പിഎം കെയേഴ്‌സ് ഫണ്ടിലേക്ക് 100 കോടി രൂപ സംഭാവന നല്‍കി രാധാകിഷൻ ദമാനി

കോവിഡ്-19 പ്രതിരോധ പോരാട്ടങ്ങൾക്കായി അവന്യൂ സൂപ്പര്‍മാർട്ട്സിന്റെ സ്ഥാപകനും ഡിമാര്‍ട്ട് പ്രമോട്ടറുമായ രാധാകിഷൻ ദമാനി 100 കോടി സംഭാവന നൽകി. പിഎം കെയേഴ്സ് ഫണ്ടിലേക്കാണ് സംഭാവന നൽകിയിരിക്കുന്നത്. മാത്രമല്ല നിരവധി സംസ്ഥാന ദുരിതാശ്വാസ ഫണ്ടുകളിലേക്കായി 55 കോടിയോളം രൂപ ദമാനി ഇതിനകം സംഭാവന നൽകിയിട്ടുണ്ട്. തന്റെ ഉടമസ്ഥതയിലുള്ള ഗ്രൂപ്പ് കമ്പനിയായ ബ്രൈറ്റ് സ്റ്റാർ ഇൻവെസ്റ്റ്‌മെൻറ് വഴിയാണ് ദമാനി സംഭാവന നൽകിയത്.

മഹാരാഷ്ട്രയ്‌ക്കും ഗുജറാത്തിനും 10 കോടി രൂപ വീതവും, ആന്ധ്രാപ്രദേശ്, തെലങ്കാന, കർണാടക, രാജസ്ഥാൻ, പഞ്ചാബ് എന്നീ സംസ്ഥാനങ്ങൾക്ക് 5 കോടി രൂപ വീതവും തമിഴ്‌നാട്, ഛത്തീസ്‌ഗഡ്, മധ്യപ്രദേശ്, ഉത്തർപ്രദേശ് എന്നിവയ്‌ക്ക് 2.5 കോടി വീതവുമാണ് കോവിഡ്-19 പ്രതിരോധ പോരാട്ടങ്ങൾക്കായി ദമാനി സംസ്ഥാന സർക്കാറുകൾക്ക് മാത്രമായി സംഭാവന നൽകിയിരിക്കുന്നത്.

നിരവധി സിനിമ താരങ്ങളും കായിക താരങ്ങളുമാണ് കോവിഡ്-19 പ്രതിരോധ പോരാട്ടങ്ങൾക്കായി രാജ്യത്തിന് സഹായവുമായി രംഗത്തെത്തിയത്. ഹോക്കി താരം ധൻ‌രാജ് പിള്ള പി‌എം കെയേഴ്‌സ് ഫണ്ടിലേക്ക് അഞ്ച് ലക്ഷം രൂപ സംഭാവന ചെയ്‌തു. പിഎം കെയേഴ്‌സ് ഫണ്ടിലേക്ക് 25 ലക്ഷം രൂപയാണ് ബോളിവുഡ് താരം കങ്കണ റണാവത് സംഭാവന നല്‍കിയത്. ദിവസക്കൂലിക്കാരുടെ കുടുംബത്തിന് അവശ്യ ഭക്ഷണസാധനങ്ങള്‍ വാങ്ങുന്നതിനായും സംഭാവന ചെയ്യുന്നതിനുള്ള പിന്തുണ അവര്‍ നല്‍കിയിരുന്നു. കൂടാതെ കങ്കണയുടെ അമ്മ ആശ ഒരു മാസത്തെ പെന്‍ഷന്‍ പിഎം കെയേഴ്‌സ് ഫണ്ടിലേക്ക് സംഭാവന ചെയ്‌തിരുന്നു.

മാർച്ച് 28 ശനിയാഴ്‌ചയാണ് പ്രധാനമന്ത്രി നരേന്ദ്ര മോദി കോവിഡ് -19 പ്രതിരോധ പ്രവർത്തനങ്ങൾക്ക് സംഭാവന നൽകുന്നതിനായി പ്രധാനമന്ത്രി സിറ്റിസൻ അസിസ്റ്റൻസ് ആൻഡ് റിലീഫ് ഇൻ എമർജൻസി ഫണ്ട് (പിഎം കെയേഴ്സ് ഫണ്ട്) എന്ന ചാരിറ്റബിൾ ട്രസ്റ്റ് രൂപീകരിച്ചത്. പകർച്ചവ്യാധിക്കെതിരെ പോരാടാൻ സഹായിക്കുന്നതിന് പിഎം-കെയേഴ്സ് ഫണ്ടിലേക്ക് സംഭാവന നൽകണമെന്ന് അദ്ദേഹം അന്ന് തന്നെ ജനങ്ങളോട് അഭ്യർത്ഥിച്ചിരുന്നു. പ്രധാനമന്ത്രിയുടെ പ്രഖ്യാപനത്തിന് ശേഷം അക്ഷയ് കുമാർ, അർജുൻ രാംപാൽ, കപിൽ ശർമ്മ, കാർത്തിക് ആര്യൻ തുടങ്ങി നിരവധി താരങ്ങൾ പ്രധാനമന്ത്രി കെയേഴ്‌സ് ഫണ്ടിലേക്ക് സംഭാവന ചെയ്തിരുന്നു.