ജനുവരി 26-ന് ഡൽഹിയിലേക്ക് പോയാലോ? റിപ്പബ്ലിക് ദിന പരേഡ് കാണാം: ടിക്കറ്റ് ബുക്കിംഗ് ജനുവരി 5 മുതൽ

പുതുവർഷപ്പിറവിക്ക് പിന്നാലെ രാജ്യം 77-ാമത് റിപ്പബ്ലിക് ദിനാഘോഷങ്ങൾക്കായി ഒരുങ്ങുകയാണ്. ഇന്ത്യയിലെ ഓരോ പൗരനും അഭിമാനകരമായ ഈ ദിനത്തിൽ, ജനുവരി 26-ന് രാജ്യതലസ്ഥാനത്ത് നടക്കുന്ന വർണ്ണാഭമായ റിപ്പബ്ലിക് ദിന പരേഡ് നേരിട്ട് കാണാൻ അവസരമൊരുങ്ങുന്നു. പരേഡ് കാണാൻ ആഗ്രഹിക്കുന്നവർക്കായി നാളെ, ജനുവരി 5 മുതൽ ടിക്കറ്റ് വിതരണം ആരംഭിക്കുമെന്ന് പ്രതിരോധ മന്ത്രാലയം അറിയിച്ചു.

ജനുവരി 26-ന് നടക്കുന്ന പ്രധാന ചടങ്ങുകളിൽ വിവിധ സംസ്ഥാനങ്ങളുടെ ടാബ്ലോകൾ, വ്യോമസേനയുടെ ഫ്ലൈപാസ്റ്റുകൾ, സൈനിക ബഹുമതികൾ എന്നിവ പ്രധാന ആകർഷണങ്ങളാകും. ജനുവരി 26ന് റിപ്പബ്ലിക്ക് പരേഡ് നടക്കും, പിന്നീട് ജനുവരി 28ന് ബീറ്റിംഗ് റിട്രീറ്റ് ചടങ്ങിന്റെ പൂർണ്ണരൂപത്തിലുള്ള ഡ്രസ് റിഹേഴ്‌സൽ, ജനുവരി 29ന് ബീറ്റിംഗ് റിട്രീറ്റ് ചടങ്ങ് എന്നിവയും നടക്കും.

റിപ്പബ്ലിക് ദിന പരേഡിനുള്ള ടിക്കറ്റുകൾ ഔദ്യോഗിക പോർട്ടൽ വഴി ഓൺലൈനായും നിശ്ചിത കൗണ്ടറുകൾ വഴി നേരിട്ടും സ്വന്തമാക്കാവുന്നതാണ്. rashtraparv.mod.gov.in എന്ന വെബ്‌സൈറ്റിൽ ഇതുമായി ബന്ധപ്പെട്ട എല്ലാ വിവരങ്ങളും ട്രാക്ക് ചെയ്യാം.

റിപ്പബ്ലിക്ക് ദിന ടിക്കറ്റ് നിരക്കുകൾ

ജനുവരി 26-ന് നടക്കുന്ന റിപ്പബ്ലിക് ദിന പരേഡിനുള്ള ടിക്കറ്റുകൾ കുറഞ്ഞ നിരക്കിൽ ലഭിക്കും. 20 രൂപ, 100 രൂപ എന്നിങ്ങനെയാണ് ഈ നിരക്കുകൾ. പിന്നീട് ജനുവരി 28-ന് നടക്കുന്ന ഫുൾ ഡ്രസ് റിഹേഴ്‌സൽ ഓഫ് ബീറ്റിംഗ് റിട്രീറ്റിനുള്ള ടിക്കറ്റുകൾക്ക് 20 രൂപയായിരിക്കും വില. ജനുവരി 29-ന് നടക്കുന്ന ബീറ്റിംഗ് റിട്രീറ്റ് ചടങ്ങിനുള്ള ടിക്കറ്റുകൾക്ക് 100 രൂപയായിരിക്കും വില. മൂന്ന് പരിപാടികളുടെയും ടിക്കറ്റ് വിൽപ്പന ജനുവരി 5 മുതൽ ജനുവരി 14 വരെയായിരിക്കും. എല്ലാ ദിവസവും രാവിലെ 9 മണി മുതൽ ഓൺലൈൻ ടിക്കറ്റ് വിൽപ്പന ആരംഭിക്കും.

ഓൺലൈൻ ബുക്കിംഗ്

ആമന്ത്രാൻ പോർട്ടൽ വഴി ( www.aamantran.mod.gov.in ) നിങ്ങൾക്ക് ഓൺലൈനായി ടിക്കറ്റുകൾ ബുക്ക് ചെയ്യാം. ഈ ഡിജിറ്റൽ ഓപ്ഷനുള്ളതിനാൽ ഇന്ത്യയിലെ ഏതൊരു പൗരനും ക്യൂ നിൽക്കാതെ തന്നെ റിപ്പബ്ലിക്ക് ആഘോഷങ്ങൾ നേരിൽ കാണാനുള്ള ടിക്കറ്റുകൾ സ്വന്തമാക്കാം.

ഓഫ്‌ലൈൻ ടിക്കറ്റ് ബുക്കിം​ഗ്

ജനുവരി 5 മുതൽ 14 വരെ ഓഫ്‌ലൈനായി ടിക്കറ്റ് ബുക്ക് ചെയ്യാൻ ഡൽഹിയിൽ ആറ് കൗണ്ടറുകൾ പ്രവർത്തിക്കുന്നു. സേനാ ഭവൻ (ഗേറ്റ് 5), ശാസ്ത്രി ഭവൻ (ഗേറ്റ് 3), ജന്തർ മന്തർ (പ്രധാന കവാടം), പാർലമെന്റ് ഹൗസ് (സ്വീകരണം), രാജീവ് ചൗക്ക് മെട്രോ (ഡി ബ്ലോക്ക്, ഗേറ്റ്സ് 3-4), കശ്മീരി ഗേറ്റ് മെട്രോ (കോൺകോഴ്‌സ്, ഗേറ്റ് 8) എന്നിവിടങ്ങളിലാണ് ഈ കൗണ്ടറുകൾ പ്രവർത്തിക്കുന്നത്. ഈ ദിവസങ്ങളിൽ രാവിലെ 10 മുതൽ ഉച്ചയ്ക്ക് 1 മണി വരെയും, ഉച്ചയ്ക്ക് 2 മണി മുതൽ 5 വരെയുമാണ് ബുക്കിം​ഗ് സമയം.

തിരിച്ചറിയൽ രേഖ

ആഘോഷങ്ങളിൽ പങ്കെടുക്കാൻ ആ​ഗ്രഹിക്കുന്നവർ സാധുവായ രേഖകളും കൈവശം വെക്കണം. ആധാർ, വോട്ടർ ഐഡി, ഡ്രൈവിംഗ് ലൈസൻസ്, പാൻ കാർഡ്, പാസ്‌പോർട്ട് തുടങ്ങിയ ഒറിജിനൽ ഫോട്ടോ പതിച്ച തിരിച്ചറിയൽ കാർഡ് ഹാജരാക്കിയാൽ കൗണ്ടറുകളിൽ നിന്ന് നേരിട്ട് ടിക്കറ്റുകൾ ലഭ്യമാകും. മാത്രമല്ല ഈ മൂന്ന് പരിപാടികളിലും പ്രവേശിക്കുന്നതിന് ഒരേ ഫോട്ടോ പതിച്ച ഐഡി കാർഡും കൈവശമുണ്ടായിരിക്കണം.