പലിശ ഭാരം കൂടില്ല, റിപ്പോ നിരക്ക് മാറ്റാതെ ആർബിഐ, വായ്പ എടുത്തവർക്ക് സമാധാനം

പ്രതീക്ഷിച്ചത് തന്നെയാണ് സംഭവിച്ചത്. ഇത്തവണയും റിപ്പോ നിരക്ക് മാറ്റമില്ലാതെ നിലനിർത്താൻ റിസർവ്വ് ബാങ്ക് ഓഫ് ഇന്ത്യയുടെ മോണിറ്ററി പോളിസി കമ്മിറ്റി (എംപിസി)യിൽ തീരുമാനം. അതോടെ റിപ്പോ നിരക്ക് 5.50 ശതമാനത്തിൽ മാറ്റമില്ലാതെ തുടരും. ആർ‌ബി‌ഐ റിപ്പോ നിരക്ക് കുറയ്ക്കൽ നിലപാട് നിഷ്പക്ഷമായി നിലനിർത്താൻ ആർ‌ബി‌ഐ എംപിസി അംഗങ്ങളിൽ ഭൂരിഭാഗവും വോട്ട് ചെയ്തു. എസ്‌ടി‌എഫ് നിരക്ക് 5.25% ആയി നിലനിർത്താനും എം‌എസ്‌എഫ് നിരക്കും ബാങ്ക് നിരക്കും 5.75% ആയി തുടരാനും എംപിസി വോട്ട് ചെയ്തു.

എന്താണ് റിപ്പോ നിരക്ക്..?

റിസർവ് ബാങ്ക് ഓഫ് ഇന്ത്യ ബാങ്കുകൾക്കും മറ്റ് ധനകാര്യ സ്ഥാപനങ്ങൾക്കും പണം വായ്പ നൽകുന്നതിന്റെ പലിശ നിരക്കാണ് റിപ്പോ നിരക്ക്. 2019 ഒക്‌ടോബർ 1ന് ശേഷം എല്ലാ ഫ്‌ളോട്ടിംഗ് റേറ്റ് റീടെയിൽ ലോണുകളും റിപ്പോ നിരക്കിനെ അടിസ്ഥാനപ്പെടുത്തിയാണ് കണക്കാക്കുന്നത്. റിപ്പോ നിരക്ക് ഉയരുന്നതിലൂടെ റിപ്പോ റേറ്റ് ലിങ്ക്ഡ് ഹോം ലോണുകളുടെയും വ്യക്തിഗത വായ്പകളുടെയും പലിശ നിരക്കുകൾ ഉയരാൻ കാരണമാകും. ഭവന, വാഹന, വ്യക്തിഗത, വിദ്യാഭ്യാസ വായ്പകളുടെയെല്ലാം പലിശനിരക്ക് കുറയണമെങ്കിൽ റീപ്പോ കുറയേണ്ടത് അനിവാര്യമാണ്. റിപ്പോ കുറച്ചാൽ പലിശഭാരം കുറയും, ഇഎംഐ തുകയും കുറയും.

വിപണിയിൽ ഉണർവ്വ്

ആർ‌ബി‌ഐ നയവും റിപ്പോ നിരക്കും സംബന്ധിച്ച തീരുമാനത്തിന് മുന്നോടിയായി ഓഹരി വിപണിയിൽ ഓട്ടോ, ബാങ്കുകൾ, റിയൽ എസ്റ്റേറ്റ് എന്നിവയുൾപ്പെടെ പലിശ നിരക്കിൽ സെൻസിറ്റീവ് ആയ മേഖലകളിലെ ഓഹരികൾ ഉയർന്ന നിലയിൽ വ്യാപാരം നടത്തി. നിഫ്റ്റി ഓട്ടോ സൂചിക 0.4%, നിഫ്റ്റി റിയാലിറ്റി 0.8%, നിഫ്റ്റി ബാങ്ക് എന്നിവയും ഉയർന്ന നിലയിൽ വ്യാപാരം നടത്തി.

ഗുഡ്‌റിട്ടേൺസ് സർവ്വേ ശരിയായി

2025 ഒക്ടോബറിൽ ആർ‌ബി‌ഐ റിപ്പോ നിരക്ക് കുറയ്ക്കുമോ..? എന്ന ചോദ്യവുമായി ഗുഡ്‌റിട്ടേൺസ് കഴിഞ്ഞ ദിവസങ്ങളിൽ സർവ്വേ സംഘടിപ്പിച്ചിരുന്നു. സർവ്വേയിലെ വോട്ടെടുപ്പ് പ്രകാരം ഒക്ടോബർ മാസത്തിൽ നടക്കുന്ന എംപിസി യോഗത്തിൽ ആർ‌ബി‌ഐ റിപ്പോ നിരക്ക് 5.50% ൽ തന്നെ നിലനിർത്തുമെന്നായിരുന്നു കൂടുതൽ പേരും അഭിപ്രായപ്പെട്ടത്. സർവേയിൽ പങ്കെടുത്ത 30 സാമ്പത്തിക വിദഗ്ധരിൽ 17 പേരും ആർ‌ബി‌ഐ റിപ്പോ നിരക്ക് 5.50 ശതമാനമായി നിലനിർത്തുമെന്നാണ് പ്രവചിച്ചത്. അതേസമയം ബാക്കിയുള്ള 13 പേർ 25 ബേസിസ് പോയിന്റുകൾ വരെ നിരക്ക് കുറയ്കുമെന്നാണ് പറഞ്ഞത്.

ഇളവുകൾക്ക് സാധ്യതയുണ്ടെന്ന് തോന്നുമെങ്കിലും, പ്രത്യേകിച്ച് യുഎസ് വ്യാപാര താരിഫുകളിലെ സമീപകാല വർദ്ധനവ് മൂലം, വളർച്ചാ തിരിച്ചടികൾ ഉണ്ടാകാനുള്ള സാധ്യത കണക്കിലെടുത്ത്, കേന്ദ്ര ബാങ്ക് ജാഗ്രതയോടെ നീങ്ങുമെന്ന് മിക്ക വിശകലന വിദഗ്ധരും വിശ്വസിക്കുന്നു. ഇത് വർഷത്തിന്റെ ശേഷിക്കുന്ന കാലയളവിൽ ആർ‌ബി‌ഐ അതിന്റെ നിലവിലെ നയ നിലപാട് നിലനിർത്താൻ താൽപ്പര്യപ്പെടുമെന്ന വിശാലമായ അഭിപ്രായത്തിലേക്ക് നയിച്ചു.