ഫോൺപേ റെക്കോർഡിന്റെ നിറവിൽ: യുപിഐ ഇടപാട് ഒരു ബില്യൺ കവിഞ്ഞു, വ്യാപാരികൾക്കിടയിൽ പ്രചാരമേറി

ദില്ലി: ഓൺലൈൻ പേയ്മെന്റ് ആപ്പ് ഫോൺ പേയിൽ റെക്കോർഡ് സാമ്പത്തിക ഇടപാട്. മാർച്ചിൽ യുപിഐയിലെ ഇടപാടുകളുടെ എണ്ണം ഒരു ബില്യൺ മറികടന്നതായി ഫോൺ‌പേ വ്യാഴാഴ്ചയാണ് അറിയിച്ചിട്ടുള്ളത്. ഇന്ത്യയിൽ ഈ നേട്ടം കൈവരിക്കുന്ന ആദ്യത്തെ പേയ്മെന്റ് ആപ്പാണ് ഫോൺ പേ. കഴിഞ്ഞ മാസം വാലറ്റ്, എടിഎം കാർഡുകൾ, യുപിഐ എന്നിവയുടെ പേയ്‌മെന്റ് ഓഫറുകളിലൂടെ ഫോൺ‌പെയിൽ മൊത്തത്തിൽ 1.3 ബില്യൺ ഇടപാടുകൾ നടന്നിട്ടുണ്ടെന്നാണ് ഫോൺ പേ വ്യക്തമാക്കിയിട്ടുള്ളത്. മാർച്ചിൽ വാർഷിക പേയ്‌മെന്റിന്റെ മൂല്യം 388 ബില്യൺ ഡോളറിലെത്തിയെന്നും ഫോൺപേ അവകാശപ്പെടുന്നു.

കഴിഞ്ഞ ഡിസംബറിലാണ് വിപണിയിൽ ഫോൺപേ മേൽക്കൈ നേടുന്നത്. ഇതോടെ വ്യാപാരികൾക്കിടയിലും ആപ്പിന് പ്രചാരം ലഭിച്ചതോടെ ആപ്പിന്റെ വളർച്ച ആരംഭിക്കുകയായിരുന്നു. ഇതോടെ കഴിഞ്ഞ ഡിസംബറിൽ 902.03 ആയിരുന്ന യുപിഐ ഇടപാട് 2021 ഫെബ്രുവരിയിൽ 975.53 മില്യണിലെത്തുകയും ചെയ്തിരുന്നു. ഡിജിറ്റൽ ഇടപാടുകൾ വർധിച്ചതോടെ ഇന്ത്യയിൽ സ്വാധീനം ഉറപ്പിക്കാനുള്ള ശ്രമത്തിലാണ് ഫോൺ പേ.

യുപിഐ വഴിയുള്ള വ്യാപാര ഇടപാടുകൾ 2020 ഒക്ടോബർ മുതൽ 2021 ഫെബ്രുവരി വരെയുള്ള കാലയളവിനുള്ളിൽ 20 ശതമാനം വർധനവാണ് രേഖപ്പെടുത്തിയിട്ടുള്ളത്. പിയർ-ടു-പിയർ (പി 2 പി) ഇടപാടുകൾ ഈ കാലയളവിൽ 4.5% വളർച്ചയും കൈവരിച്ചിട്ടുണ്ട്. അതേ സമയം യുപിഐ വഴിയുള്ള ഡിജിറ്റൽ പേയ്‌മെന്റുകൾ കഴിഞ്ഞ ഒരു വർഷത്തിൽ ഇരട്ടിയിലധികമായിട്ടുണ്ട്. 2021 മാർച്ചിൽ യുപിഐ ഇടപാടുകളുടെ എണ്ണത്തിൽ 20 ശതമാനം വർധനയുണ്ടായി. 2021 ഫെബ്രുവരിയിൽ മൊത്തം ഇടപാടുകൾ 2.29 ബില്ല്യൺ ആയിരുന്നു. മാർച്ചിൽ ഇത് 5 ലക്ഷം കോടിയിലധികം വർധിച്ചു. മാസം തോറും 18% വർദ്ധനവും രേഖപ്പെടുത്തിയിട്ടുണ്ട്.