സ്ഥിര നിക്ഷേപത്തെ മറന്നേക്കു, നിക്ഷേപത്തിന് കൂടുതൽ പലിശ ഇവിടെയുണ്ട്, പരീക്ഷിക്കുന്നോ..?

ഏറ്റവും സുരക്ഷിത സാമ്പത്തിക നിക്ഷേപ മാർഗം ഏതാണ് എന്ന ചോദ്യത്തിന് സ്ഥിര നിക്ഷേപം എന്നായിരിക്കും പലരും പറയുന്ന ഉത്തരം. നിക്ഷേപിക്കുന്ന പണത്തിന്‍റെ സുരക്ഷ, കൃത്യമായ പലിശ തുടങ്ങിയ കാര്യങ്ങൾ ചൂണ്ടിക്കാട്ടിയാണ് പലരും ഈ ഉത്തരം പറയുന്നത്. എന്നാൽ ബാങ്ക് സ്ഥിര നിക്ഷേപത്തേക്കാൾ പലിശയും സുരക്ഷയുമുള്ള നിരവധി പോസ്റ്റ് ഓഫീസ് നിക്ഷേപ പദ്ധതികളുണ്ട്. അവയിൽ പല സ്കീമുകളും ഇപ്പോഴും 7 ശതമാനത്തിൽ കൂടുതൽ പലിശ നൽകുന്നവയാണ്. അതോടൊപ്പം നികുതി ഇളവുകളും നൽകുന്നു. ഏതൊക്കെയാണ് ആ പദ്ധതികൾ എന്ന് നോക്കാം.

1. സീനിയർ സിറ്റിസൺസ് സേവിംഗ്സ് സ്കീം

അറുപത് വയസ്സ് പ്രായമുള്ള വ്യക്തികൾക്കോ 55 വയസ്സിന് മുകളിലുള്ള 60 വയസ്സിന് താഴെയുള്ള ജീവനക്കാർക്കോ വേണ്ടിയുള്ള പദ്ധതി. ഈ സ്കീമിന് സർക്കാർ നിലവിൽ 8.2 ശതമാനം വാർഷിക പലിശ നൽകുന്നു. പരമാവധി 30 ലക്ഷം രൂപ വരെ പദ്ധതിയിൽ നിക്ഷേപിക്കാം. നികുതി ഇളവിനെക്കുറിച്ച് പറയുകയാണെങ്കിൽ, ഈ സ്കീമിലെ നിക്ഷേപം സെക്ഷൻ 80C പ്രകാരം 1.5 ലക്ഷം രൂപ വരെ നികുതി ഇളവ് നൽകുന്നു.

2. സുകന്യ സമൃദ്ധി യോജന

നിങ്ങളുടെ മകൾക്ക് 10 വയസ്സിന് താഴെ പ്രായമുണ്ടെങ്കിൽ, സുകന്യ സമൃദ്ധി യോജനയിൽ നിക്ഷേപിക്കുന്നത് ഒരു മികച്ച ഓപ്ഷനാണ്. പദ്ധതി 8.2% പലിശ നിരക്കും വാഗ്ദാനം ചെയ്യുന്നു. പദ്ധതിയുടെ ഏറ്റവും വലിയ നേട്ടം നിക്ഷേപത്തിന് നികുതി ഇളവ് മാത്രമല്ല, പലിശയും കാലാവധി പൂർത്തിയാകുന്ന തുകയും പൂർണ്ണമായും നികുതി രഹിതമാണ് എന്നതാണ്. ഏറ്റവും കുറഞ്ഞ വാർഷിക നിക്ഷേപം 250 രൂപയും പരമാവധി 1.5 ലക്ഷം രൂപയുമാണ്.

