സ്വർണമല്ല, 2026-ൽ റെക്കോർഡ് വില വെള്ളിക്കാണ്, കുതിപ്പ് പ്രവചിച്ച് റോബർട്ട് കിയോസാക്കി, കാരണം അറിയാം

വെള്ളി വില ആഗോള വിപണിയിലും ഇന്ത്യയിലും ചരിത്രത്തിലെ ഏറ്റവും വലിയ ഉയർച്ച രേഖപ്പെടുത്തിയ വർഷമാണ് 2025. ശക്തമായ വ്യാവസായിക ആവശ്യവും വിതരണം കുറയുന്നതും നിക്ഷേപകരുടെ വലിയ താൽപര്യവും ചേർന്നതോടെയാണ് വെള്ളി വില റെക്കോർഡ് തലങ്ങളിലേക്ക് കുതിച്ചുയർന്നത്. ആഗോള വിപണിയിൽ 2025 ഡിസംബർ മാസത്തോടെ സ്പോട്ട് വെള്ളി വില ഔൺസിന് 80 ഡോളറിന് മുകളിലെത്തി. ഇതോടെ കഴിഞ്ഞ പതിറ്റാണ്ടുകളിലെ ഏറ്റവും ശക്തമായ വാർഷിക നേട്ടമാണ് വെള്ളി നേടിയത്.

ഇന്ത്യൻ വിപണിയിലെ വളർച്ച

ഇന്ത്യൻ വിപണിയിലും വെള്ളി വില ചരിത്രം കുറിച്ചു. 2025 അവസാനം വെള്ളി വില കിലോഗ്രാമിന് 2.5 ലക്ഷം രൂപ കടന്നത് ആഭ്യന്തര വിപണിയിൽ വലിയ ചർച്ചയായി. ചില സംസ്ഥാനങ്ങളിൽ ഇതിലും ഉയർന്ന നിരക്കുകളാണ് രേഖപ്പെടുത്തിയത്. ആഭ്യന്തര കറൻസി മൂല്യത്തിലെ മാറ്റവും അന്താരാഷ്ട്ര വിലവർധനയും ചേർന്നതാണ് ഇന്ത്യയിൽ വില കുതിക്കാനുള്ള പ്രധാന കാരണം.

കുതിപ്പിന് കാരണം

വിദഗ്ധരുടെ അഭിപ്രായത്തിൽ, 2025-ലെ വെള്ളി വിലക്കുതിപ്പിന് പിന്നിൽ നിരവധി ഘടകങ്ങളുണ്ട്. സോളാർ പാനലുകൾ, ഇലക്ട്രിക് വാഹനങ്ങൾ, 5G, ഡാറ്റാ സെന്ററുകൾ തുടങ്ങിയ മേഖലകളിൽ വെള്ളിയുടെ ഉപയോഗം വൻതോതിൽ ഉയർന്നതാണ് പ്രധാന കാരണം. ഇതിന് പുറമെ ആഗോളതലത്തിൽ വെള്ളിയുടെ വിതരണം ആവശ്യത്തിന് അനുസരിച്ച് വർധിക്കാത്തതും വില ഉയരാൻ കാരണമായി. അതേസമയം, പല നിക്ഷേപകരും സ്വർണ്ണത്തിനൊപ്പം സുരക്ഷിത നിക്ഷേപ മാർഗമായി വെള്ളിയിലേക്കും മാറിയതാണ് 2025-ലെ റാലിക്ക് കൂടുതൽ ബലം നൽകിയത്. പലിശനിരക്കുകളെക്കുറിച്ചുള്ള അനിശ്ചിതത്വവും ആഗോള രാഷ്ട്രീയ സംഘർഷങ്ങളും വെള്ളിക്ക് 'സേഫ് ഹേവൻ' ആകർഷണം കൂട്ടി.

വില 200 ഡോളറിലെത്തും

റിച്ച് ഡാഡ് പുവർ ഡാഡ് എന്ന പുസ്തകത്തിന്‍റെ രചയിതാവായ റോബർട്ട് കിയോസാക്കി പറയുന്നത് 2026-ൽ വെള്ളി വില കത്തിക്കയറുമെന്നാണ്. 2026-ൽ വെള്ളി വില ഔൺസിന് 200 ഡോളറിലെത്തുമെന്നാണ് അദ്ദേഹം പറയുന്നത്. 78 കാരനായ കിയോസാക്കി വെള്ളിയാണ് തന്റെ പ്രിയപ്പെട്ട ആസ്തികളിൽ ഒന്നെന്ന് സമ്മതിച്ചു. 60 വർഷങ്ങൾക്ക് മുമ്പ് 1965 ലാണ് താൻ ആദ്യമായി ഈ ലോഹം വാങ്ങിയതെന്ന് അദ്ദേഹം വെളിപ്പെടുത്തി.

