അയ്യപ്പ ഭക്തർ ശ്രദ്ധിക്കുക: ശബരിമലക്ക് പോകാൻ പ്ലാനുണ്ടോ? ദർശനത്തിനുള്ള പ്രധാന മാർഗ്ഗനിർദ്ദേശങ്ങൾ അറിയാം

കേരളീയ ഹൈന്ദവ ഭക്തിയുടെ പാരമ്യം വിളിച്ചോതുന്ന മണ്ഡലമാസം ആരംഭിച്ചതോടെ കേരളം ഭക്തിസാന്ദ്രമായി. കറുത്ത വസ്ത്രമണിഞ്ഞ്, മാലയിട്ട്, വ്രതാനുഷ്ഠാനങ്ങളോടെ ശബരിമല ധർമ്മശാസ്താ ദർശനത്തിനായി ഒരുങ്ങുന്ന അയ്യപ്പഭക്തരെ കേരളത്തിലുടനീളം കാണാം. കേരളത്തിന് പുറത്തുനിന്നും ലോകത്തിന്റെ വിവിധ ഭാഗങ്ങളിൽ നിന്നുമുള്ള ഭക്തജനങ്ങളുടെ ഒരു വലിയ പ്രവാഹമാണ് ഓരോ മണ്ഡലകാലത്തും ശബരിമലയിലേക്ക് ഒഴുകിയെത്തുന്നത്. ഓരോ വർഷം കഴിയുന്തോറും ശബരിമലയിലെത്തുന്ന തീർത്ഥാടകരുടെ എണ്ണത്തിൽ ഗണ്യമായ വർധനവാണ് രേഖപ്പെടുത്തുന്നത്. ഈ വർഷവും അഭൂതപൂർവമായ തിരക്കാണ് ശബരിമലയിൽ അനുഭവപ്പെടുന്നത്.

മണ്ഡല-മകരവിളക്ക് തീർത്ഥാടനത്തിനായി ശബരിമലയിൽ പോകുന്നതിന് മറ്റ് ക്ഷേത്ര ദർശനങ്ങളേപ്പോലെ നിസ്സാരമായ ഒരു യാത്രയായി കാണാൻ കഴിയില്ല. ശബരിമല യാത്രയുടെ ഏറ്റവും പ്രധാനപ്പെട്ട ഭാഗം 41 ദിവസത്തെ കഠിനമായ വ്രതാനുഷ്ഠാനമാണ്. മനസ്സും ശരീരവും അയ്യനിൽ സമർപ്പിച്ചുകൊണ്ട് വേണം ഓരോ ഭക്തനും യാത്രയ്ക്ക് തയ്യാറെടുക്കാൻ. വ്രതത്തിലൂടെയുള്ള ആത്മീയ വിശുദ്ധി, ലളിത ജീവിതം, ബ്രഹ്മചര്യം എന്നിവയാണ് ശബരിമല തീർത്ഥാടനത്തിന്റെ മുഖമുദ്ര.

ഈ വർഷത്തെ മണ്ഡലകാലം നവംബർ 17-നാണ് ആരംഭിച്ചതെങ്കിലും, ആചാരപരമായ ചടങ്ങുകൾക്കായി ശബരിമല ക്ഷേത്രനട അതിന് തലേദിവസം, അതായത് നവംബർ 16-ന് ഞായറാഴ്ച തന്നെ തുറന്നു. ഇത്തവണ നിങ്ങളും ശബരിമല സന്നിധിയിലേക്ക് പോകുന്നുണ്ടോ? നിങ്ങൾ കേരളത്തിൻ്റെ പുറത്ത് നിന്നാണോ വരുന്നത്? പേടിക്കേണ്ട, ശബരിമലക്ക് പോകുന്നതിനു മുന്നേ ഈ കാര്യങ്ങൾ അറിഞ്ഞിരിക്കണം;

1. പ്രായ നിയന്ത്രണങ്ങൾ

സ്ത്രീകൾക്ക് ശബരിമലയിൽ പ്രവേശിക്കാൻ സാധിക്കില്ല. അതായത് 10 നും 50 നും ഇടയിൽ പ്രായമുള്ള സ്ത്രീകൾക്കാണ് ഈ വിലക്കുള്ളത്. യാത്ര മധ്യേ തിരിച്ചറിയൽ രേഖ പരിശോധിക്കുന്നതിനാൽ പ്രായം ശ്രദ്ധിക്കുന്നത് നല്ലതാണ്.

