പെട്രോള്‍, ഡീസല്‍ വില വീണ്ടും കൂടി; അറിയാം ഇന്നത്തെ നിരക്കുകള്‍

തിരുവനന്തപുരം: രണ്ടു ദിവസത്തെ ഇടവേളയ്ക്ക് ശേഷം സംസ്ഥാനത്ത് വീണ്ടും ഇന്ധനവില കൂടി. പെട്രോളിന് 35 പൈസയും ഡീസലിന് 37 പൈസയുമാണ് ഇന്ന് വില വര്‍ധിച്ചത്. ഇതോടെ തിരുവനന്തപുരത്ത് പെട്രോള്‍ ലീറ്റര്‍ വില 92.81 രൂപയായി. ഡീസല്‍ നിരക്ക് 87.38 രൂപയും. കൊച്ചിയില്‍ 91.20 രൂപയാണ് ഒരു ലീറ്റര്‍ പെട്രോളിന് വില. ഡീസല്‍ നിരക്ക് 85.86 രൂപ.

രാജ്യത്തെ മറ്റു പ്രധാന നഗരങ്ങളിലും ഇന്ധനവില വര്‍ധിച്ചിട്ടുണ്ട്. തലസ്ഥാനമായ ദില്ലിയില്‍ പെട്രോളിന് 25 പൈസയും ഡീസലിന് 35 പൈസയും കൂടി. ഈ പശ്ചാത്തലത്തില്‍ ദില്ലിയില്‍ ഒരു ലീറ്റര്‍ പെട്രോളിന് ഇന്ന് 90.83 രൂപയാണ് നിരക്ക്. ഒരു ലീറ്റര്‍ ഡീസലിന് 81.32 രൂപയും.

മുംബൈയില്‍ ചിത്രം കുറച്ചുകൂടി രൂക്ഷമാണ്. 37 പൈസ പെട്രോളിനും 38 പൈസ ഡീസലിനും നഗരത്തില്‍ കൂടി. ഇതോടെ 97.34 രൂപയായി മുംബൈയില്‍ പെട്രോള്‍ വില. ഡീസല്‍ വില 88.44 രൂപയും.

ബെംഗളൂരുവില്‍ പെട്രോളിന് 93.98 രൂപയും ഡീസലിന് 86.21 രൂപയുമാണ് ചൊവാഴ്ച്ച നിരക്ക്. ഇതേസമയം, ഇന്ധനവില നിയന്ത്രണമില്ലാതെ കുതിക്കുന്ന പശ്ചാത്തലത്തില്‍ നാല് ഇന്ത്യന്‍ സംസ്ഥാനങ്ങള്‍ പെട്രോളിനും ഡീസലിനും നികുതിയിളവ് പ്രഖ്യാപിച്ചിട്ടുണ്ട്. പശ്ചിമ ബംഗാള്‍, രാജസ്താന്‍, അസം, മേഘാലയ സര്‍ക്കാരുകളാണ് ഇന്ധനനികുതി കുറയ്ക്കാന്‍ തീരുമാനിച്ചത്.

രാജസ്താനില്‍ അശോക് ഗെലോട്ടിന്റെ നേതൃത്വത്തിലുള്ള കോണ്‍ഗ്രസ് സര്‍ക്കാര്‍ ഇന്ധനങ്ങള്‍ക്ക് മേലുള്ള മൂല്യവര്‍ധിത നികുതി ചുരുക്കി. പെട്രോള്‍ ലീറ്ററിന് 38 പൈസയും ഡീസല്‍ ലീറ്ററിന് 36 പൈസയും വീതമാണ് രാജസ്താന്‍ സര്‍ക്കാര്‍ നികുതി കുറച്ചത്. എങ്കിലും ഗംഗാനഗര്‍, ഹനുമാന്‍ഗര്‍ ജില്ലകളില്‍ പെട്രോള്‍ വില ഇപ്പോഴും 100 രൂപയ്ക്ക് മുകളില്‍ തുടരുകയാണ്.

പെട്രോളിനും ഡീസലിനും ലീറ്ററിന് 1 രൂപ വീതം നികുതി കുറയ്ക്കാനാണ് പശ്ചിമ ബംഗാള്‍ സര്‍ക്കാര്‍ നടപടിയെടുത്തത്. തിരഞ്ഞെടുപ്പ് അടുത്തിരിക്കുന്ന അസമും പെട്രോള്‍, ഡീസല്‍ നികുതി വെട്ടിച്ചുരുക്കി. ഇതോടെ ഇന്ധനവില 5 രൂപയോളമാണ് സംസ്ഥാനത്ത് കുറഞ്ഞത്.
മേഘാലയ സര്‍ക്കാരാണ് ഏറ്റവും വലിയ നികുതിയിളവ് പ്രഖ്യാപിച്ചത്. പെട്രോളിന് 20 ശതമാനവും ഡീസലിന് 31.62 ശതമാനവും മൂല്യവര്‍ധിത നികുതി മേഘാലയ കുറച്ചു.

ഈ പശ്ചാത്തലത്തില്‍ പെട്രോള്‍ ലീറ്റിന് 7.4 രൂപയും ഡീസല്‍ ലീറ്ററിന് 7.1 രൂപയും സംസ്ഥാനത്ത് കുറഞ്ഞു. രാജ്യാന്തര വിപണിയില്‍ അസംസ്‌കൃത എണ്ണയുടെ വില വര്‍ധിക്കുന്നതും ഡോളര്‍ ശക്തി പ്രാപിക്കുന്നതുമാണ് ഇന്ത്യയില്‍ ഇന്ധനവില കൂടാനുള്ള പ്രധാന കാരണം.