'അവിവാഹിതരായ പങ്കാളികൾക്ക് വിലക്ക്', നയങ്ങളിൽ മാറ്റം വരുത്തി ഒയോ റൂംസ്

കപ്പിൾസ് ഫ്രണ്ട്‌ലി ആയിരുന്ന ഒയോ റൂംസ് തങ്ങളുടെ നയത്തിൽ മാറ്റം വരുത്തിയതാണ് ഇപ്പോൾ ചർച്ചകളിൽ ഇടം പിടിച്ചിരിക്കുന്നത്. റൂമുകൾ എടുക്കണമെങ്കിൽ ബന്ധം തെളിയിക്കുന്ന രേഖകൾ ഹാജരാക്കണം എന്നതാണ് പുതിയ നയം. നിലവിൽ ഉത്തർപ്രദേശിലെ മീററ്റിൽ പ്രവർത്തിക്കുന്ന ഹോട്ടലുകളിലാണ് ആദ്യമായി ഇത് പ്രാബല്യത്തിൽ കൊണ്ടുവരുക. അവിവാഹിതർക്ക് റൂമുകൾ നൽകുന്നതിനെച്ചൊല്ലി നിരന്തരമായി നടന്ന വാഗ്വാദങ്ങൾക്കൊടുവിലാണ് ഈ മാറ്റമെന്നാണ് റിപ്പോർട്ടുകൾ സൂചിപ്പിക്കുന്നത്.

സ്ഥിര നിക്ഷേപങ്ങളിൽ ഉയർന്ന പലിശ വേണോ? ഈ പ്ലാനുകളെക്കുറിച്ച് അറിഞ്ഞിരിക്കാം
.
ഓയോയുടെ പുതിയ നയപ്രകാരം ഹോട്ടലുകളിൽ മുറിയെടുക്കുന്ന സമയത്ത് ബന്ധം തെളിയിക്കുന്ന രേഖകൾ സമർപ്പിക്കണം എന്നത് നിർബന്ധമാണ്. ഓൺലൈൻ വഴിയും നേരിട്ടും നടത്തുന്ന ബുക്കിങ്ങുകൾക്കും ഇത് ബാധകമാണെന്നാണ് അറിയിപ്പ്. കൂടാതെ ഹോട്ടൽ സ്ഥിതി ചെയ്യുന്ന സ്ഥലത്തെ പ്രാദേശിക സാമൂഹിക അന്തരീക്ഷം കണക്കിലെടുത്ത് അവിവാഹിതരായ പങ്കാളികള്‍ക്ക് ബുക്കിങ് നിരസിക്കാനുള്ള വിവേചനാധികാരവും ഓയോ ഹോട്ടലുകൾക്ക് ഇപ്പോൾ നൽകിയിട്ടുണ്ട്.

ഉത്തര്‍പ്രദേശിലെ മീറ്ററ്റിൽ ആദ്യഘട്ടത്തില്‍ ഈ ചെക്ക്-ഇന്‍ നിയമ മാറ്റം നടപ്പാക്കുന്നതോടൊപ്പം, മറ്റ് സ്ഥലങ്ങളിലേക്കും പുതിയ നിയമം വ്യാപിപ്പിക്കാന്‍ സാധ്യതയുണ്ടെന്നാണ് റിപ്പോർട്ടുകൾ സൂചിപ്പിക്കുന്നത്. ഹിന്ദു മിത്തോളജി പ്രകാരം നിരവധി പുണ്യ ഭൂമികൾ ഉള്ള ഇടമായത് കൊണ്ട് കൂടിയാണ് യുപിയിലെ മീററ്റിൽ ഈ നിയമം നടപ്പിലാക്കിയതെന്നും ചർച്ചകൾ ഉണ്ട്.

കപ്പിൾസ് ഫ്രണ്ട്‌ലി എന്ന രീതിയിലാണ് ഒയോ റൂമുകൾ ഏറ്റവുമധികം ഇന്ത്യയിലെ വിവിധ സംസ്ഥാനങ്ങളിൽ വലിയ പ്രചാരം നേടിയത്. മറ്റുള്ള ഹോട്ടലുകൾ അവിവാഹിതരേ അകറ്റി നിർത്തുമ്പോൾ അവരെ വെൽക്കം ചെയ്‌തത്‌ ഒയോ റൂമുകൾ ആയിരുന്നു. എറണാകുളം പോലെയുള്ള കേരളത്തിലെ സിറ്റികളിൽ എല്ലാം തന്നെ ഈ സാധ്യത കണക്കിലെടുത്ത് നിരവധി ഒയോ റൂമുകൾ ആരംഭിച്ചിരുന്നു. വിലക്കുറവും മെച്ചപ്പെട്ട വൃത്തിയും സൗകര്യങ്ങളും ഒയോയെ മറ്റുള്ളവയിൽ നിന്ന് മാറ്റി നിർത്തുന്ന ഘടകങ്ങളാണ്.

