"നിങ്ങൾ ഹാപ്പി അല്ലേ?" കിടിലൻ ഓഫറുമായി 'ഹാപ്പി ന്യൂ ഇയർ 2026' പ്ലാനുകൾ പുറത്തിറക്കി റിലയൻസ് ജിയോ

2025 അവസാനിക്കാറായപ്പോൾ ഇന്ത്യയിലെ ഏറ്റവും വലിയ ടെലിക്കോം കമ്പനിയായ റിലയൻസ് ജിയോ ഉപയോക്താക്കൾക്കായി ക്രിസ്മസ് പുതുവത്സര സമ്മാനം നൽകുന്നു. അതെ ജിയോ ഇപ്പോൾ മൂന്ന് പുതിയ റീചാർജ് പ്ലാനുകൾ അവതരിപ്പിച്ചിരിക്കുന്നു. റിലയൻസ് ജിയോ ഹാപ്പി ന്യൂ ഇയർ 2026 എന്ന് പേരിട്ടിരിക്കുന്ന ഈ പ്രീപെയ്ഡ് പ്ലാനുകൾ എല്ലാ തരം ഉപയോക്താക്കളെയും ലക്ഷ്യമിട്ടു കൊണ്ടാണ് പുറത്തിറക്കിയിരിക്കുന്നത്.

വാർഷിക റീചാർജ്, പ്രതിമാസ വിനോദ പായ്ക്ക്, കുറഞ്ഞ ചെലവിലുള്ള ഫ്ലെക്സിബിൾ ആഡ്-ഓൺ പ്ലാൻ എന്നിവയെല്ലാം പുതിയ പ്ലാനിൽ ഉൾപ്പെടുന്നു. വെറും 103 രൂപ മുതൽ ആരംഭിക്കുന്ന പ്ലാനുകൾക്കൊപ്പം ജെമിനി പ്രോ AI സേവനവും വാ​ഗ്ദാനം ചെയ്യുന്നു. അതിനാൽ ഗൂഗിളുമായുള്ള ജിയോയുടെ പങ്കാളിത്തമാണ് ഈ പുതിയ പ്ലാനുകളുടെ ഏറ്റവും വലിയ പ്രത്യേകതയും.

ജിയോയുടെ ഔദ്യോഗിക വെബ്‌സൈറ്റ്, മൈജിയോ ആപ്പ് തുടങ്ങി വിവിധ പ്ലാറ്റ്ഫോമുകളിലൂടെ നിങ്ങൾക്ക് ഈ പ്ലാൻ റീചാർജ് ചെയ്യാം. ഈ മൂന്ന് റീചാ‍ർജ് പ്ലാനുകളെ കുറിച്ച് വിശദമായി അറിയാം;

ഹീറോ വാർഷിക റീചാർജ്

365 ദിവസത്തെ കാലാവധിയിൽ 3,599 രൂപയ്ക്ക് റീചാർജ് ചെയ്യുന്ന പ്ലാനാണ് ഹീറോ വാർഷിക റീചാർജ്. ഈ പ്ലാൻ പ്രകാരം, പ്രതിദിനം 2.5 ജിബി അൺലിമിറ്റ‍ഡ് 5 ജി ഡാറ്റ ആക്സസ് വാ​ഗ്ദാനം ചെയ്യുന്നു. മാത്രമല്ല അൺലിമിറ്റഡ് വോയ്‌സ് കോളിംഗും, പ്രതിദിനം 100 എസ്എംഎസും ലഭിക്കും. ഈ നേട്ടങ്ങൾക്കൊപ്പം 18 മാസത്തെ ഗൂഗിൾ ജെമിനി പ്രോ സബ്‌സ്‌ക്രിപ്‌ഷനും ഉൾപ്പെടുന്നു.

500 രൂപ ചിലവഴിക്കാൻ റെഡിയാണെങ്കിൽ നിങ്ങൾ ജിയോയുടെ സൂപ്പർ സെലിബ്രേഷൻ പ്രതിമാസ പ്ലാൻ സ്വന്തമാക്കാം. ഇതിൻ്റെ കാലാവധി 28 ദിവസമാണ്. പ്രതിദിനം 2 ജിബി അൺലിമിറ്റഡ് 5 ജി ഡാറ്റ ആക്‌സസ്, പരിധിയില്ലാത്ത വോയ്‌സ് കോളിംഗ്, പ്രതിദിനം 100 എസ്എംഎസ് എന്നിവ ഇതിൽ ഉൾപ്പെടുന്നു. മൊബൈൽ റീചാർജ് പോലെ ഒടിടി പ്ലാറ്റ്ഫോമുകളുടെ ആക്സസും ലഭിക്കും.

യൂട്യൂബ് പ്രീമിയം, ജിയോ ഹോട്ട്സ്റ്റാർ, ആമസോൺ പ്രൈം, സോണി ലിവ്, സീ5, Lionsgate Play, Discovery+, Sun NXT, Hoichoi, FanCode, Chaupal, Planet Marathi, Kancha Lanka തുടങ്ങിയ നിരവധി പ്ലാറ്റ്ഫോമുകൾ ഈ പ്ലാനിൽ ലഭിക്കുന്നു. ഇതിനൊപ്പം 18 മാസത്തെ ​ഗൂ​ഗിൾ ജെമിനി പ്രോ സബ്‌സ്‌ക്രിപ്‌ഷനും ഉൾപ്പെടുന്നു.

ഫ്ലെക്സി പായ്ക്ക് ആഡ്-ഓൺ

മൂന്ന് പ്ലാനുകളിൽ ഏറ്റവും കുറഞ്ഞ വിലയിൽ ലഭ്യമാകുന്ന പ്ലാനാണിത്. വെറും 103 രൂപയ്ക്ക് 28 ദിവസത്തെ കാലാവധിയിൽ ഈ പ്ലാൻ റീചാ‍ർജ് ചെയ്യാം. 5 ജിബി ഡാറ്റയാണ് ഈ പ്ലാനും വാ​ഗ്ദാനം ചെയ്യുന്നത്. ഇതിനൊപ്പം ചില ഒടിടി പ്ലാറ്റ്ഫോമുകളിലേക്കുള്ള ആക്സസും അനുവദിക്കുന്നുണ്ട്.