വെള്ളിയിൽ നിക്ഷേപിക്കാൻ പദ്ധതിയിടുന്നവർ ക്ഷമയോടെ കാത്തിരിക്കാനാണ് അദ്ദേഹം ഉപദേശിക്കുന്നത്. വില താഴേക്ക് വീഴുമ്പോൾ വാങ്ങുക. 2026 ൽ വെള്ളി വില $100 കടക്കുമെന്ന് ഞാൻ വിശ്വസിക്കുന്നു. ഒരുപക്ഷേ ഒരു ഔൺസിന് 200 ഡോളറിലെത്താമെന്നും അദ്ദേഹം കൂട്ടിച്ചേർത്തു.

വില മുകളിലേക്ക് തന്നെ

വിദഗ്ധരുടെ അഭിപ്രായത്തിൽ, സോളാർ പാനലുകൾ, ഇലക്ട്രിക് വാഹനങ്ങൾ, ഇലക്ട്രോണിക്സ്, ഡാറ്റാ സെന്ററുകൾ തുടങ്ങിയ മേഖലകളിൽ വെള്ളിയുടെ ഉപയോഗം 2026-ലും വർധിക്കാനിടയുണ്ട്. ഇതോടെ വ്യാവസായിക ആവശ്യകത ശക്തമായി തുടരുമെന്നും ഇത് വില ഉയരാൻ കാരണമാകുമെന്നും വിലയിരുത്തുന്നു. അതേസമയം, ആഗോളതലത്തിൽ വെള്ളിയുടെ ഉത്പാദനം ആവശ്യത്തിന് അനുസരിച്ച് ഉയരാത്തത് വിപണിയിൽ 'സപ്ലൈ ഡിഫിസിറ്റ്' തുടരാൻ ഇടയാക്കും.

ഇന്ത്യൻ വിപണിയിൽ, അന്താരാഷ്ട്ര വിലയും രൂപയുടെ മൂല്യനിലയും നിർണായകമായിരിക്കും. നിലവിലെ പ്രവണതകൾ തുടർന്നാൽ 2026-ൽ വെള്ളി വില കിലോഗ്രാമിന് 2.3 മുതൽ 2.5 ലക്ഷം രൂപ വരെയുള്ള തലങ്ങളിൽ സ്ഥിരത കണ്ടെത്താമെന്നാണ് വിപണി നിരീക്ഷകരുടെ വിലയിരുത്തൽ. എന്നാൽ ആഗോള സാമ്പത്തിക സാഹചര്യങ്ങളിൽ വലിയ മാറ്റമുണ്ടായാൽ വിലയിൽ വേഗത്തിലുള്ള ഉയർച്ചയോ ഇടിവോ സംഭവിക്കാനുള്ള സാധ്യതയും തള്ളിക്കളയാനാകില്ല.

അറിയിപ്പ്: ഇവിടെ പ്രകടിപ്പിച്ചിട്ടുള്ള അഭിപ്രായങ്ങളും നിർദ്ദേശങ്ങളും വ്യക്തിഗത വിശകലന വിദഗ്ദ്ധരുടെയോ സ്ഥാപനങ്ങളുടെയോ മാത്രം കാഴ്ചപ്പാടുകളാണ്. ഇത് Goodreturns.in-ന്റെയോ Greenium Information Technologies Private Limited-ന്റെയോ നിലപാടുകളെ പ്രതിഫലിക്കുന്നില്ല. ഈ ഉള്ളടക്കത്തിന്റെ കൃത്യത, പൂർണ്ണത, അല്ലെങ്കിൽ വിശ്വാസ്യത എന്നിവയ്ക്ക് ഞങ്ങൾ യാതൊരു ഉറപ്പും നൽകുന്നില്ല, മാത്രമല്ല അതിന് ഉത്തരവാദിത്തം ഏറ്റെടുക്കുന്നുമില്ല.

ഞങ്ങൾ ഏതെങ്കിലും തരത്തിലുള്ള നിക്ഷേപ ഉപദേശങ്ങൾ നൽകുകയോ, ഓഹരികൾ വാങ്ങാനോ വിൽക്കാനോ ശുപാർശ ചെയ്യുകയോ ചെയ്യുന്നില്ല. ഈ വിവരങ്ങൾ വിജ്ഞാനപ്രദമായ ആവശ്യങ്ങൾക്ക് മാത്രമുള്ളതാണ്. അതിനാൽ, ഏതെങ്കിലും നിക്ഷേപ തീരുമാനങ്ങൾ എടുക്കുന്നതിന് മുൻപ്, ലൈസൻസുള്ള ഒരു സാമ്പത്തിക ഉപദേഷ്ടകനുമായി കൂടിയാലോചിക്കുന്നത് നിർബന്ധമാണ്.