3. നാഷണൽ സേവിംഗ്സ് സർട്ടിഫിക്കറ്റ്

പദ്ധതി നിലവിൽ 7.7% വാർഷിക കോമ്പൗണ്ട് പലിശ ലഭിക്കുന്നു. പലിശ എല്ലാ വർഷവും വീണ്ടും നിക്ഷേപിക്കുകയും കാലാവധി പൂർത്തിയാകുമ്പോൾ മുഴുവൻ പണവും ഒരുമിച്ച് ലഭിക്കുകയും ചെയ്യുന്നു. 80C പ്രകാരം ഇത് നികുതി ഇളവും വാഗ്ദാനം ചെയ്യുന്നു.

4. കിസാൻ വികാസ് പത്ര

സ്‌കീം നിങ്ങളുടെ നിക്ഷേപം 115 മാസത്തിനുള്ളില്‍ ഇരട്ടിയാക്കാന്‍ അനുവദിക്കുന്നു. നിലവില്‍ 7.5 ശതമാനം പലിശയാണ് കെവിപി വാഗ്ദാനം ചെയ്യുന്നത്.

5. പബ്ലിക് പ്രൊവിഡന്‍റ് ഫണ്ട്

പിപിഎഫ് സേവിംഗ്സ് അക്കൗണ്ടിന്‍റെ പലിശ നിരക്ക് പ്രതിവർഷം 7.1% ആണ്. പരമാവധി 1.50 ലക്ഷം രൂപയാണ് പിപിഎഫ് അക്കൗണ്ടില്‍ ഒരു വര്‍ഷം നിക്ഷേപിക്കാന്‍ സാധിക്കുക. ആദായനികുതി നിയമത്തിലെ സെക്ഷന്‍ 80 സി പ്രകാരം നിക്ഷേപിക്കുന്ന തുകയ്ക്ക് പൂര്‍ണമായും നികുതി ഇളവ് ലഭിക്കും.

6. പോസ്റ്റ് ഓഫീസ് പ്രതിമാസ വരുമാന പദ്ധതി

പദ്ധതിയിൽ ഒരു നിശ്ചിത തുക നിക്ഷേപിക്കാനും എല്ലാ മാസവും സ്ഥിരമായ പലിശ നേടുന്നതിനും സാധിക്കും. സിംഗിൾ അക്കൗണ്ട്, ജോയിന്‍റ് അക്കൗണ്ട് എന്നിങ്ങനെ നിക്ഷേപം ആരംഭിക്കാം. 7.40 ശതമാനം പലിശയാണ് പദ്ധതി വാഗ്ധാനം ചെയ്യുന്നത്.

7. പോസ്റ്റ് ഓഫീസ് ടൈം ഡെപ്പോസിറ്റ്

അഞ്ച് വര്‍ഷത്തേക്ക് നിങ്ങള്‍ നടത്തുന്ന നിക്ഷേപത്തിന് 7.5 ശതമാനം പലിശയാണ് സര്‍ക്കാര്‍ നല്‍കുന്നത്. എന്നാല്‍ നിക്ഷേപ കാലാവധിക്ക് അനുസരിച്ച് പലിശയുടെ കാര്യത്തില്‍ മാറ്റം സംഭവിക്കുന്നു. നിക്ഷേപ കാലാവധി 1 വർഷമാണെങ്കിൽ 6.9 ശതമാനം പലിശയും 2 വർഷമാണെങ്കിൽ 7 ശതമാനം പലിശയും അല്ല 3 വർഷമാണെങ്കിൽ 7.1 ശതമാനം പലിശയുമാണ് പദ്ധതി നൽകുന്നത്.

നികുതി ലാഭിക്കാനും ദീർഘകാല ലക്ഷ്യം നേടാനും ആഗ്രഹിക്കുന്ന നിക്ഷേപകർക്ക് ബാങ്ക് എഫ്ഡികളേക്കാൾ മികച്ച ഓപ്ഷനാണ് പോസ്റ്റ് ഓഫീസ് സ്കീമുകൾ. മുതിർന്ന പൗരന്മാർ, പെൺമക്കളുടെ മാതാപിതാക്കൾ, സുരക്ഷിത നിക്ഷേപം ആഗ്രഹിക്കുന്നവർ എന്നിവർ ഈ സ്കീമുകൾ പരിഗണിക്കാം.