ആർ.വി.എൻ.എൽ ഓഹരികൾ വമ്പൻ കുതിപ്പ്, ഇന്ന് 11% ഉയർന്നു; രക്ഷയായത് 554 കോടി രൂപയുടെ കരാർ

റെയിൽവേ ഓഹരികൾ പൊതുവേ കടുത്ത നിരാശയിലായിരുന്നു. എന്നാൽ ഇന്ന് അപ്രതീക്ഷിത മാറ്റങ്ങളാണ് വിപണിയിൽ പ്രകടമായത്. ബെംഗളൂരു സബർബൻ റെയിൽ പ്രോജക്ടിനായി (ബി.എസ്.ആർ.പി) റെയിൽ ഇൻഫ്രാസ്ട്രക്ചർ ഡെവലപ്‌മെന്റ് കമ്പനി (കർണാടക) ലിമിറ്റഡിൽ ( കെ-റൈഡ്) നിന്ന് 554.47 കോടി രൂപയുടെ കരാറാണ് റെയിൽ വികാസ് നിഗം ​​ലിമിറ്റഡ് (RVNL) കമ്പനി നേടിയത്. ഇതിന്റെ ഭാ​ഗമായി ഇന്ന് ഫെബ്രുവരി 19 ബുധനാഴ്ച ബി.എസ്.ഇയിൽ ആർ.വി.എൻ.എൽ ഓഹരികൾ 11% ഉയർന്ന് 372.25 രൂപയിലെത്തി.

ബി.എസ്.ആർ.പിയുടെ കോറിഡോർ-4Aയ്ക്ക് കീഴിൽ ഒമ്പത് സ്റ്റേഷനുകളുടെ നിർമ്മാണം ഉൾപ്പെടുന്ന പാക്കേജ് C4Aയ്ക്കായി കെ-റൈഡിൽ നിന്ന് ആർ.വി.എൻ.എല്ലിനെ സമീപിക്കുകയായിരുന്നു. ഹീലാലിഗെ, സിംഗേന അഗ്രഹാര, ഹുസ്‌കൂർ, അംബേദ്കർ നഗർ, കാർമെലാരം, ബെല്ലന്ദൂർ, മാറത്തഹള്ളി, ദൊഡ്ഡനകുണ്ടി, കഗ്ഗദാസപുര എന്നിവിടങ്ങളിൽ ഒരു എലിവേറ്റഡ് സ്റ്റേഷനും, എട്ട് അറ്റ്-ഗ്രേഡ് സ്റ്റേഷനുകൾ നിർമ്മിക്കുന്നതിനുമാണ് 554.47 കോടി രൂപയുടെ കരാർ തയ്യാറാക്കിയത്.

സിവിൽ- സ്ട്രക്ചറൽ നിർമ്മാണ പ്രവർത്തനങ്ങൾ, എൻട്രി/എക്സിറ്റ് ഘടനകൾ, സ്റ്റീൽ ഫൂട്ട്-ഓവർ ബ്രിഡ്ജുകൾ, മേൽക്കൂരയുടെ ഘടനകൾ, പ്രീ-എഞ്ചിനീയറിംഗ് ബിൽഡിംഗ് (PEB) വർക്കുകൾ, ആർക്കിടെക്ചറൽ വർക്കുകൾ, ഇലക്ട്രോണിക് & മെക്കാനിക് വർക്കുകൾ എന്നിവയെല്ലാം കരാറിൽ ഉൾപ്പെടുന്നുണ്ട്. ഇവിടെ RVNL പോലെ Rithwik Projects Private Ltd (RPPL) പദ്ധതിയുടെ ഭാ​ഗമാണ്. RVNLന് 51% ഹോൾ​ഡിം​ഗുണ്ട്. എന്നാൽ റിത്വിക് പ്രൊജക്ട്സ് പ്രൈവറ്റ് ലിമിറ്റഡിന് 49% ഹോൾഡിം​ഗാണ് ഉള്ളത്. ഇരു കമ്പനിയും സംയുക്തമായി പ്രവർത്തിച്ചാൽ ഈ പദ്ധതി 24 മാസത്തിനുള്ളിൽ പൂർത്തീകരിക്കാൻ സാധിക്കും.

