ഓഹരി വില 10 രൂപയിൽ താഴെ, 3 മാസത്തിനുള്ളിൽ 21 ശതമാനം വളർച്ച, ഈ പെന്നി ഓഹരി ലോട്ടറി ആകുമോ..?

പെന്നി ഓഹരിയായ സർവേശ്വർ ഫുഡ്‌സ് വീണ്ടും കുതിപ്പിനുള്ള സൂചനകൾ നൽകുന്നുണ്ട്. കഴിഞ്ഞ രണ്ട് ദിവസങ്ങളിലും വിപണി ചാഞ്ചാടിയിട്ടും സർവേശ്വർ ഫുഡ്‌സ് ഓഹരി മികച്ച നേട്ടമുണ്ടാക്കി. വരും ദിവസങ്ങളിലും കുതിപ്പ് തുടരാനായാൽ പെന്നി ഓഹരി നിക്ഷേപകരുടെ ശ്രദ്ധയിലേക്ക് വീണ്ടും എത്തും. നമുക്ക് പരിശോധിക്കാം.

സർവേശ്വർ ഫുഡ്സ്

ബസുമതി അരി, മറ്റ് കാര്‍ഷിക ഉത്പ്പന്നങ്ങള്‍ എന്നിവ നിര്‍മിക്കുന്ന കമ്പനിയാണ് സര്‍വേശ്വര്‍ ഫുഡ്സ്. നെല്ല് സംഭരണം മുതല്‍ വിതരണം വരെയുള്ള പ്രവർത്തനങ്ങളില്‍ കമ്പനി ഏര്‍പ്പെടുന്നു. ജമ്മു കശ്മീരിലും ഗുജറാത്തിലും പ്രവർത്തിക്കുന്ന കമ്പനിക്ക് 130 വർഷത്തെ പാരമ്പര്യമുണ്ട്. പരമ്പരാഗത ചാനലുകൾ, പ്രൊപ്രൈറ്ററി റീട്ടെയിൽ ഔട്ട്‌ലെറ്റുകൾ, ഇ-കൊമേഴ്‌സ് പ്ലാറ്റ്‌ഫോമുകൾ എന്നിവ ഉൾക്കൊള്ളുന്ന വൈവിധ്യമാർന്ന വിൽപ്പന തന്ത്രമാണ് സർവേശ്വർ ഫുഡ്സ്
ഉപയോഗിക്കുന്നത്. കൂടാതെ എൻ‌എസ്‌ഇയിലും ബി‌എസ്‌ഇയിലും ലിസ്റ്റ് ചെയ്യപ്പെടുന്ന ജമ്മു & കശ്മീരിൽ നിന്നുള്ള ആദ്യത്തെ സ്വകാര്യ മേഖലയിലെ ഭക്ഷ്യ കമ്പനിയാണിത്.

ഓഹരി വില

1.7 ശതമാനം നേട്ടത്തോടെ 8.39 രൂപ എന്ന നിലയിലാണ് വ്യാഴാഴ്ച സർവേശ്വർ ഫുഡ്സ് ഓഹരി വ്യാപാരം അവസാനിപ്പിച്ചത്. കഴിഞ്ഞ 3 മാസത്തിനുള്ളിൽ ഓഹരി 21 ശതമാനവും 6 മാസത്തിനുള്ളിൽ 17 ശതമാനവും കുതിച്ചുയർന്നു. അതേസമയം 2025-ൽ ഇതുവരെയുള്ള പ്രകടനം പരിശോധിച്ചാൽ ഓഹരി 6 ശതമാനം നഷ്ടം രേഖപ്പെടുത്തിയിട്ടുണ്ടെന്ന് കാണാം. ഓഹരിയുടെ 52 ആഴ്ചയിലെ ഉയർന്ന നില 12.28 രൂപയും 52 ആഴ്ചയിലെ ഏറ്റവും താഴ്ന്ന നില 5.63 രൂപയുമാണ്. കഴിഞ്ഞ രണ്ട് വർഷത്തിനുള്ളിൽ സർവേശ്വർ ഫുഡ്സ് ഓഹരി 120 ശതമാനം വളർച്ച കൈവരിച്ചിട്ടുണ്ട്.

