വിസ്താരയിലെ ജീവനക്കാര്‍ക്ക് ആശ്വാസം; ലെവല്‍ 1 മുതല്‍ 3 വരെയുള്ളവര്‍ക്ക് സാലറി കട്ട് ഉണ്ടാകില്ല

ദില്ലി: ഇന്ത്യന്‍ വിമാനക്കമ്പനിയായ വിസ്താരയിലെ ജീവനക്കാര്‍ക്ക് സന്തോഷ വാര്‍ത്ത. തങ്ങളുടെ ജീവനക്കാരില്‍ ഒരു വിഭാഗത്തിന് ഏര്‍പ്പെടുത്തിയ സാലറി കട്ട് അവസാനിപ്പിക്കാന്‍ കമ്പനി ഒരുങ്ങുന്നു. ഏപ്രില്‍ മുതലായിരിക്കും പുതിയ തീരുമാനം നടപ്പിലാക്കുന്നത്. എന്നാല്‍ 2021 ഏപ്രില്‍ സിഇഒ ഉള്‍പ്പടെയുള്ള മാനേജ്‌മെന്റ് ലെവല്‍ എക്‌സിക്യൂട്ടീവിന് മാത്രം സാലറി കട്ട് ഉണ്ടാകും. വിസ്താര ജീവനക്കാര്‍ക്ക് ലഭിച്ച ഇ-മെയില്‍ സന്ദേശത്തിലാണ് ഇക്കാര്യം വ്യക്തമാക്കുന്നത്. ടാറ്റ സണ്‍സിന്റെയും സിങ്കപ്പൂര്‍ എയര്‍ലൈന്‍സും സംയുക്തമായി നടത്തുന്ന സംരഭമാണ് വിസ്താര.

കൊറോണ വൈറസ് പൊട്ടിപ്പുറപ്പെട്ടതിന് പിന്നാലെ 2020 ജൂണ്‍ മാസത്തിലാണ് കമ്പനി ജീവനക്കാരുടെ ശമ്പളം കട്ട് ചെയ്യാന്‍ തീരുമാനിച്ചത്. 40 ശതമാനം സാലറി കട്ടാണ് ഏര്‍പ്പെടുത്തിയത്. ആദ്യം ഡിസംബര്‍ 31 വരെയാണ് ഏര്‍പ്പെടുത്തിയിരുന്നതെങ്കിലും പിന്നീട് ഇത് മാര്‍ച്ച് 31 വരെ നീട്ടുകയായിരുന്നു. കൊവിഡ് സൃഷ്ടിച്ച സാമ്പത്തിക പ്രതിസന്ധി മറികടക്കുന്നതിന് വേണ്ടിയാണ് ജീവനക്കാരുടെ ശമ്പളം കട്ട് ചെയ്യാന്‍ കമ്പനി തീരുമാനിച്ചത്.

കമ്പനിയുടെ പുതിയ അറിയിപ്പ് പ്രകാരം, ലെവല്‍ ഒന്ന് മുതല്‍ മൂന്ന് വരെയുള്ള ജീവനക്കാര്‍ക്ക് ഏപ്രില്‍ ഒന്ന് മുതല്‍ സാലറി കട്ട് ഉണ്ടാവുന്നതല്ല. ലെവല്‍ നാല് അഞ്ച് വിഭാഗത്തിലുള്ള ജീവനക്കാര്‍ക്ക് 15 ശതമാനം സാലറി കട്ടായിരിക്കും ഉണ്ടാകുക. ഇനിയൊരു അറിയിപ്പ് ഉണ്ടാകുന്നത് വരെ ഈ രീതിയിലായിരിക്കും ശമ്പള ഘടന. എന്നാല്‍ വിസ്താര സിഇഒയുടെ ശമ്പളം 25 ശതമാനത്തില്‍ കുറവുണ്ടാകും.