പി.എഫ് അക്കൗണ്ട് ഓൺലൈനായി ട്രാൻസ്ഫർ ചെയ്യാം; ഈ 5 സ്റ്റെപ്പുകൾ മറക്കാതെ ചെയ്യണേ....

ശമ്പളമുള്ള എല്ലാ ജീവനക്കാർക്കും കിട്ടുന്ന ഒരു റിട്ടയർമെന്റ് ആനുകൂല്യ പദ്ധതിയാണ് പ്രൊവിഡന്റ് ഫണ്ട് അഥവാ പിഎഫ്. ഭാവിയിലേക്കുള്ള ചെറിയൊരു കരുതൽ തുക പോലെയാണ് പ്രൊവിഡന്റ് ഫണ്ടിനെ കണക്കാക്കുന്നത്. ജോലി ചെയ്യുന്നവരുടെ പേ സ്ലിപ്പിൽ കാണുന്ന വാക്കാണ് ഇ.പി.എഫ്. എന്നത്. എന്നാൽ അത് എന്താണെന്ന് അറിയാത്ത പലരും ഇന്നും ഉണ്ടാവും.

എംപ്ലോയി പ്രൊവിഡന്റ് ഫണ്ട് അഥവാ ഇ.പി.എഫ്. ശമ്പളമുള്ള ജീവനക്കാർക്ക് വേണ്ടി കേന്ദ്ര സർക്കാരിനു കീഴിലുള്ള പദ്ധതിയാണിത്. ഇതു വഴി ആദായ നികുതിയിളവുകൾ ലഭിക്കും. നിങ്ങളുടെ അടിസ്ഥാന ശമ്പളത്തിന്റെ 10 ശതമാനം ആണ് പി എഫിലേക്കുള്ള സംഭാവനയായി എടുക്കുക. എന്നാൽ ഇ.പി.എഫ് ഒരു നിർബന്ധിതമായ സർവ്വീസ് അല്ല. നിങ്ങളുടെ താത്പര്യ പ്രകാരം ഇത് തിരഞ്ഞെടുക്കാൻ സാധിക്കും.

പി.എഫ് അക്കൗണ്ടുകളെ കുറിച്ച് കുടുതൽ വിവരങ്ങൾ ഇത് ഉപയോ​ഗിക്കുന്നവർക്കു പോലും അറിയില്ല എന്നതാണ് സത്യം. മാത്രമല്ല ഇപിഎഫിനൊപ്പം ഒരു പ്രത്യേക എംപ്ലോയി പെൻഷൻ സ്കീം (ഇപിഎസ്) അക്കൗണ്ടും ട്രാൻസ്ഫർ ചെയ്യേണ്ടത് ആവശ്യമാണെന്നും എല്ലാവർക്കും അറിയില്ല. ജോലി മാറിയതിന് ശേഷം ഇപിഎഫ് അക്കൗണ്ട് പുതിയ തൊഴിലുടമയിലേക്ക് മാറ്റണം. ഇതോടൊപ്പം, ഇപിഎസ് അക്കൗണ്ടും ട്രാൻസ്ഫർ ചെയ്യണം, ഇതിന് പെൻഷൻ സർട്ടിഫിക്കറ്റ് ആവശ്യമാണ്.

ഇപിഎസ് കൈമാറ്റം ചെയ്തില്ലെങ്കിൽ, ഇപിഎഫിൽ നിന്ന് പിൻവലിക്കുമ്പോൾ പ്രശ്നങ്ങൾ ഉണ്ടാകാം. അംഗം ഇപിഎഫ് തുക പിൻവലിച്ചാലും പെൻഷൻ സർട്ടിഫിക്കറ്റ് വേണ്ടി വരും. നേരത്തേ തൊഴില്‍ ദാതാവിന് മാത്രമാണ് വിവരങ്ങള്‍ ഇ.പി.എഫ്.ഒ സിസ്റ്റത്തില്‍ പുതുക്കാന്‍ സാധിച്ചിരുന്നത്. ഇപ്പോൾ ഇ.പി.എഫ്.ഒ അംഗങ്ങൾക്കും ഓൺലൈനായി വിവരങ്ങൾ ശേഖരിക്കാം.

ഇപിഎഫ് അക്കൗണ്ട് എങ്ങനെ ട്രാൻസ്ഫർ ചെയ്യാമെന്നും 5 സ്റ്റെപ്പുകളിലൂടെ ഈ ടാസ്ക് എങ്ങനെ പൂർത്തിയാക്കാമെന്നും പരിശോധിക്കാം..

• ആദ്യം യുഎഎൻ നമ്പറും പാസ്‌വേഡും ഉപയോഗിച്ച് ഇസേവ പോർട്ടലിലേക്ക് ലോഗിൻ ചെയ്യുക.

• ലോഗിൻ ചെയ്ത ശേഷം, ഓൺലൈൻ സേവനത്തിന് താഴെയുള്ള 'വൺ മെമ്പർ- വൺ ഇപിഎഫ് അക്കൗണ്ട്' എന്നതിൽ ക്ലിക്ക് ചെയ്യുക.

• ഇനി നിങ്ങളുടെ പിഎഫ് അക്കൗണ്ടും വ്യക്തിഗത വിവരങ്ങളും പരിശോധിക്കുക. പിന്നീട് ​ഗെറ്റ് ഡീറ്റേയിൽസ് എന്നതിൽ പരിശോധിക്കുക. അതിന് കീഴിൽ പഴയ അക്കൗണ്ടിൻ്റെ വിശദാംശങ്ങൾ ദൃശ്യമാകും.

• ഒരു തൊഴിലുടമയെ തിരഞ്ഞെടുത്ത് മെമ്പർ ഐഡി / യു.എ.എൻ നൽകുക. ഇപ്പോൾ OTP വരും, അത് പൂരിപ്പിച്ച് സമർപ്പിക്കണം.

• അവസാന ഘട്ടത്തിൽ, 'ഫോം 13' ൻ്റെ പ്രിൻ്റൗട്ട് എടുത്ത് അതിൽ ഒപ്പിടുക. ഈ ഫോം 10 ദിവസത്തിനകം തൊഴിലുടമയ്ക്ക് സമർപ്പിക്കണം.

• ഇതിന് ശേഷം നിങ്ങളുടെ പിഎഫ് അക്കൗണ്ട് ട്രാൻസ്ഫർ ചെയ്യും. കൂടാതെ പെൻഷൻ അക്കൗണ്ടും ട്രാൻസ്ഫർ ചെയ്യാം.