റിലയൻസ് ജിയോ വീണ്ടും കുതിപ്പിൽ; നെറ്റ് പ്രോഫിറ്റ് 1,350 കോടി

ന്യൂഡൽഹി: മുകേഷ് അംബാനി മേധാവിയായ റിലയൻസ് ജിയോ വീണ്ടും റെക്കോർഡ് ലാഭത്തിൽ കുതിപ്പ് തുടരുന്നു. 2019-20 സാമ്പത്തിക വർഷത്തിന്റെ മൂന്നാം പാദത്തിൽ രേഖപ്പെടുത്തിയ കമ്പനിയുടെ മൊത്ത ലാഭം 1,350 കോടി. റിലയന്‍സ് ജിയോയുടെ മൊത്ത ലാഭത്തില്‍ 62 ശതമാനത്തിന്‍റെ വര്‍ധനവാണ് ഉണ്ടായത്. കഴിഞ്ഞ വർഷം ഇതേ പാദത്തിൽ കമ്പനിയുടെ മൊത്ത ലാഭം 831 കോടിയായിരുന്നു. പ്രവർത്തനങ്ങളിൽ നിന്നുള്ള വരുമാനം 28 ശതമാനം ഉയർന്ന് 13,968 കോടി രൂപയായി. കഴിഞ്ഞ വർഷം ഇതേ കാലയളവിൽ ഇത് 10,884 കോടി രൂപയായിരുന്നു.

ടെലികോം കമ്പനികളുടെ ലാഭത്തിന്റെ പ്രധാന മെട്രിക്കായ ഒരു ഉപയോക്താവിന്റെ ശരാശരി വരുമാനം (എആർപിയു) പ്രതിമാസം 128.4 രൂപയായി ഉയർന്നു, കഴിഞ്ഞ പാദത്തിൽ ഇത് 120 രൂപയായിരുന്നു. ടെലികോം ഓപ്പറേറ്റർ പുറത്തിറക്കിയ പ്രസ്‌താവന പ്രകാരം റിലയൻസ് ജിയോ ഈ പാദത്തിൽ 37 കോടി വരിക്കാരെ ചേർത്തിരുന്നു.

മികച്ച മൊബൈൽ കണക്റ്റിവിറ്റി സേവനങ്ങളോടുളള ഉപയോക്താക്കളുടെ പ്രതികരണമാണ് ജിയോയുടെ ഈ വളർച്ചാ യാത്ര തുടരാന്‍ സഹായിക്കുന്നതെന്ന് റിലയൻസ് ഇൻഡസ്ട്രീസ് ചെയർമാനും മാനേജിംഗ് ഡയറക്ടറുമായ മുകേഷ് അംബാനി പറഞ്ഞു. രാജ്യത്തെ ഡിജിറ്റൽ വിപ്ലവത്തിന്റെ നായകര്‍ ആകാമെന്ന ഞങ്ങളുടെ വാഗ്ദാനം ഞങ്ങൾ ഇതിലൂടെ നിറവേറ്റുകയാണെന്നും അദ്ദേഹം വ്യക്തമാക്കി.