ഖത്തര്‍ എയര്‍വേയ്‌സിന്റെ വന്‍ പ്രഖ്യാപനം; ടിക്കറ്റ് നിരക്ക് കൂട്ടില്ല, റീഫണ്ട് റെഡി

ദോഹ: ആഗോളതലത്തില്‍ മിക്ക വ്യോമയാന കമ്പനികളും പ്രതിസന്ധിയിലാണ്. ലോക്ക് ഡൗണ്‍ പ്രഖ്യാപിച്ചതോടെ സര്‍വീസ് നിലയ്ക്കുകയും ചെലവ് ചുരുക്കലിന്റെ ഭാഗമായി ജീവനക്കാരെ പിരിച്ചുവിടകയും ചെയ്തു. സമാനമായ നടപടികള്‍ ഖത്തര്‍ എയര്‍വേയ്‌സും സ്വീകരിച്ചിരുന്നു. എന്നാല്‍ പിരിച്ചുവിട്ടവരെ തിരിച്ചെടുക്കുമെന്ന സൂചനയാണ് കമ്പനി ഇപ്പോള്‍ നല്‍കിയിരിക്കുന്നത്. സര്‍വീസുകള്‍ പഴയപടി ആകുന്ന വേളയിലാണ് പിരിച്ചുവിട്ടവരെ തിരിച്ചെടുക്കുക.

മാത്രമല്ല, ടിക്കറ്റ് നിരക്ക് വര്‍ധിപ്പിക്കില്ലെന്നും ഖത്തര്‍ എയര്‍വേയ്‌സ് സിഇഒ അക്ബര്‍ അല്‍ ബക്കര്‍ പറഞ്ഞു. നഷ്ടം നികത്തുന്നതിന് മിക്ക വിമാന കമ്പനികളും ടിക്കറ്റ് നിരക്ക് ഉയര്‍ത്തുമെന്ന സാധ്യതകള്‍ നിലനില്‍ക്കവെയാണ് നിരക്ക് കൂട്ടില്ലെന്ന് ഖത്തര്‍ എയര്‍വേയ്‌സ് അറിയിച്ചിരിക്കുന്നത്. യാത്രക്കാര്‍ക്ക് താങ്ങാവുന്നതില്‍ അപ്പുറമുള്ള നിരക്കിലേക്ക് പോകില്ല. നിലവിലെ നിരക്ക് തുടരുമെന്നും ഖത്തര്‍ എയര്‍വേയ്‌സ് പറയുന്നു. ഖത്തര്‍ ടെലിവിഷന് നല്‍കിയ അഭിമുഖത്തില്‍ സംസാരിക്കുകയായിരുന്നു അക്ബര്‍ അല്‍ ബക്കര്‍.

കൊറോണ കാരണം യാത്ര റദ്ദാക്കേണ്ട സാഹചര്യമുണ്ടായിരുന്നു. എന്നാല്‍ ടിക്കറ്റ് തുക മടക്കി നല്‍കാന്‍ ഖത്തര്‍ എയര്‍വേയ്‌സ് തീരുമാനിച്ചു. റീഫണ്ടിന് വേണ്ടി 160 കോടി ഡോളറാണ് കമ്പനി അനുവദിച്ചിരിക്കുന്നത്. പല കമ്പനികളും വീണ്ടും യാത്രയ്ക്കുള്ള അവസരങ്ങള്‍ ഒരുക്കുന്ന വേളയിലാണ് ഖത്തര്‍ എയര്‍വേയ്‌സ് ടിക്കറ്റ് തുക മടക്കി നല്‍കുന്നത് എന്നും ശ്രദ്ധേയമാണ്.