'രേഖ ജുൻജുൻവാല വാങ്ങിക്കൂട്ടിയ ആ ഓഹരികൾ', വിപണിയിലെ നഷ്ടകാലത്ത് നിങ്ങൾക്ക് ഇത് പ്രതീക്ഷയാകുമോ?

പ്രമുഖ ദലാൽ സ്ട്രീറ്റ് നിക്ഷേപകയും അന്തരിച്ച രാകേഷ് ജുൻജുൻവാലയുടെ ഭാര്യയുമായ രേഖ ജുൻജുൻവാല, 2025 മാർച്ചിൽ വാങ്ങിക്കൂട്ടിയ ഓഹരികൾ ഒരുപക്ഷെ, വിപണി ഇടിവിൽ നിന്ന് കരകയറാൻ നിങ്ങളെയും സഹായിച്ചേക്കാം. പൊതുമേഖലാ ബാങ്കായ കനറ ബാങ്കിലെ ഓഹരികളിൽ ഉണ്ടായിരുന്ന പങ്കാളിത്തം വർദ്ധിപ്പിച്ചുകൊണ്ടാണ് രേഖ അവരുടെ പോർട്ട് ഫോളിയോ തിരുത്തി എഴുതിയത്.

കനറ ബാങ്ക് ഏറ്റവും ഒടുവിൽ പുറത്തുവിട്ട ഓഹരി ഉടമസ്ഥതാ രേഖകൾ പ്രകാരം, ജുൻജുൻവാല 2024 ജനുവരി മുതൽ മാർച്ച് വരെയുള്ള കാലയളവിൽ 37.5 ലക്ഷം ഇക്വിറ്റി ഓഹരികൾ വരെയാണ് ഈ പൊതുമേഖലാ ബാങ്കിൽ നിന്ന് വാങ്ങിയത്.
2025 മാർച്ച് 31 ലെ കണക്കനുസരിച്ച്, രേഖ ജുൻജുൻവാലയ്ക്ക് കനറ ബാങ്കിൽ 13,24,43,000 ഇക്വിറ്റി ഓഹരികൾ, അതായത് 1.46 ശതമാനം ഓഹരി പങ്കാളിത്തമുണ്ട് എന്ന് ബാങ്കിന്റെ എക്സ്ചേഞ്ച് ഫയലിംഗിൽ പറയുന്നു.

അതേസമയം, 2024 ഡിസംബർ 31 ലെ കണക്കനുസരിച്ച്, അവർക്ക് കമ്പനിയിൽ 12,86,93,000 ഇക്വിറ്റി ഓഹരികളാണ് ഉണ്ടായിരുന്നത്. (അന്തരിച്ച രാകേഷ് ജുൻജുൻവാലയുടെ എസ്റ്റേറ്റ് എന്ന പേരിലാണ് ഈ ഓഹരികൾ).
ഏപ്രിൽ 8 ലെ കണക്കനുസരിച്ച്, ജുൻജുൻവാലയുടെ കനറ ബാങ്കിലെ ഓഹരി പങ്കാളിത്തത്തിന്റെ മൂല്യം 1,190 കോടി രൂപയാണ്.

ഏകദേശം 81,000 കോടി രൂപയുടെ വിപണി മൂലധനമുള്ള ഈ പൊതുമേഖലാ സ്ഥാപനമായ ബാങ്ക് ചൊവ്വാഴ്ച 2.95 ശതമാനം ഉയർന്ന് 89.67 രൂപയിലെത്തി. തിങ്കളാഴ്ച 87.10 രൂപയിൽ ക്ലോസ് ചെയ്ത ഓഹരി ഈ വർഷം ഇതുവരെ ഏകദേശം 13 ശതമാനം ഇടിവ് രേഖപ്പെടുത്തി. ഒരു വർഷം മുമ്പ് 129.35 രൂപ എന്ന 52 ആഴ്ചയിലെ ഏറ്റവും ഉയർന്ന വിലയിൽ എത്തിയ ശേഷം ഓഹരി ഏകദേശം 33 ശതമാനം ഇടിഞ്ഞു. കഴിഞ്ഞ മാസം ഓഹരി 78.58 രൂപ എന്ന 52 ആഴ്ചയിലെ ഏറ്റവും താഴ്ന്ന വിലയിൽ എത്തിയിരുന്നു. ഏകദേശം അഞ്ച് വർഷം മുമ്പ് കനറ ബാങ്ക് ഓഹരികൾ 16 രൂപയിൽ താഴെയായിരുന്നു വ്യാപാരം നടത്തിയിരുന്നത്; അതിനുശേഷം ഓഹരി ഏകദേശം 450 ശതമാനം ഉയർന്നു.

