ദില്ലി: രാജ്യത്ത് പെട്രോള് ഉപഭോഗം മാര്ച്ചില് വര്ധിച്ചതായി റിപ്പോര്ട്ട്. തൊട്ട് മുന്പുളള നാല് മാസത്തെ അപേക്ഷിച്ചാണ് മാര്ച്ചില് പെട്രോള് ഉപഭോഗത്തിലുളള വര്ധനവ്. പ്രതിദിനം 88380 ടണ് ശരാശരി വര്ധനവ് ആണ് പെട്രോള് ഉപഭോഗത്തിലുണ്ടായിരിക്കുന്നത്. രാജ്യത്ത് കൊവിഡ് രണ്ടാം തരംഗം ശക്തമായിരിക്കെയാണ് പെട്രോള് ഉപഭോഗത്തില് ഈ വര്ധനവ് രേഖപ്പെടുത്തിയിരിക്കുന്നത്.
കൊവിഡ് ആദ്യ തരംഗത്തിന്റെ പശ്ചാത്തലത്തില് രാജ്യത്ത് ലോക്ക്ഡൗണ് പ്രഖ്യാപിച്ചതാണ് ഇന്ധന വില്പന കുത്തനെ ഇടിയാന് കാരണമായത്. ഡീസല് വില്പന ആണ് ഏറ്റവും കൂടുതല് ഇടിഞ്ഞത്. 2020 മാര്ച്ച് മുതല്ക്കേയാണ് ഇന്ധന ഉപഭോഗം ഇടിയാന് ആരംഭിച്ചത്. ഇത് ഫെബ്രുവരി വരെ തുടര്ന്നു. 2020 മാര്ച്ചുമായി താരതമ്യം ചെയ്യുമ്പോള് ഇന്ധന ഉപഭോഗം ഈ മാര്ച്ചില് 27 ശതമാനം ആണ് വര്ധിച്ചിരിക്കുന്നത്.
അതേസമയം രാജ്യത്ത് പെട്രോള്, ഡീസല് വില മാറ്റമില്ലാതെ തുടരുകയാണ്. തുടര്ച്ചയായ പതിനഞ്ചാം ദിവസമാണ് പെട്രോള്, ഡീസല് വില മാറ്റമില്ലാതെ തുടരുന്നത്. രാജ്യതലസ്ഥാനമായ ദില്ലിയില് പെട്രോള് ലിറ്ററിന് 90. 56 രൂപയാണ് വില. ഡീസലിന് വില 80. 87 രൂപയാണ്. മെട്രോ നഗരങ്ങളില് മുംബൈയില് ആണ് പെട്രോള്-ഡീസല് വില ഏറ്റവും കൂടുതല്. മുംബൈയില് പെട്രോള് ലിറ്ററിന് 96.98 രൂപയും ഡീസലിന് 87.96 രൂപയുമാണ് വില.