ധനമന്ത്രി പങ്കെടുക്കാതെ, ബജറ്റിന് മുന്നോടിയായി വിദഗ്‍ധരുമായി പ്രധാനമന്ത്രിയുടെ ചര്‍ച്ച

ബജറ്റിന് മുന്നോടിയായി പ്രധാനമന്ത്രി നരേന്ദ്ര മോദി സാമ്പത്തിക വിദഗ്ധരുമായും വ്യവസായികളുമായും ഇന്നലെ കൂടിക്കാഴ്ച്ച നടത്തി. എന്നാൽ ധനമന്ത്രി ഇല്ലാതെ കൂടിക്കാഴ്ച്ച നടത്തിയതാണ് സമൂഹമാധ്യങ്ങളിൽ വാർത്തയായത്. കോൺഗ്രസ് എംപി ശശി തരൂറുൾപ്പെടെ നിരവധി പേർ ഇക്കാര്യം സംബന്ധിച്ച് ട്വീറ്റ് ചെയ്യുകയും ചെയ്തു. എന്തുകൊണ്ടാണ് ചര്‍ച്ചയില്‍നിന്ന് ധനമന്ത്രിയെ പുറത്താക്കിയതെന്നാണ് ശശി തരൂര്‍ എംപി ട്വീറ്റ് ചെയ്തത്.

ആഭ്യന്തരമന്ത്രി അമിത് ഷാ, വാണിജ്യമന്ത്രി പീയൂഷ് ഗോയൽ, ഗതാഗത, മൈക്രോ, ചെറുകിട, ഇടത്തരം സംരംഭ മന്ത്രി നിതിൻ ഗഡ്കരി എന്നിവരാണ് നിതി ആയോഗ് യോഗത്തിൽ പങ്കെടുത്ത മറ്റ് മന്ത്രിമാർ. എന്നാൽ ഫെബ്രുവരി ഒന്നിന് അവതരിപ്പിക്കുന്ന ബജറ്റിനെക്കുറിച്ച് പാർട്ടി സഹപ്രവർത്തകരിൽ നിന്ന് നിർദ്ദേശം തേടിയ ശേഷം സീതാരാമൻ ന്യൂഡൽഹിയിലെ ബിജെപി ആസ്ഥാനത്ത് തിരക്കിലായിരുന്നുവെന്നാണ് അധികൃതരുടെ വിശദീകരണം.

ധനമന്ത്രി പങ്കെടുക്കാതെ, ബജറ്റിന് മുന്നോടിയായി വിദഗ്‍ധരുമായി പ്രധാനമന്ത്രിയുടെ ചര്‍ച്ച

നിക്ഷേപത്തിലും ഉപഭോഗത്തിലും ഗണ്യമായ ഇടിവുണ്ടായതിനെത്തുടർന്ന് സമ്പദ്‌വ്യവസ്ഥ 11 വർഷത്തെ ഏറ്റവും താഴ്ന്ന നിരക്കായ 5 ശതമാനം വളർച്ച കൈവരിക്കുമെന്ന കണക്കാക്കപ്പെടുന്ന സമയത്താണ് നിർമ്മല സീതാരാമന്റെ രണ്ടാമത്തെ ബജറ്റ് അവതരണം. പ്രധാനമന്ത്രിയും മുകേഷ് അംബാനിയും രത്തൻ ടാറ്റയും ഉൾപ്പെടെയുള്ള ഉന്നത വ്യവസായികളും തമ്മിൽ ഈ ആഴ്ച ആദ്യം നടന്ന മറ്റൊരു യോഗത്തിലും സീതാരാമൻ പങ്കെടുത്തിരുന്നില്ല.

കഴിഞ്ഞ വർഷത്തെ, ബജറ്റിന് മുമ്പുള്ള നിതി ആയോഗ് യോഗത്തിലും സീതാരാമൻ പങ്കെടുത്തിരുന്നില്ല, എന്നാൽ ഗോയൽ പങ്കെടുക്കുകയും ചെയ്തിരുന്നു. മോദി സർക്കാരിന്റെ ആദ്യ ടേമിൽ അരുൺ ജെയ്റ്റ്‌ലി ധനമന്ത്രിയായിരുന്നപ്പോൾ പ്രധാനമന്ത്രിയും സാമ്പത്തിക വിദഗ്ധരും തമ്മിലുള്ള നിതി ആയോഗ് യോഗങ്ങളിൽ പങ്കെടുക്കുമായിരുന്നു.