ഒയോ റൂമുകളുടെ ചരിത്രം

ഒയോ റൂമ്സ് (OYO Rooms) എന്ന പേരിന് പിന്നിലെ കർത്താവ് റിതേഷ് അഗർവാൾ ആണ്. 1993-ൽ ഒഡീഷയിലെ കട്ടക്കിൽ ജനിച്ച റിതേഷ്, തന്റെ ബാല്യത്തിൽ നിന്ന് തന്നെ യാത്രയ്ക്കും സ്റ്റാർട്ട്-അപ്പുകൾക്കും പ്രത്യേക താൽപ്പര്യമുള്ളവനായിരുന്നു. 19-ആം വയസ്സിൽ, ഒരു ചെറിയ ആശയം അവനെ ഇന്ത്യയിലെ ഏറ്റവും വലിയ ഹോസ്പിറ്റാലിറ്റി ബ്രാൻഡിലേക്ക് നയിച്ചു. 2013-ൽ "Oravel Stays" എന്ന പേരിൽ ഒരു ബജറ്റ് ഹോട്ടൽ സ്റ്റാർട്ടപ്പ് ആയി അദ്ദേഹം യാത്ര ആരംഭിച്ചു. എന്നാൽ, അതിന്റെ പ്രവർത്തനം പരിമിതമായിരുന്നു. അതിനാലാണ് അദ്ദേഹം ഈ സംരംഭത്തെ OYO (On Your Own) Rooms എന്ന് പുനർനാമകരണം ചെയ്തത്.

വിജയത്തിന്റെ അടിത്തറ

ഒയോ റൂമ്സിന്റെ ലക്ഷ്യം ബജറ്റ് ട്രാവലർമാർക്ക് അവരെ മനസ്സിലാക്കാവുന്ന ചെറിയ വിലയ്ക്ക് തൃപ്തികരമായ താമസം ഒരുക്കുക എന്നതാണ്. ഇന്ത്യയിലുടനീളം, ചെറിയ ഹോട്ടലുകളെ ഒയോയുടെ ബ്രാൻഡിൽ ബന്ധപ്പെടുത്തി, അവയെ തത്കാലിക താമസ സൗകര്യങ്ങൾ ആയി മാറ്റി. ഇതേത്തുടർന്ന് ഒയോ റൂമ്സ് ബിസിനസ് മോഡൽ വളരെ വേഗത്തിൽ ആളുകളുടെ ശ്രദ്ധ നേടി.

ആഗോള വിപുലീകരണം

2015-ൽ, ഒയോ ഇന്ത്യയ്ക്കു പുറത്തേക്കും ചുവടുവെച്ചു. നേപ്പാൾ, മലേഷ്യ, യു.എ.ഇ, ചൈന, യൂറോപ്പ് തുടങ്ങിയ രാജ്യങ്ങളിൽ ഒയോ തങ്ങളുടെ ബ്രാൻഡ് സാന്നിധ്യം സ്ഥാപിച്ചു. 2018-ൽ, സോഫ്റ്റ്ബാങ്ക് (SoftBank Vision Fund) ഒയോയിലേക്ക് വലിയതോതിൽ നിക്ഷേപം നടത്തി. ഇതോടെ, ഒയോ ലോകത്തിലെ വൻ ഹോസ്പിറ്റാലിറ്റി ശൃംഖലയായി വളർന്നു.

പ്രതിസന്ധികളും തിരിച്ചടികളും

ഒയോ റൂമ്സിന്റെ വളർച്ചയും വ്യാപ്തിയും അതിനോടൊപ്പം പ്രതിസന്ധികളും കൂട്ടിക്കൊണ്ടുവന്നു. ഹോട്ടൽ ഉടമകളുമായി തർക്കങ്ങൾ, സാമ്പത്തിക പ്രശ്നങ്ങൾ, കോവിഡ്-19 മഹാമാരി എന്നിവ ഹോസ്പിറ്റാലിറ്റി വ്യവസായത്തിനൊപ്പം തന്നെ ഓയോയ്ക്കും വലിയ ആഘാതം നൽകി. എന്നിരുന്നാലും, റിതേഷ് അഗർവാളിന്റെ നേതൃത്വത്തിൽ ഒയോ സങ്കടങ്ങൾ മറികടന്ന് മുന്നോട്ടുപോയി.

ഇന്നത്തെ ഒയോ

ഇന്ന് ഒയോ, 50,000-ലേറെ ഹോട്ടലുകളും, 1.5 ലക്ഷം റൂമുകളും, അന്താരാഷ്ട്ര തലത്തിലും സേവനങ്ങൾ നൽകുന്ന ഗ്ലോബൽ ഹോസ്പിറ്റാലിറ്റി ബ്രാൻഡായി മാറി. റിതേഷ് അഗർവാൾ ഇന്ത്യൻ സ്റ്റാർട്ടപ്പ് രംഗത്ത് ഒരു പ്രചോദനാത്മക പ്രതീകം ആണ്.