ഓണം ബമ്പർ 2025: 25 കോടി പാലക്കാട് ജില്ല കൊണ്ട് പോകുമോ..? ആകാംഷയിൽ ഭാഗ്യം തേടുന്നവർ

തിരുവോണം ബമ്പര്‍ br 105: 25 കോടിയുടെ ഭാഗ്യവാനെ അറിയാൻ ഇനി മണിക്കൂറുകൾ മാത്രമാണ് ബാക്കി. ഇത്തവണത്തെ ഓണം ബമ്പർ ലോട്ടറി നറുക്കെടുപ്പ് മറ്റന്നാളാണ്. അതായത് ഒക്ടോബർ നാലാം തീയ്യതി. ഉച്ചയ്ക്ക് 2 മണിക്ക് തിരുവനന്തപുരത്തെ ഗോര്‍ഖി ഭവനിലാണ് ബമ്പർ ലോട്ടറിയുടെ നറുക്കെടുപ്പ് നടക്കുക. നേരത്തെ സെപ്തംബർ 28- ആം തീയ്യതിയായിരുന്നു നറുക്കെടുപ്പ് നിശ്ചയിച്ചിരുന്നത്. എന്നാൽ ടിക്കറ്റുകൾ മുഴുവൻ വിറ്റ് തീരാതെ വന്നതോടെ നറുക്കെടുപ്പ് ഒരാഴ്ചത്തേക്ക് കൂടി നീട്ടുകയായിരുന്നു. മറ്റന്നാൾ ഉച്ചവരെ ടിക്കറ്റ് വാങ്ങാൻ സാധിക്കും.

ഒന്നാം സമ്മാനം 25 കോടി

എല്ലാവർക്കും അറിയുന്നത് പോലെ 25 കോടി രൂപയാണ് ഓണം ബമ്പർ ലോട്ടറിയുടെ ഒന്നാം സമ്മാനം. രണ്ടാം സമ്മാനം ഒരു കോടി വീതം 20 പേര്‍ക്ക് ലഭിക്കും. 50 ലക്ഷം വീതം 20 പേര്‍ക്കാണ് മൂന്നാം സമ്മാനം. നാലാം സമ്മാനം - 5 ലക്ഷം വീതം 10 പരമ്പരകള്‍ക്ക്. അഞ്ചാം സമ്മാനം - 2 ലക്ഷം വീതം 10 പരമ്പരകള്‍ക്കും ലഭിക്കും. 5,000 മുതല്‍ 500 രൂപ വരെ സമ്മാനങ്ങള്‍ വേറെയുമുണ്ട്. ആകെ സമ്മാനത്തുക 140 കോടിയാണ്. 500 രൂപയാണ് ടിക്കറ്റ് വില.

കഴിഞ്ഞ തവണ കർണ്ണാടകയിൽ

2024-ലെ ഓണം ബമ്പർ ലോട്ടറിയുടെ ഒന്നാം സമ്മാനം ലഭിച്ചത് കര്‍ണാടക സ്വദേശി അല്‍ത്താഫിനാണ്. കര്‍ണാടക പാണ്ഡ്യപുരം സ്വദേശിയാണ് അല്‍ത്താഫ്. TG 434222 എന്ന നമ്പറിനാണ്ന ഒന്നാം സമ്മാനമായ 25 കോടി അടിച്ചത്. വയനാട് ജില്ലയിലെ സുല്‍ത്താന്‍ ബത്തേരിയില്‍ എന്‍ജിആര്‍ ലോട്ടറി കടയില്‍ നിന്ന് വിറ്റ ടിക്കറ്റിനാണ് ഒന്നാം സമ്മാനം ലഭിച്ചത്. പനമരത്തെ എസ്ജി ലക്കി സെന്ററാണ് എന്‍ജിആറിന് ടിക്കറ്റ് നല്‍കിയത്.

ഇത്തവണ പാലക്കാട് കൊണ്ടുപോകുമോ..?

2020 - TB 173964 - എറണാകുളം, 2021 - TE 645465- കൊല്ലം, 2022 - TJ 750605 - തിരുവനന്തപുരം, 2023 - TE 230662 - കോഴിക്കോട് എന്നിങ്ങനെയാണ് കഴിഞ്ഞ വർഷങ്ങളിലെ ഒന്നാം സമ്മാനം ലഭിച്ച ടിക്കറ്റ് നമ്പറും ടിക്കറ്റ് വിൽപ്പന നടത്തിയ ജില്ലയും. എന്നാ ഇത്തവണ ഒന്നാം സമ്മാനം പാലക്കാട് ജില്ല കൊണ്ടുപോകുമോ എന്നതാണ് ചർച്ച. കാരണം വേറെ ഒന്നും അല്ല. ഇത്തവണ ഏറ്റവും കൂടുതൽ ഓണം ബമ്പർ ടിക്കറ്റ് വിറ്റ ജില്ല പാലക്കാട് ആണ്.

അവസാനം പുറത്തുവന്ന കണക്കുകൾ പ്രകാരം 14,07,100 ടിക്കറ്റുകളാണ് പാലക്കാട് ജില്ലയില്‍ മാത്രം വിറ്റിരിക്കുന്നത്. തൃശൂരില്‍ 9,37,400 ടിക്കറ്റുകളും തിരുവനന്തപുരത്ത് 8,75,900 ടിക്കറ്റുകളും വിറ്റിട്ടുണ്ട്. അതായത് രണ്ടാം സ്ഥാനത്തുള്ള തൃശ്ശൂർ ജില്ലയെക്കാൾ 5 ലക്ഷത്തിലധികം ടിക്കറ്റുകളാണ് പാലക്കാട് ജില്ലയിൽ വിറ്റത്. അയല്‍ സംസ്ഥാനക്കാരാണ് ടിക്കറ്റ് എടുക്കുന്നവരില്‍ വലിയൊരു വിഭാഗവും. അതുകൊണ്ടുതന്നെ ഒന്നാം സമ്മാനം ലഭിക്കുന്ന വ്യക്തി ഇത്തവണയും കേരളത്തിന് പുറത്ത് നിന്നായിരിക്കുമോ എന്ന ആകാംഷയും നിലനിൽക്കുന്നുണ്ട്.

എത്ര കൈയിൽ കിട്ടും?

ഒന്നാം സമ്മാനമായ 25 കോടി രൂപയുടെ 10 ശതമാനമാണ് കമ്മീഷനായി ഏജൻ്റിന് ലഭിക്കുക. അതോടൊപ്പം 30 ശതമാനം ടിഡിഎസ് ഈടാക്കും. ആരോഗ്യ-വിദ്യാഭ്യാസ സെസ്, സർചാർജ്, സെസ് തുടങ്ങിയവയും ഒന്നാം സമ്മാനം ലഭിക്കുന്ന വ്യക്തി നൽകണം. ഇതെല്ലാം കഴിഞ്ഞ് ഏകദേശം 12,88,26,000 രൂപ ജേതാവിനുള്ളതാണ്.