടുതൽ വിശദാംശങ്ങൾ പരിശോധിക്കാം.

സമ്മാനങ്ങൾ നിരവധി

25 കോടിയാണ് ഓണം ബമ്പറിന്‍റെ ഒന്നാം സമ്മാനം. രണ്ടാം സമ്മാനം 1 കോടി രൂപ വീതം 20 പേർക്ക് സ്വന്തമാക്കാം. ഓരോ സീരീസിലും രണ്ട് ടിക്കറ്റുകൾക്ക് ഒരു കോടി വീതം ഉറപ്പാക്കാം. മൂന്നാം സമ്മാനം 50 ലക്ഷം രൂപ വീതം 20 പേർക്ക് കിട്ടും. നാലാം സമ്മാനം 5 ലക്ഷം രൂപ വീതം 10 പേർക്ക് കിട്ടും. അഞ്ചാം സമ്മാനം 2 ലക്ഷം രൂപ വീതം 10 പേർക്കും സ്വന്തമാക്കാം. സമാശ്വാസ സമ്മാനം 9 പേര്‍ക്ക് 5 ലക്ഷം രൂപ വീതം ലഭിക്കും.

25 കോടി അടിച്ചാൽ എത്ര കൈയിൽ കിട്ടും?

ഒന്നാം സമ്മാനമായ 25 കോടി രൂപയുടെ 10 ശതമാനമാണ് കമ്മീഷനായി ഏജൻ്റിന് ലഭിക്കുക, അതായത് 2.5 കോടി രൂപ. ഏജൻ്റ് കമ്മീഷൻ കഴിഞ്ഞാൽ ബാക്കിയുള്ള തുക 22 കോടി അൻപത് ലക്ഷം . ഈ തുകയിൽനിന്ന് 30 ശതമാനം ടിഡിഎസ് ഈടാക്കും, അതായത് ആറ് കോടി 75 ലക്ഷം. ബാക്കി തുക, 15 കോടി 75 ലക്ഷം.
അഞ്ച് കോടിക്ക് മുകളിൽ വരുമാനമുള്ളവർക്ക് ആദായനികുതിയിൽ 37 ശതമാനം സർചാർജ് ഉണ്ട്. ഈ സാഹചര്യത്തിൽ, ടിഡിഎസ് തുകയായ 6,75,00,000ൻ്റെ 37 ശതമാനം സർചാർജായി ഈടാക്കും, അതായത് 2,49,75,000 രൂപ. ടിഡിഎസിനും സർചാർജിനും (6,75,00,000+ 2,49,75,000= 9,24,75,000 രൂപ) നാല് ശതമാനം ആരോഗ്യ-വിദ്യാഭ്യാസ സെസും ഉണ്ട്, അതായത് 36,99,000 രൂപ. ബാക്കിയുള്ള 15 കോടി 75 ലക്ഷത്തിൽനിന്ന് സർചാർജ്, സെസ് എന്നിവ കുറച്ച ശേഷം (157500000-2,49,75,000-36,99,000) ബാക്കി തുക 12,88,26,000 രൂപ ജേതാവിനുള്ളതാണ്.

ടിക്കറ്റ് വിൽപ്പന തകൃതി

ഈ വർഷത്തെ തിരുവോണം ബമ്പർ ഭാഗ്യക്കുറി ടിക്കറ്റിൻ്റെ പ്രകാശനം കഴിഞ്ഞ 28-നാണ് ധനകാര്യ മന്ത്രി കെ എൻ ബാലഗോപാൽ നിർവഹിച്ചത്. 500 രൂപയാണ് ടിക്കറ്റിന്‍റെ വില. പ്രകാശനം കഴിഞ്ഞ് ഒരു മാസം കഴിയുമ്പോഴേക്കും 30 ലക്ഷത്തിന് മുകളിൽ ടിക്കറ്റുകൾ വിറ്റുപോയി. നറുക്കെടുപ്പിന് 17 ദിവസം ബാക്കി നിൽക്കെ ടിക്കറ്റ് വിൽപ്പന 40 ലക്ഷം കടന്നു. പാലക്കാട് ജില്ലയിലാണ് ബമ്പർ ടിക്കറ്റ് വിൽപ്പന പൊടിപൊടിക്കുന്നത്. അയല്‍ സംസ്ഥാനക്കാരാണ് ടിക്കറ്റ് എടുക്കുന്നവരില്‍ വലിയൊരു വിഭാഗം. കണ്ണൂര്‍ ടിക്കറ്റുകള്‍ക്കും ഇത്തവണ ആവശ്യക്കാര്‍ ഏറെയാണ്. കഴിഞ്ഞ വര്‍ഷം കര്‍ണാടക സ്വദേശിക്കാണ് ഒന്നാം സമ്മാനമായ 25 കോടി രൂപ അടിച്ചത്.

ഭാഗ്യ നമ്പറുകൾ

2014 - TA 192044 - ആലപ്പുഴ
2015 - TE 513282 - തിരുവനന്തപുരം
2016 - TC 788368 - തൃശൂര്‍
2017 - AJ 442876 - മലപ്പുറം
2018 - TB 128092 - തൃശൂര്‍
2019 - TM 160869 - ആലപ്പുഴ
2020 - TB 173964 - എറണാകുളം
2021 - TE 645465- കൊല്ലം
2022 - TJ 750605 - തിരുവനന്തപുരം
2023 - TE 230662 - കോഴിക്കോട്
2024 - TG 43222- വയനാട്