2. വ്രതം

ശബരിമല സന്ദർശിക്കുന്നതിന് മുമ്പ് ഭക്തർ 41 ദിവസത്തെ വ്രതം അനുഷ്ഠിക്കേണ്ടതുണ്ട്. ഈ സമയത്ത് ബ്രഹ്മചര്യം അനുഷ്ഠിക്കുകയും മത്സ്യ-മാംസം ഉപേക്ഷിക്കുകയും വേണം.

3. വസ്ത്രധാരണ രീതി

മാലയിട്ടാൽ കറുപ്പ് അല്ലെങ്കിൽ നീല മുണ്ടുകൾ വസ്ത്രങ്ങൾ മാത്രം ധരിക്കുക. ശബരിമല യാത്രയ്ക്ക് അത്യാവശ്യ സാധനങ്ങൾ മാത്രം പാക്ക് ചെയ്യുക.

4. മൊബൈൽ ഫോണുകളുടെ നിയന്ത്രണം

മൊബൈൽ ഫോണുകൾ, ക്യാമറകൾ, മറ്റ് ഇലക്ട്രോണിക് ഉപകരണങ്ങൾ എന്നിവ സാധാരണയായി ക്ഷേത്ര സമുച്ചയത്തിനുള്ളിൽ അനുവദനീയമല്ല. തീർത്ഥാടകർ ക്ഷേത്രത്തിനുള്ളിൽ പ്രവേശിക്കുമ്പോൾ ഇവ ഉപയോ​ഗിക്കരുത്.

5. വഴിപാടുകളും ആചാരങ്ങളും

വ്രതമെടുത്ത് ശബരിമലക്ക് പോകുമ്പോൾ ഇരുമുടിക്കെട്ട് നിർബന്ധമാണ്. അതിൽ തേങ്ങ , നെയ്യ് , അരി എന്നിവ ഉണ്ടായിരിക്കണം. ഇരുമുടിക്കെട്ടില്ലാത്ത ഭക്തർക്ക് 18ാം പടി ചവിട്ടാൻ സാധിക്കില്ല.

രജിസ്ട്രേഷൻ നിർബന്ധം

ഓരോ വർഷവും ഭക്തരുടെ തിരക്ക് വർദ്ധിക്കുന്നു. അതിനാൽ തിരക്ക് നിയന്ത്രിക്കുന്നതിന് എല്ലാ തീർത്ഥാടകരും ഔദ്യോഗിക ശബരിമല ഓൺലൈൻ പോർട്ടൽ വഴി വെർച്വൽ ക്യൂ ബുക്ക് ചെയ്യണം. വെർച്വൽ ക്യൂ ലഭിക്കാത്തവർക്ക് സ്പോട്ട് ബുക്കിം​ഗ് സംവിധാനവും ഏർപ്പെടുത്തിയിട്ടുണ്ട്. എന്നാൽ അതും നിയന്ത്രിത എണ്ണത്തിലാണ് ബുക്കിം​ഗ് നടത്തുന്നത്. അതിനാൽ സ്പോട്ട് ബുക്ക് ചെയ്യാനുള്ളവർ നേരത്തെ തന്നെ എത്തിച്ചേരുക.

സ്പോട്ട് ബുക്കിം​ഗ് സമയത്ത് കൈവശം നിങ്ങളുടെ തിരിച്ചറിയൽ രേഖ ഉണ്ടായിരിക്കണം. നിലയ്ക്കലും വണ്ടിപ്പെരിയാറിലുമാണ് നിലവിൽ സ്പോട്ട് ബുക്കിം​ഗ് സംവിധാനമുള്ളത്.

ഈ വർഷം അയ്യനെ കാണാനെത്തുന്ന ഭക്തർ ഈ നിയമങ്ങളെല്ലാം പരമാവധി പാലിക്കാൻ ശ്രദ്ധിക്കുക. തിരക്ക് നിയന്ത്രിക്കുന്നതിനൊപ്പം എല്ലാ ഭക്തർക്കും സുഖകരമായ തീർത്ഥാടന കാലവും ഉറപ്പാക്കാൻ ഇതിലൂടെ സാധിക്കും.