സ്വർണ വിലയിൽ വീണ്ടും വർദ്ധനവ്, ഇന്ന് മുതൽ ആഭരണങ്ങൾ വാങ്ങുന്നവർ സൂക്ഷിക്കുക

ഇന്ത്യൻ വിപണിയിൽ സ്വർണ്ണത്തിന്റെയും വെള്ളിയുടെയും വിലയിൽ ഇന്ന് വർദ്ധനവ്. എം‌സി‌എക്‌സിൽ, സ്വർണ്ണ ഫ്യൂച്ചർ വില 10 ഗ്രാമിന് 0.63 ശതമാനം ഉയർന്ന് 39,695 രൂപയിലെത്തി. കഴിഞ്ഞ രണ്ട് ദിവസങ്ങളിൽ സ്വർണ വില കുറഞ്ഞിരുന്നു. 

വെള്ളി വില

വെള്ളിയും സമാനമായ പ്രവണത പിന്തുടർന്നു. എംസിഎക്സിൽ സിൽവർ ഫ്യൂച്ചേഴ്സ് നിരക്ക് 0.82 ശതമാനം ഉയർന്ന് 46,278 രൂപയിലെത്തി. കഴിഞ്ഞ ആഴ്ച സ്വർണ വില 10 ഗ്രാമിന് 41,300 രൂപയിലെത്തിയിരുന്നു. യുഎസ്-ഇറാൻ പിരിമുറുക്കമാണ് ആഭ്യന്തര വിപണിയിൽ സ്വർണ വിലയെ ബാധിച്ച പ്രധാന ഘടകം.

ഹോൾമാർക്കിംഗ് നിർബന്ധം

ഇന്ന് മുതൽ ഹോൾമാർക്ക് മുദ്ര പതിച്ച 14, 18, 22 കാരറ്റ് സ്വർണാഭരണങ്ങൾ മാത്രമേ രാജ്യത്ത് വിൽക്കാൻ പാടുള്ളൂവെന്ന് സർക്കാർ ജ്വല്ലറികൾക്ക് നിർദേശം നൽകിയിട്ടുണ്ട്. ബ്യൂറോ ഓഫ് ഇന്ത്യൻ സ്റ്റാൻഡേർഡിൽ (ബിഐഎസ്) രജിസ്റ്റർ ചെയ്യാനും സ്വർണ്ണാഭരണങ്ങളുടെ നിർബന്ധിത ഹാൾമാർക്കിംഗ് നടപ്പാക്കാനും ജ്വല്ലറികൾക്ക് ഒരു വർഷത്തെ സമയം നൽകിയിട്ടുണ്ട്.

കേരളത്തിലെ വില

കേരളത്തിൽ ഇന്ന് സ്വർണ വില 240 രൂപ ഉയർന്ന് പവന് 29640 രൂപയ്ക്കാണ് വ്യാപാരം പുരോഗമിക്കുന്നത്. ഒരു ഗ്രാമിന് 3705 രൂപയാണ് ഇന്നത്തെ നിരക്ക്. ഈ മാസം ചരിത്രത്തിലാദ്യമായി തന്നെ സ്വർണ വില റെക്കോർഡ് വിലയായ പവന് 30400 രൂപയിൽ എത്തിയിരുന്നു, ജനുവരി എട്ടിനാണ് ഈ വിലയ്ക്ക് വ്യാപാരം നടന്നത്.

കഴിഞ്ഞ വർഷത്തെ വില

യുഎസ്-ചൈന വ്യാപാര സംഘർഷങ്ങളും ആഗോള സമ്പദ്‌വ്യവസ്ഥയെക്കുറിച്ചുള്ള ആശങ്കകൾക്കും ഇടയിൽ കഴിഞ്ഞ വർഷം സ്വർണ വില കുത്തനെ ഉയർന്നിരുന്നു. കഴിഞ്ഞ വർഷം സ്വർണ്ണ വില ഇന്ത്യയിൽ 25 ശതമാനവും ആഗോള വിപണികളിൽ 18 ശതമാനവും ഉയർന്നു. മറ്റ് വിലയേറിയ ലോഹങ്ങളിൽ വെള്ളിയുടെ വില ഔൺസിന് 0.3 ശതമാനം ഉയർന്ന് 17.83 ഡോളറിലെത്തി. പ്ലാറ്റിനം 0.6 ശതമാനം ഉയർന്ന് 989.03 ഡോളറിലെത്തി.