മൂന്നാം പാദത്തിലെ ആർ.വി.എൻ.എൽ വരുമാനം

കഴിഞ്ഞ കുറച്ച് നാളുകളായി ആർ.വി.എൻ.എൽ ഓഹരികൾക്ക് വീഴ്ചകളായിരുന്നു. 2024 ഡിസംബർ 31 ന് അവസാനിച്ച മൂന്നാം പാദത്തിൽ ആർ.വി.എൻ.എല്ലിന്റെ അറ്റാദായം 13.1% വാർഷിക ഇടിവോടെ (YoY) 311.6 കോടി രൂപയായി കുറഞ്ഞു. 2024 സാമ്പത്തിക വർഷത്തിലെ ഇതേ കാലയളവിൽ കമ്പനി 358.6 കോടി രൂപ അറ്റാദായം നേടി. റെയിൽവേ പൊതുമേഖലാ സ്ഥാപനത്തിന്റെ പ്രവർത്തന വരുമാനം 4567 കോടി രൂപയായി. ഇത് 2024 സാമ്പത്തിക വർഷത്തെ മൂന്നാം പാദത്തിൽ റിപ്പോർട്ട് ചെയ്ത 4689 കോടി രൂപയിൽ നിന്ന് 2.6% വാർഷിക ഇടിവാണ് കാണിക്കുന്നത്.

2025 സാമ്പത്തിക വർഷത്തെ മൂന്നാം പാദത്തിൽ EBITDA (പലിശ, നികുതി, മൂല്യത്തകർച്ച എന്നിവയ്ക്ക് മുമ്പുള്ള വരുമാനം) 3.9% കുറഞ്ഞ് 239.4 കോടിയായി. എന്നാൽ മുൻ സാമ്പത്തിക വർഷത്തിൽ ഇതേ കാലയളവിലെ 5.3% ൽ നിന്ന് EBITDA മാർജിൻ 5.2% എന്ന നിരക്കിൽ ഉയർന്നിരുന്നു.

ആർ.വി.എൻ.എൽ ഓഹരികളുടെ ടാർ​ഗറ്റ് വില

ട്രെൻഡ്‌ലൈൻ ഡാറ്റ പ്രകാരം, ആർ.വി.എൻ.എൽ ഓഹരികളുടെ ശരാശരി ടാർഗെറ്റ് വില 357 രൂപയാണ്, ഇത് നിലവിലെ മാർക്കറ്റ് വിലകളിൽ നിന്ന് 7% വർദ്ധനവ് സൂചിപ്പിക്കുന്നു. നിലവിലെ ഓഹരി വില ടാർഗറ്റ് വിലയേക്കാൾ ഉയരത്തിലാണ്.

ആർ.വി.എൻ.എൽ ഓഹരികളുടെ പ്രകടനം

ആർ.വി.എൻ.എൽ ഓഹരികൾ നീണ്ട നാളത്തെ വീഴ്ചക്കൊടുവിലാണ് ഇന്ന് കുതിച്ചത്. അതായത് ഇന്നലെ ചൊവ്വാഴ്ച, ആർ‌.വി‌.എൻ‌.എൽ ഓഹരികൾ ബി‌.എസ്‌.ഇയിൽ 2.8% ഇടിഞ്ഞ് 333 രൂപയിൽ ക്ലോസ് ചെയ്തു, ബെഞ്ച്മാർക്ക് സെൻസെക്സ് 0.04% ഇടിഞ്ഞു.

കഴിഞ്ഞ ആറ് മാസത്തിനിടെ ഓഹരി 42 ശതമാനമാണ് ഇടിഞ്ഞത്. എങ്കിലും കഴിഞ്ഞ രണ്ട് വർഷത്തിനുള്ളിൽ 386% നേട്ടം കൈവരിച്ചു എന്നത് ശ്രദ്ധേയമാണ്. കമ്പനിയുടെ വിപണി മൂലധനം 69,452 കോടി രൂപയാണ്.