ഒരു ഇഡ്ഡലിക്ക് 100 രൂപ, നാലെണ്ണത്തിന് 50; ബെംഗളൂരുവിലെ 'ഇഡ്ഡലി കണക്ക്' കണ്ട് അന്തംവിട്ട് സോഷ്യൽ മീഡിയ

ബംഗളൂരു: വിലവിവരപ്പട്ടികയിലെ വിചിത്രമായ കണക്കുകൾ കണ്ട് അമ്പരന്നിരിക്കുകയാണ് ബംഗളൂരുവിലെ ഭക്ഷണപ്രേമികൾ. നഗരത്തിലെ പ്രശസ്തമായ ഒരു ഹോട്ടലിലെ ഇഡ്ഡലിയുടെ വിലയാണ് ഇപ്പോൾ സോഷ്യൽ മീഡിയയിൽ ചർച്ചാവിഷയം. നാല് ഇഡ്ഡലി അടങ്ങുന്ന ഒരു പ്ലേറ്റിന് വെറും 50 രൂപ മാത്രം ഈടാക്കുമ്പോൾ, ഒരൊറ്റ ഇഡ്ഡലി വേണമെന്നുണ്ടെങ്കിൽ കീശയിൽ നിന്നും 100 രൂപ നൽകണം.

ബെംഗളൂരു കൊമേഴ്സ്യൽ സ്ട്രീറ്റിന് അടുത്തുള്ള ശിവാജിനഗറിലെ വീരപിള്ള സ്ട്രീറ്റിൽ 1970-കൾ മുതൽ പ്രവർത്തിക്കുന്ന 'നവീൻ ബട്ടർ ദോശ ക്യാമ്പ്' ആണ് ഈ വിചിത്രമായ വില പരിഷ്കരണത്തിലൂടെ വാർത്തകളിൽ ഇടംപിടിച്ചത്. റെഡിറ്റ് പ്ലാറ്റ്‌ഫോമിൽ ഹോട്ടലിലെ മെനു ബോർഡിന്റെ ചിത്രം പ്രത്യക്ഷപ്പെട്ടതോടെയാണ് സംഭവം പുറംലോകമറിഞ്ഞത്. "സിംഗിൾ ഇഡ്ഡലി സംസ്കാരത്തെ പ്രോത്സാഹിപ്പിക്കില്ല" എന്ന കുറിപ്പോടെയാണ് ഒരാൾ ഈ ചിത്രം പങ്കുവെച്ചത്.

രണ്ട് പ്ലേറ്റ് ഇഡ്ഡലി വാങ്ങിയാൽ (8 എണ്ണം) 100 രൂപയാകുമെന്നിരിക്കെ, ഒരു ഇഡ്ഡലിക്ക് മാത്രം എങ്ങനെ 100 രൂപ ഈടാക്കുന്നു എന്നാണ് സോഷ്യൽ മീഡിയ ചോദിക്കുന്നത്. ഇതിനു പിന്നിലെ 'ഹോട്ടൽ ഉടമയുടെ മാത്തമാറ്റിക്സ്' കണ്ടെത്താനുള്ള ശ്രമത്തിലാണ് നെറ്റിസൺസ്.

സംഭവം ചിരിക്കും പരിഹാസത്തിനും വഴിവെച്ചെങ്കിലും ഇതിന് പിന്നിൽ ചില പ്രായോഗിക കാരണങ്ങൾ ഉണ്ടെന്നാണ് ചിലരുടെ കണ്ടെത്തൽ. ഹോട്ടലിലെ തിരക്ക് നിയന്ത്രിക്കാനും പാഴാക്കൽ ഒഴിവാക്കാനും വേണ്ടിയാകാം ഇത്തരമൊരു വിലയെന്ന് ചിലർ വാദിക്കുന്നു. ഒരു ബാച്ചിൽ നാല് ഇഡ്ഡലികളാണ് വേവിക്കുന്നത്. ഒരാൾ ഒന്ന് മാത്രം വാങ്ങിയാൽ ബാക്കി മൂന്നെണ്ണം തണുത്തുപോകാൻ സാധ്യതയുണ്ടെന്നാണ് ഒരാളുടെ രസകരമായ കമന്റ്. സിംഗിൾ ഇഡ്ഡലി ഓർഡറുകൾ കുറച്ച് സെറ്റ് ഇഡ്ഡലികൾ പ്രോത്സാഹിപ്പിക്കുന്നത് വഴി സർവീസ് വേഗത്തിലാക്കാനാണെന്നും ബിസിനസ് ലാഭകരമാക്കാൻ ചെറിയ ഓർഡറുകളെ നിരുത്സാഹപ്പെടുത്തുന്ന തന്ത്രമാണിതെന്നും അഭിപ്രായങ്ങളുണ്ട്.

എന്തായാലും ബംഗളൂരുവിലെ ഈ 'ഇഡ്ഡലി കണക്ക്' ഇപ്പോൾ ഇന്റർനെറ്റിൽ വൈറലാണ്. "നാലെണ്ണം വാങ്ങി 50 രൂപ കൊടുക്കാം, എന്നിട്ട് ഒരെണ്ണം കഴിച്ച് ബാക്കി മൂന്നെണ്ണം ആർക്കെങ്കിലും ദാനം ചെയ്താലും ലാഭം നമുക്ക് തന്നെ" എന്നാണ് ഒരാളുടെ രസകരമായ കമന്റ്.