10,000 രൂപവരെ പണമിടപാടുകൾ നടത്താവുന്ന പുതിയ പ്രീപെയ്‌ഡ് കാർഡ് പുറത്തിറക്കും

10,000 രൂപവരെയുള്ള പണമിടപാടുകൾ നടത്താൻ കഴിയുന്ന ഒരു പ്രീപെയ്‌ഡ് കാർഡ് പുറത്തിറക്കുമെന്ന് റിസർവ് ബാങ്ക് ഓഫ് ഇന്ത്യ അറിയിച്ചു. ഡിജിറ്റൽ ഇടപാടുകൾ പ്രോത്സാഹിപ്പിക്കുന്നതിന്റെ ഭാഗമായാണ് പ്രീപെയ്ഡ് പേയ്മെന്റ് ഇൻസ്ട്രമെന്റ്‌ (പിപിഐ) പുറത്തിറക്കുന്നത്. വാർത്താ അവലോകന യോഗത്തിന് ശേഷം പുറത്തിറക്കിയ വാർത്താകുറിപ്പിലാണ് ആർബിഐ അതികൃതർ ഈ കാര്യം അറിയിച്ചത്. ചരക്ക് സേവന ഇടപാടുകൾ നടത്താൻ മാത്രമേ ഈ കാർഡ് ഉപയോഗിക്കാൻ കഴിയൂ. ബാങ്ക് അക്കൗണ്ട് ഉപയോഗിച്ച് ഇത് റീ ചാർജ്ജ് ചെയ്യാം, മാസം 50,000 രൂപയാണ് പരമാവധി റീച്ചാർജ് ചെയ്യാൻ കഴിയുക. ഡിസംബർ 31-ന് മുൻപ് ഇതുമായി ബന്ധപ്പെട്ട കൂടുതൽ വിവരങ്ങൾ ആർബിഐ അറിയിക്കുന്നതാണ്.

പേടിഎം, മൊബിക്വിക് (സെമി-ക്ലോസ്‌ഡ് സിസ്റ്റം പിപിഐ), ഗിഫ്‌റ്റ് കാർഡ് (ക്ലോസ്‌ഡ് സിസ്റ്റം പിപിഐ), ട്രാവൽ, ഡെബിറ്റ്, ക്രെഡിറ്റ് കാർഡുകൾ (ഓപ്പൺ സിസ്റ്റം പിപിഐ) തുടങ്ങിയവയാണ് നിലവിലെ പിപിഐകൾ.

പി‌പി‌ഐകൾ‌ക്കായുള്ള ആർ‌ബി‌ഐ നിയമങ്ങൾ ഇവയാണ്:

1. ഉപഭോക്താവിന്റെ മിനിമം വിശദാംശങ്ങൾ രേഖപ്പെടുത്തികൊണ്ട് ബാങ്കുകൾക്കും, നോൺ-ബാങ്കിംഗ് സ്ഥാപനങ്ങൾക്കും 10,000 രൂപവരെ പണമിടപാടുകൾ നടത്താൻ കഴിയുന്ന പിപിഐ നൽകാൻ കഴിയും.

2. വൺ ടൈം പിൻ (ഒടിപി) അയച്ച് പരിശോധിച്ചുറപ്പിക്കാൻ കഴിയുന്ന മൊബൈൽ നമ്പർ, പേര്, തിരിച്ചറിയൽ കാർഡിന്റെ നമ്പർ തുടങ്ങിയവ പിപിഐ രജിസ്റ്റർ ചെയ്യാൻ ആവശ്യമാണ്.

3. ബാങ്ക് അക്കൗണ്ട് ഉപയോഗിച്ച് പിപിഐ റീചാർജ്ജ് ചെയ്യാൻ കഴിയും. ഒരു മാസം 10,000 രൂപ വരെയാണ് പിപിഐയിൽ റീച്ചാർജ്ജ് ചെയ്യാൻ കഴിയുക കൂടാതെ ഒരു സാമ്പത്തിക വർഷത്തിൽ മൊത്തം ഒരു ലക്ഷം രൂപവരെ റീച്ചാർജ്ജ് ചെയ്യാം.

4. ചരക്ക്, സേവന ഇടപാടുകൾ നടത്താൻ മാത്രമേ ഇത്തരം പിപിഐ ഉപയോഗിക്കാൻ കഴിയൂ. കൂടാതെ പി‌പി‌ഐകളിൽ നിന്ന് ബാങ്ക് അക്കൗണ്ടിലേക്കോ മറ്റ് പി‌പി‌ഐകളിലേക്കോ പണം കൈമാറ്റം ചെയ്യാൻ സാധിക്കില്ല.

5. പി‌പി‌ഐ ഉപയോഗിച്ച് ചരക്കുകളും സേവനങ്ങളും വാങ്ങുന്നതിന് പ്രത്യേക പരിധിയൊന്നുമില്ല, എന്നാൽ പി‌പി‌ഐ ഇഷ്യു ചെയ്യുന്നയാൾ പിപിഐ പരിധിക്കുള്ളിൽ ഈ ആവശ്യങ്ങൾക്ക് പരിധി തീരുമാനിച്ചേക്കാം.