ഈ ഫോണിന് അത്യുഗ്രന്‍ ബാറ്ററി ശേഷി, പവര്‍ ബാങ്കായും ഉപയോഗിക്കാം; ഇന്ത്യ ലോഞ്ചിംഗ് ഈ മാസം

അത്യുഗ്രന്‍ ബാറ്ററി ശേഷിയുമായി റിയല്‍മിയുടെ പി4 പവര്‍ ഇന്ത്യയിലെത്തുന്നു. 10,001-എംഎഎച്ച് ബാറ്ററിയാണ് പ്രത്യേകത. രണ്ട് ചാര്‍ജ്ജിംഗില്‍ 3.5 ദിവസത്തെ ഉപയോഗം, 32 മണിക്കൂര്‍ യുട്യൂബ് സ്ട്രീമിംഗ്, 12 മണിക്കൂര്‍ ഗെയ്മിംഗ്, 38 ദിവസത്തെ സ്റ്റാന്റ് ബൈ സമയം എന്നിവ ലഭ്യമാകുന്നു. ഫോണുകളും ഇയര്‍ബഡ് പോലുള്ള ഉപകരണങ്ങളും ചാര്‍ജ്ജ് ചെയ്യാന്‍ ഉപയോഗിക്കാം. പി 4 പവറിന്റെ രാജ്യത്തെ ലോഞ്ചിംഗ് ജനുവരി 29 നാണ്.

ഫാസ്റ്റ് ചാര്‍ജ്ജിംഗ്
പകുതി ദിവസത്തെ പവര്‍ നേടാന്‍ പി4 പവറിന് അഞ്ചുമിനിറ്റ് മതി.മൂന്ന് വര്‍ഷത്തെ ആന്‍ഡ്രോയിഡ് ഓപ്പറേറ്റിംഗ് സിസ്റ്റംസ് അപ്ഡേറ്റുകള്‍, നാല് വര്‍ഷത്തെ സുരക്ഷാ പാച്ചുകള്‍, 80 വാട്ട് ചാര്‍ജ്ജിംഗ്, ഭാരക്കുറവ് എന്നിവ പ്രത്യേകതകളാണ്. പ്ലഗ് ഇന്‍ ചെയ്തിരിക്കുമ്പോള്‍ ചാര്‍ജിംഗ് ഒഴിവാക്കാമെന്നതാണ് മറ്റൊരു സവിശേഷത. ഇത് ഫോണ്‍ ചൂടാകുന്നത് തടയുന്നു.

പവര്‍ബാങ്കായും ഉപയോഗിക്കാം
മറ്റ് ഗാഡ്‌ജെറ്റുകളെ ചാര്‍ജ് ചെയ്യാനും ഫോണ്‍ ഉപയോഗിക്കാം. 27 വാട്ട് റിവേഴ്‌സ് ചാര്‍ജിംഗ് ഇന്ന് വിപണിയിലുള്ള പവര്‍ ബാങ്കുകളെ വെല്ലും. ഐഫോണ്‍ 16 പ്രോയുടെ ചാര്‍ജ്ജ് 50 ശതമാനമാക്കാന്‍ ഫോണിന് അരമണിക്കൂര്‍ മതി. സിലിക്കണ്‍-കാര്‍ബണ്‍ ആനോഡ് ബാറ്ററി പരമ്പരാഗത ലിഥിയം-അയണ്‍ ബാറ്ററിയെ അപേക്ഷിച്ച് കൂടുതല്‍ കാലം നില്‍ക്കുന്നു. ദീര്‍ഘദൂര മോട്ടോര്‍ സൈക്കിള്‍ യാത്രകളിലും ക്യാപിംഗിന് പോകുമ്പോഴും അതുകൊണ്ടുതന്നെ ഈ ഫോണിനെ ഒപ്പം കൂട്ടാം.

വില
പി4 പവര്‍ അതിന്റെ മുന്‍ഗാമിയായ പി4 പോലെ ഒരു ബജറ്റ്, മിഡ് റേഞ്ച് മോഡലായിരിക്കും. അടിസ്ഥാന വില 20,000 രൂപ. അത്യാധുനിക ചിപ് സെറ്റോ ക്യാമറയോ ഫോണില്‍ വിദഗ്ധര്‍ പ്രതീക്ഷിക്കുന്നില്ല. ബാറ്ററിയുടെ കാര്യത്തില്‍ പി4 പവര്‍ ഈയിടെ അവതരിപ്പിക്കപ്പെട്ട ഹോണര്‍ പവര്‍2 വിന് പിറകിലാണ്. 110,080 എഎഎച്ച് ബാറ്ററിയുമായാണ് ഹോണര്‍ പവര്‍ 2 ചൈനയില്‍ അരങ്ങേറ്റം കുറിച്ചത്. ഇത് ഒറ്റ ചാര്‍ജ്ജില് 20 മണിക്കൂര്‍ തുടര്‍ച്ചയായ ഉപയോഗം വാഗ്ദാനം ചെയ്യുന്നു. അതേസമയം ഹോണര്‍ പവര്‍2 ഇന്ത്യയില്‍ ലഭ്യമല്ല.