വരുമാനത്തിൽ കുതിപ്പ്

സർവേശ്വർ ഫുഡ്‌സ് അടുത്തിടെ പുറത്തിറങ്ങിയ പാദത്തിലെ ആദ്യ ഫലങ്ങളിൽ മികച്ച പ്രകടനം കാഴ്ചവച്ചു. കമ്പനിയുടെ സംയോജിത ലാഭം 7.02 കോടി രൂപയായിരുന്നു. കഴിഞ്ഞ വർഷം ഇത് 3.09 കോടി രൂപയായിരുന്നു. അതായത് 133% വർദ്ധനവ്. പ്രവർത്തനങ്ങളിൽ നിന്നുള്ള വരുമാനം 301.34 കോടി രൂപയായിരുന്നു. കമ്പനിയുടെ വളർച്ചാ പ്രവണത ശക്തമാണെന്ന് ഈ കണക്കുകൾ കാണിക്കുന്നു.

അവകാശ ഓഹരി

2025 ഓഗസ്റ്റ് 11 ന് നടന്ന യോഗത്തിൽ, സർവേശ്വർ ഫുഡ്‌സ് ലിമിറ്റഡിന്‍റെ ഡയറക്ടർ ബോർഡ് 150 കോടി രൂപ സമാഹരിക്കുന്നതിനായി അവകാശ ഓഹരി വിൽപ്പനയ്ക്ക് അംഗീകാരം നൽകിയിരുന്നു. 1 രൂപ മുഖവിലയുള്ള ഇക്വിറ്റി ഓഹരികൾ റൈറ്റ്സ് ഇഷ്യുവിൽ ഉൾപ്പെടും. പിന്നീട് പ്രഖ്യാപിക്കുന്ന റെക്കോർഡ് തീയതിയിൽ യോഗ്യരായ ഓഹരി ഉടമകൾക്ക് ഇത് നൽകും. കമ്പനിയുടെ പുതിയ ചീഫ് ഫിനാൻഷ്യൽ ഓഫീസർ (സിഎഫ്‌ഒ) ആയി ആനന്ദ് ശാരദ കഴിഞ്ഞ ദിവസം ചുമതല ഏറ്റിരുന്നു. മുമ്പ് പരാഗ് മിൽക്ക്ഫുഡ്‌സ് ലിമിറ്റഡ്, ആർ‌ബി‌എൽ ബാങ്ക് ലിമിറ്റഡ്, ഡിസിബി ബാങ്ക് ലിമിറ്റഡ്, പബ്ലിസിസ് ഗ്രൂപ്പ് എന്നിവിടങ്ങളിൽ ആനന്ദ് ശാരദ സേവനമനുഷ്ഠിച്ചിട്ടുണ്ട്.

അറിയിപ്പ്: മുകളില്‍ കൊടുത്തിരിക്കുന്ന ലേഖനം പഠനാവശ്യത്തിന് നൽകുന്നതാണ്. ഇതുമായി ബന്ധപ്പെട്ട് നിക്ഷേപ തീരുമാനങ്ങള്‍ എടുക്കും മുന്‍പ് സാമ്പത്തിക വിദഗ്ധന്റെ നിര്‍ദേശം തേടാം. ഓഹരി വിപണിയിലെ നിക്ഷേപം നഷ്ട സാധ്യതകള്‍ക്ക് വിധേയമാണ്. സ്വന്തം റിസ്‌കില്‍ മാത്രം നിക്ഷേപ തീരുമാനം കൈക്കൊള്ളുക. ലേഖനം വായിച്ചിട്ട് എടുക്കുന്ന തീരുമാനത്തിന്റെ അടിസ്ഥാനത്തില്‍ സംഭവിക്കുന്ന ലാഭനഷ്ടങ്ങള്‍ക്ക് ഗുഡ്റിട്ടേൺസ് മലയാളവും ലേഖകനും ഉത്തരവാദികളല്ല.