വീട്ടിലിരുന്ന് വരുമാനം; മൊബൈൽ റീച്ചാർജ് ചെയ്ത് മാസം 5000 രൂപ നിങ്ങൾക്കും ഉണ്ടാക്കാം

ഡിജിറ്റൽ പേയ്‌മെന്റ് ആപ്പായ പേടിഎം, വോഡഫോൺ - ഐഡിയയുമായി ചേർന്ന് റീചാർജിലൂടെ അധിക വരുമാനം നേടാൻ ആളുകൾക്ക് അവസരമൊരുക്കുന്നു. മൊബൈൽ റീചാർജ് കടകൾ, പലചരക്ക് സ്റ്റോറുകൾ, പാൽ ബൂത്തുകൾ, ഫാർമസികൾ തുടങ്ങിയവയ്ക്കും വ്യക്തികൾക്കും വോഡഫോൺ - ഐഡിയ പ്രീ പെയ്ഡ് മൊബൈൽ റീചാർജ് സൗകര്യം വഴി അധിക വരുമാനം നേടാനാകും.

റീചാർജ് സാത്തി

റീചാർജ് സാത്തി എന്നാണ് ഈ പദ്ധതിയുടെ പേര്. ഇത് വ്യക്തികളെയും ചെറുകിട ബിസിനസ്സുകളെയും അധിക വരുമാനം നേടാൻ സഹായിക്കുന്ന പദ്ധതിയാണ്. പേടിഎം ഉപഭോക്താക്കൾക്ക് (രജിസ്ട്രേഷനെ തുടർന്ന്) പേടിഎം ആപ്ലിക്കേഷനിൽ വോഡഫോൺ, ഐഡിയ റീചാർജുകൾ വിൽക്കാൻ പ്രാപ്തമാക്കുന്ന പദ്ധതിയാണിതെന്ന് കമ്പനി പ്രസ്താവനയിൽ പറഞ്ഞു. പേടിഎം ആപ്ലിക്കേഷനിൽ ഡൌൺലോഡ് ചെയ്ത് രജിസ്റ്റർ ചെയ്തു കൊണ്ട് മൊബൈൽ റീചാർജുകൾ വിൽക്കാൻ ആരംഭിക്കാം. ഒന്നിലധികം റീചാർജുകൾക്ക് വോഡഫോൺ ഐഡിയ ക്യാഷ്ബാക്ക് നൽകും.

മാസം 5000 രൂപ

വ്യക്തികൾക്കും ചെറുകിട ബിസിനസുകാർക്കും ഫാർമസിസ്റ്റുകൾ, പാൽ ബൂത്ത് ഓപ്പറേറ്റർമാർ, പത്ര കച്ചവടക്കാർ എന്നിവർക്ക് ഈ പ്രോഗ്രാമിന് കീഴിൽ ഓരോ മാസവും 5,000 രൂപ വരെ സമ്പാദിക്കാൻ കഴിയും. ഈ പങ്കാളിത്തം ഡിജിറ്റലായി വ്യക്തികൾക്കും ചെറുകിട ബിസിനസുകൾക്കും റീചാർജ് വിൽപ്പന നടത്താനും ഉപജീവനമാർഗം നേടാനും സഹായിക്കുമെന്ന് വോഡഫോൺ ഐഡിയയിലെ മാർക്കറ്റിംഗ് ഡയറക്ടർ അവ്‌നീഷ് ഖോസ്ല പറഞ്ഞു.

ജിയോ സേവനം

ജിയോ മൊബൈൽ ആപ്ലിക്കേഷൻ വഴി നെറ്റ്വർക്കിലെ ഏതൊരു ഉപഭോക്താവിന്റെയും അക്കൗണ്ട് റീചാർജ് ചെയ്യുന്നതിനും 4 ശതമാനം കമ്മീഷൻ നേടുന്നതിനും വരിക്കാർക്ക് അവസരം നൽകി ജിയോയും രംഗത്തെത്തിയിരുന്നു. ഇതിനായി റിലയൻസ് ജിയോ ഒരു പുതിയ സംവിധാനമാണ് അവതരിപ്പിച്ചിരിക്കുന്നത്. ഗൂഗിൾ പ്ലേ സ്റ്റോറിൽ റിലയൻസ് ജിയോ ജിയോപോസ് ലൈറ്റ് ആപ്ലിക്കേഷൻ ആരംഭിച്ചിട്ടുണ്ട്. ഇത് ഉപഭോക്താവിന് ഡൌൺലോഡ് ചെയ്യാനും നെറ്റ്വർക്കിലെ ഏത് വരിക്കാരുടെയും ഫോൺ റീചാർജ് ചെയ്യാനും കഴിയും.

ജിയോ ആപ്പ്

ഈ ആപ്ലിക്കേഷൻ ഇതുവരെ 5 ലക്ഷത്തിലധികം പേർ ഡൗൺലോഡ് ചെയ്തിട്ടുണ്ട്. ലോക്ക്ഡൌൺ കാലയളവിൽ കടകൾ തുറന്നിട്ടില്ലെങ്കിലും ജിയോ ഉപഭോക്താക്കൾക്ക് അവരുടെ ഫോണുകൾ റീചാർജ് ചെയ്യുന്നതിന് ഇത് സൗകര്യപ്രദമാകുമെന്ന് അധികൃതർ പറയുന്നു.