ഓഹരി വിപണിയിലെ ഇടിവ് മറികടക്കാൻ കഴിയുമോ?

ഇന്ത്യൻ ഓഹരി വിപണിയിൽ ഇപ്പോൾ ഉണ്ടായിരിക്കുന്ന ഇടിവ് താൽക്കാലികമായാണ് വിദഗ്ദർ വിലയിരുത്തുന്നത്. എന്നാൽ കഴിഞ്ഞ ദിവസങ്ങളിൽ ഉണ്ടായ തകർച്ച, പ്രത്യേകിച്ച് തിങ്കളാഴ്ചത്തേത് വലിയ നഷ്ടമാണ് നിക്ഷേപകരിൽ ഉണ്ടാക്കിയിട്ടുള്ളത്. ഇതിനെ മറികടക്കാൻ ഒരുപക്ഷെ പലർക്കും ആഴ്ചകളോ മാസങ്ങളോ വേണ്ടി വന്നേക്കാം എന്നതാണ് സത്യാവസ്ഥ. സുരക്ഷിതമായ ചരിത്രം രേഖപ്പെടുത്തിയിട്ടുള്ള ഓഹരികൾ വാങ്ങുന്നത് വലിയ ലാഭം ഉണ്ടാക്കിയില്ലെങ്കിലും നിങ്ങൾക്ക് നഷ്ടം വരാതെ സംരക്ഷിക്കാൻ ഇതിന് സാധിക്കും.

റിസ്ക് എടുക്കാൻ ആഗ്രഹം ഇല്ലാത്തവർ ശ്രദ്ധിക്കുക

റിസ്ക് എടുക്കാൻ താല്പര്യമില്ലാത്തവർ ഒരിക്കലും ഓഹരൂപണിയിൽ നിക്ഷേപിക്കരുത് എന്ന് തന്നെയാണ് വിദഗ്ധർ അഭിപ്രായപ്പെടുന്നത്. കാരണം ധാരാളം കാത്തിരിപ്പ് ആവശ്യമുള്ള ഒരു പ്രക്രിയയാണ് ഇത്. ക്ഷമയും, സമയോചിതമായ ഇടപെടലുമാണ് ഓഹരി വിപണിയേ മികച്ചതാക്കുന്നത്. നഷ്ടം വന്നാൽ എന്തു ചെയ്യും എന്ന് ആധിയുള്ളവർ അതുകൊണ്ട് തന്നെ എഫ് ഡികളും മറ്റും എടുക്കേണ്ടതാണ്. ആർ ബി ഐ ഏപ്രിൽ 9 ന് പുറപ്പെടുവിച്ച പണനയത്തിലെ റിപ്പോ നിരക്ക് കുറവ് ഓഹരി വിപണിയെയും സ്വര്ണവിലയേയും എല്ലാം ബാധിക്കുമെന്ന് ഉറപ്പാണ്. അതുകൊണ്ട് തന്നെ പല ഓഹരികളും ഇനി കുതിച്ചുയരാനും സാധ്യതയുണ്ട്.

ശ്രദ്ധിക്കുക: ഓഹരി വിപണിയിലെ നിക്ഷേപങ്ങൾ നഷ്ടം വരുത്താം. അതുകൊണ്ട് വിദഗ്ധരുമായി ചർച്ച ചെയ്‌ത്‌ തീരുമാനങ്ങൾ എടുക്കുക